Alkitab Mobile SABDA
[VER] : [TORAJA]     [PL]  [PB] 
 <<  Yesaya 43 >> 

1Apa totemo, kadanNa PUANG, To tumampamu, e Yakub, sia To kumombongmu, e Israel, da mumataku’, belanna Akumo ullendokangko, Kutambaimo tu sangammu sia ikomo taungKu.

2Iake ussassangko uai, la Kurondongko, sia iake ullambanko salu, tae’ anna la ungkabu’ko; iake unnolaiko to’ api, tae’ anna la ungkandeko sia tae’ anna la’poiko.

3Belanna Akumo, PUANG, Kapenombammu, To maserona Israel, Pela’bakmu; Kusorong tu Mesir, Etiopia sola Syeba la dipasondana ulla’bakko.

4Belanna keangga’ko Kutiro sia mala’bi’ sia naalako penaangKu, angKu sorongi tu ba’tu pira-pira tau ussulleko, sia ba’tu pira-pira bangsa ussonda sunga’mu.

5Da mumataku’, belanna Kurondongko; la Kupasae dio mai rampe matallo tu mai bati’mu sia la Kukorok londongko dio mai rampe matampu’.

6La Kukua rekke ulunna salu; Pasulei, anna sau’ pollo’na uai: Da mupadapai, solanni sule tu mai anakKu muane dio mai padang mambela sia iatu mai anakKu baine dio mai randan langi’,

7mintu’ tu mai to disa’buran sangangKu, tu mangka Kupadadi la Kupomala’bi’, tu Kutampa sia Kukombong.

8Eloranni sun tu bangsa buta iato, moi anna kemata, sia iatu mai to taru, moi anna ketalinga.

Puang Matua tu To parampanan sia umpogau’ apa ba’ru

9Sirampunmo tu mintu’ bangsa sia sipulungmo tu mintu’ to sangpetayanan. Mindara tu tau iato mai ma’din umpa’peissananni tu apa iate sia umpokadangki’ tu apa lendu’mo? Melo ke nabaai sae tu sa’binna, kumua anna disanda-tonganni; la narangi tau anna ma’kada nakua: Tonganna te.

10Kamumo, tu sa’bingKu sia taungKu, tu Kutonno’, kadanNa Puang, ammi issanni sia mipatonganNa’ sia mitandai, kumua Aku bangsiamote! Tae’ tu Kapenomban dipaden dolo na Aku, sia undinna na Aku, tae’ tu senga’na.

11Aku, Akumote tu PUANG, nasaliananna Aku tae’ tu Pela’bak senga’.

12Akumo tu ma’patale’, manglendokan sia ma’kada; tangiaRa’ to salian lembang dio lu kamu; kamumora tu sa’bingKu, kadanNa PUANG, sia Akumora tu Puang Matua.

13Iake undinna Aku duka tu Puang Matua sia moi misa’ tau tae’ la urrampananni lan mai lisu pala’Ku. Iake Kupogau’i, mindara ma’din undampai?

14Nakua kadanNa PUANG, Pela’bakmi, To maserona Israel: Bannang dio kamu, angKu sua misa’ tau lako Babel, angKu ulai’ male tu mintu’ to Kasdim rokko kappala’, tu nanii massattuan sia kumalasi-lasi.

15Akumo tu PUANG, To maseromi, To tumampamana Israel, Datummi.

16Inde sia tu kadanNa PUANG, tu umpaden batatta lan tasik sia lalan lan to’ uai mariak;

17tu umpake’de’ kareta sia darang sia to petoe kassa’ sia to lalong; tu pada tallan, na tang umbelami malimbangun sule, pa’de potonmo sia pi’de susi bannang palita:

18Da mikilalai tu apa mangkamo dadi pirangbongi’, sia da mipalan lenni penaa tu apa lendu’mo;

19manassa la umpadenNa’ apa ba’ru, sia la mellolo; ma’apai ammi tang la unnissanni undinna? La Kupaden tu batatta dio lu padang aak sia salu dio lu padang talo.

20Mintu’ olo’-olo’ dio lu padang la umpakala’bi’Na’, susi dukato tu serigala sia burung unta, belanna Kubenmo uai dio lu padang aak, sia salu dio lu padang, la Kupairusanni tu mai taungKu tu Kupilei langsa’.

21Iatu bangsa mangka Kukombong la umpakala’bi’Na, la umpatale’ kadipudiangKu.

PUANG umpa’kamaseanni tu kasalamaran lako bangsa umpogau’ kasalan

22Apa tae’ ammu meongli’ lako Kaleku, e Yakub, tae’ ammu issanni masara’ dio Aku, e Israel.

23Tae’ra mubaanNa’ domba la dipopemala’ pantunu pu’pu’mu sia tae’ra mupakalangka’Na’ pemala’ pangrere’mu tae’ dukara Kupamatana’ko diona kande dipemalaran sia tae’ dukara Kutuntunko diona pantunu dupa.

24Tae’ra doi’mu muallianNa’ bangle, tae’ra mupedia’iNa’ lompo pemala’ pangrere’mu sangadinna napamatana’Na’ kasalammu sia nabo’yo’iNa’ kakelokammu.

25Aku, Akumote tu umpa’dei mintu’ kakadakeammu belanna iamo pa’poraiangKu sia tae’mo Kupalanni penaa tu kasalammu.

26PakilalaNa’, anta sibisara melo, ma’kada bangmoko ammu disandatonganni.

27Iatu bunga’ ambe’mu umpogau’mo kasalan, sia to ma’pangada’mu untengkaimo parentaKu.

28Iamoto angKu sallangi tu mintu’ pangulu inan maindan, angKu eloranni tu Yakub disabu’i butung pepayu sia dilo’bo-lo’bo tu Israel.


  Share Facebook  |  Share Twitter

 <<  Yesaya 43 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel