Alkitab Mobile SABDA
[VER] : [TORAJA]     [PL]  [PB] 
 <<  Yesaya 65 >> 

PebalinNa PUANG

1TumayaMo’ la umpebalii to tang umpekutananNa’, ma’dinNa’ la nakabu’tui to tang undaka’Na’; Kukua lako bangsa tang ussa’bu’ sangangKu: Inde siaNa’, inde siaNa’.

2Kiallo-kiallo umpakorongNa’ limangKu lako misa’ bangsa pabali-bali, tu unnola lalan tang sipatu sia tu unturu’ tangnga’ misanna.

3Tu misa’ bangsa tontong umpamagalli ara’Ku dio mempaanna belanna memala’ lan pa’lak sia mantunu dupa dao batu tela.

4Sia to unno’ko’ diong lamunan sia to ma’bongi lan kabunianna sia to ungkande duku’ bai sia iatu kande megallian diong nasang lu kandianna.

5Sia to ma’kada susite nakua: Mari’piKomi indetu, da Mireke’na’, belanna aku te to tang direke’. Iate tau iate susito rambu lan illongKu sia sangtinti api dukku tu’tu’allo.

6Manassa tisura’ te iannate dio oloKu; tae’ angKu ma’loko-loko, sangadinna la Kupabala’i; la Kupakkan nasang tama rianna tau iato mai,

7la kakadakeammi, la iatu kakadakeanna nene’ to dolomi, kadanNa PUANG; belanna untunumo dupa dao buntu sia umbe’seNa’ dao mintu’ tanete, iamoto anna ia bunga’na la Kusuka’ tama rianna tu pakkan penggauranna.

8Nakua kadanNa PUANG: Susi ke den siapi uai anggoro’ lan tu eteng bua anggoro’, nakua tau: da mibala’ bala’i, belanna den siapa rongko’ lan susi dukamoto tu penggaurangKu belanna mintu’ taungKu tae’ angKu la ussanggang nasangi.

9Aku la umpabu’tupi tu bati’ dio mai Yakub sia dio mai Yehuda tu misa’ to la umpomana’ mintu’ buntungKu; sia mintu’ to Kutonno’ la ussiosso’i napomana’ sia mintu’ taungKu la torro dio.

10Iatu Saron la panglambaran domba sia iatu lombok Akhor la pa’palengaran sapi, la napomana’ mintu’ taungKu, tu undaka’Na’.

11Apa iatu kamu, e mintu’ to untampe PUANG, tu tang ungkilalai buntu maindanKu, sia to umpasakkaran kande Gad sia to umbolikan apa dipairusan Meni.

12Kupamanassakomi la nakande pa’dang sia la umpatukkukomi kalemi la direre’ belanna metambaNa’, apa tae’ mipebalii, ma’kadaNa’, apa tae’ miperangii, sangadinna umpogau’komi apa kadake dio pentiroKu sia miporai tu apa tang naala penaangKu.

13Iamoto anNa kuai tu Puangta PUANG: Manassa iatu mai taungKu la kumande apa iatu kamu la tangdia’; iatu mai taungKu la mangiru’, apa iatu kamu la ma’rang; iatu mai taungKu la parannu-rannu, apa iatu kamu la kasirisan.

14Manassa iatu mai taungKu la kumalasi-lasi belanna parannu penaanna, apa iatu kamu silallakan belanna masussa sia siurrukan belanna rantang buami.

15Iatu sangammi mitampean to ditonno’Ku, la dipake unggatai tau: Napateimoko PUANG. Apa iatu mintu’ taunNa’ la Nakamasean misa’ sanga senga’,

16naurunganni minda-minda tu umpalakuan kamasakkean kalena, iamo la umpalakuan kamasakkean kalena ussa’bu’ Kapenomban oto’na kamanapparan lan tondok iato, sia minda-minda tu la massumpa lan te tondok, la massumpa ussa’bu’ Puang Matua oto’na kamanapparan, belanna tae’mo nadikilalai tu kamaparrisan dolona sia Kupasalaimo matangKu.

17Belanna inang la ungkombongNa’ langi’ ba’ru sia lino ba’ru; iatu mintu’ apa dolo tae’mo nadianna batu silambi’ lan penaa.

18Apa la parannu-rannukomi sia la kumalasi-lasikomi tontong sae lakona diona tu apa Kukombong, belanna Kupadadi tu Yerusalem la dipomela’tek sia iatu pa’tondokanna la diposende.

19La kumalasi-lasiNa’ diona Yerusalem sia sende-sendeNa’ diona taungKu. Tae’mo anna la dirangi len lan tu tangi’ sia urruk.

20Iatu pia sumusupa lan tae’mo nala kondi’ sunga’, ba’tu to matua tae’mo tu tang la umpasundun kadadianna, belanna iatu to saratu’mo taunna anna mate, kalollerannapa, moi na iatu to umparri-parri kasalan, saratu’pi taunna namane urruai tampak ropu.

21Tau iato mai la umpabendan banua anna nii torro, la untanan anggoro’ anna kandei tu buanna.

22Tae’ anna pabendanni tau iato mai tu banua, kumua natau senga’ unnii torro, tae’ anna mantanan, kumua natau senga’ umpurai nakande tu buanna, belanna susitu kamasaianna garonto’ kayu, susi dukamoto tu katuoanna mintu’ taungKu sia la ungkande bunga rangka’na.

23Tau iato mai tae’ nala mara’ta’ punala bang ba’tu kianakki anna mate mangura, belanna tau iato mai bati’ Napassakke PUANG sola lanto mimi’na.

24La dadi, iake tae’pi nameongli’ tu tau iato mai, la mebaliMo’ sia iake marassan bangsiai ma’kada, la Kutarimamo.

25Iatu guruk na domba sibaa ungkande riu, sia iatu singa la ungkande dalame susi sapi, sia iatu barra’-barra’ la napotuo ula’; tae’ nala umpogau’ kadake sia tae’ nala umpabu’tui tu mesangganginna dao lili’na buntu maindanKu, kadanNa PUANG.


  Share Facebook  |  Share Twitter

 <<  Yesaya 65 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel