Dual PanelPa’nubua’ diona Mesir
1Inde sia tu kada Napa’petanggungan Puang Matua diona Mesir. Inang la sae lako Mesir tu PUANG dao saliu’ mandirri’; anna mintu’ napa’deatainna to Mesir, la ma’parondo dio oloNa sia soyang lan tu sumanga’na mintu’ to Mesir.
2Belanna la Kupasisaung tu pada to Mesir, naurunganni sirari siulu’na, sia unnea solana sia kota sirari bali kotana anna lembang sirari bali lembangna.
3Attu iato iatu tangnga’na to Mesir la putta, sia la Kudampa tu tanan penaanna; anna male mekutana lako dipa’deatainna sia mintu’ to ma’basa-basa sia bombo to mate sia to sola deata.
4AngKu sorongi tama lisu pala’na puang masago-sago tu to Mesir sia lako datu masa’ga’ anna parentai, kadanNa Puang, PUANGna mintu’ ma’dandan maritik.
5Iatu uai tasik la lamma’, sia iatu salu la mere sia marangke.
6Iatu mintu’ salu bubosi sia iatu messarakna salu Nil dio Mesir mere sia marangke, sia iatu tille sia ria silayuan.
7Iatu mintu’ kapadanganna siupu’ randanan Nil sia mintu’ to tiambo’na dio lu randan salu Nil malayu nasang, anna sisarombonan male, tae’mo dikita lako.
8Mintu’ to mebale la sumarro sia ma’dosso-dosso, iamotu mintu’ to mamekan diong salu Nil, sia mintu’ to ma’dalla’ la sidongkongan.
9Mintu’ to manarang ungkallu’ kame nagaraga sampin lenang sia to untannun kapa’ la kasirisan.
10Mintu’ tulak sombana tondok la ka’tu rannu; mintu’ to sumaro kande tu’pe inaa.
11Manassa tongan, kumua iatu mai arungna Zoan baga liu, iatu mai pa’bisara manakkana Firaun pa’timbangan baga. Umba la mikua ma’kada lako Firaun kumua: Akumo tu bati’ to paissan, akumo tu bati’ datu dolo?
12Umbamira totemo tu mai to paissanmi? Melo ke napa’peissananni mati’ kalemi tu apa Nalampak PUANGna mintu’ ma’dandan maritik lako Mesir, anna issanni tau.
13Dipabagamo tu mai arungna Zoan, salingmo tu mai arungna Nof; mintu’ tu mai tedong pariu’na lembangna umpapusamo to Mesir.
14Natua’mo PUANG tama ba’tengna tau iato mai tu misa’ inaa ma’pasaling, naurunganni umpapusai tu to Mesir lan mintu’ penggauranna, sangtinti to malango umpentombang luana.
15Tae’mo apa la nakarang to Mesir, tu ma’din la nakarang la ulu, la ikko’, la tangke koroma, la tille.
16Allo iato iatu to Mesir la sangtinti baine; la ma’parondo sia ungkataku’ lima tie’te’Na PUANGna mintu’ ma’dandan maritik, tu Nae’teran tau iato mai.
17Anna iatu tana Yehuda napotiramban to Mesir, ke denni tau ussa’bu’i tu sanganna, la tiramban tu to Mesir diona panglampakNa PUANGna mintu’ ma’dandan maritik lako tau iato mai.
18Attu iato la den lima kota dio Mesir tu la umpobasa basa Kanaan sia umpalao sumpa la mengkaola lako PUANGna mintu’ ma’dandan maritik, misa’i la disanga kota kasanggangan.
19Attu iato la den lan Mesir tu misa’ inan pemalaran lako PUANG sia dio passaparanna la diosok tu batu dipobatu silambi’ diona PUANG.
20Iamote, tu misa’ tanda sia misa’ batu silambi’ lako PUANGna mintu’ ma’dandan maritik diosok lan tana Mesir. Iake meongli’i lako PUANG napobua’ to ma’pakario-rio, la Nasua Puang tu misa’ to patunduan sia to umpangeai tu la urrampananni.
21Anna umpa’petandan Kalena tu PUANG lako to Mesir, anna allo iato la natandai to Mesir tu PUANG; anna pennoloanni tau iato mai tu pemala’ pangrere’ sia kande dipemalaran sia la mangallonan lako PUANG, sia la napalesso’ tu pangallonanna.
22Iatu to Mesir la Napa’dikki liu PUANG anNa pamondoi sule, anna mengkatoba’ lako PUANG sia la Natarima PUANG tu passambayangna sia la Napamondo sule.
23Attu iato la den tu batatta lompo dio mai Mesir lako Asyur, anna olai tau dio mai Asyur, sae lako Mesir sia naolai to Mesir sae lako Asyur, anna pada-pada menomba tu to Mesir sola to Asyur (langngan PUANG).
24Attu iato to Israel la ganna’ sipotallunna sola to Mesir sia to Asyur, la tulangdan dadi karongkosan lan kuli’na padang.
25Belanna Napassakke PUANGna mintu’ ma’dandan maritik Nakua: Nasundun rongko’mora tu to Mesir orangKu, sia Asyur panggaraga limangKu, sia Israel mana’Ku.