Dual PanelPanglalan unnada’i beko tau
1Belanna manassa Puang, PUANGna mintu’ ma’dandan maritik la ullendokanni dio mai Yerusalem sia Yehuda tu apa naposande’ sia naposissarean tau, mintu’ kande napopamuntu sia mintu’ uai;
2sia to lalong sia pa’barani sia to ma’paolai salu sia nabi sia to pakita-kita sia pekaamberan,
3sia pangulunna to limangpulo sia to la’bi’ sia pa’bisara sia to pande paliu sia to ma’basa-basa.
4Pia Kupopendadi datunna tau iato mai sia to mangura masa’ga’ la umparentai.
5Tau iato mai la sikande bete sipakario-rio, sia pia la ullaoi to matua sia to bongko la unnea to la’bi’.
6Attu iato la den tau lan banuanna ambe’na ulla’ka’i siulu’na, nakua: Denpa iko tamangkalemu, panguluikanni ammu pa’inaanni te tondok daun lauan.
7Allo iato la meongli’ anna ma’kada nakua: Tang kubela umpasulei sia tae’ kande lan banuangku sia tae’ tamangkale; da naaku mituro la umpangului te bangsa iate.
8Belanna tibambang tu Yerusalem sia ra’pak tu Yehuda natumang pudukna tau iato mai sia mintu’ penggauranna umbali PUANG, tae’ namataku’ umpenunu mata mala’bi’Na Puang.
9Diona kaumpelindoanna tau titanan sa’bi umpasalai, tang masiri’mo umpokada nasangi tu salana susito Sodom. Upu’ allona tu tau iato mai, belanna untumang kalena.
10Pokadai tu diona to malambu’ kumua la salama’, belanna tau iato mai la untammu bunga rangka’na.
11Upu’ allona tu to tang mekaaluk, la narampoi kakadakean tu tau iato, belanna la dipasisurung kande limanna.
12Iatu taungKu naparenta pia’-pia’ sia napatunduk baine. E mintu’ taungKu napapusakomi panglalanmi sia nabutai tu lalan sipatu la miola.
13La ke’de’ tu PUANG ma’pasala; la bendan umpaolai salunna tu mintu’ bangsa.
14Sae tu PUANG la umpaolai salu tu pekaamberanna taunNa sia mintu’ tedong pariu’na tau iato mai. Kamumo tu mangka ussanggang-sanggangi tu pa’lak anggoro’ iato, na iatu apa dirampa dio mai to mandasa, lan sia lu banuammi.
15Apara bannangna ammi lullu’ parapari tu taungKu sia ammi bala’-bala’ to mandasa? KadanNa Puang, PUANGna mintu’ ma’dandan maritik.
La dipapakkanni tu simbolong manikna to Yerusalem
16Sia Nakuapa tu PUANG: Belanna mintu’ anak dara Sion matampomo sia tumonga-monga lumingka, sia ma’kidi’ mata len sia umpopa’kadetten len lentekna sia umpasigarissingan len gallangna.
17Iamoto anNa la umpakeleanni Puang tu mai ulunna anak dara Sion sia Nakambelangi PUANG tu kasirisanna.
18Allo ia dukato anNa rotakki Puang tu mintu’ pakean gallang, sa’pi’ sia manik dibulan mata rangkapan,
19sia mintu’ anting-anting sia mintu’ ponto sia mintu’ pakean susi bulu podong,
20sia mintu’ lullung sia mintu’ giring-giring gallang sia mintu’ salipi’ sia mintu’ inan pandere’ sia mintu’ sima’-sima’,
21sia mintu’ sissin sia baba’ illong,
22sia kassa’ pa’maruasan sia bayu lamba’ sia sambu’ sia sepu’,
23sia peayoan sia pakean lanna lu sia sa’pi’ sia pakean salian.
24La dadi undinna kumua iatu bau bumarran la ussonda bau andelen sia iatu ulang karrak la ussonda siayak, sia iatu ulu pese ussonda beluak diampinni’ sia iatu pakean dibolong la ussonda kassa’ pa’maruasan, sia ca’ pa’durrusan dio kide ussonda kamalannangan.
25Mintu’ solamu muane la siapanan nakande bassi mataran sia mintu’ pa’baranimmu la tibambang lan tananan ra’.
26Mintu’ lili’ bambana la sumarro sia ma’urrukan sia matambak tongkon lan kuli’na padang.