Dual PanelBungkaran kada
1Inde sia tu kadanNa PUANG tu rampo lako Yoël, anakna muane Petuel.
Kasanggangan naparampo batik umpa’peissananni lako to Yehuda tu allo pa’paolaian salunNa PUANG
2Perangiimi, e mintu’ pekaamberan, sia tananni talinga, e mintu’ pa’tondokan! Kela den lenni nadadi tu apa susite tonna attummi, ba’tu iatonna linona nene’ to dolomi.
3Uleleananni tu apa iate lako mintu’ anakmi; sia iatu anakmi la naulelean duka lako anakna sia anakna tau iato mai la ullelean pole’oi lako bati’ siosso’na.
4Iatu apa nasesa batik pa’benga’, nakande batik pa’kande; iatu apa nasesa batik pa’kande’ nakande batik pa’ampello’; iatu apa nasesa batik pa’ampello’ nakande batik pa’kasopu.
5Pana’dingkomi, e to pa’malangoan ammi tumangi’, sia sumarrokomi, e pangiru’ uai anggoro’ diona uai anggoro’ ba’ru, belanna disintakkimo dio mai pudukmi.
6Belanna ke’de’mo male tu misa’ bangsa la ullaoi tu padangKu, misa’ bangsa matoto’ sia tang dikemba’ budanna; iatu isinna susi isi singa sia iatu torana susi tora singa birang.
7Iatu garonto’ anggoro’Ku napopendadi apa megiangan sia kayu araKu nasa’pek-sa’pek, napekuli’i tu mintu’ pa’pakna sia natibe; iatu mai tangkena sibusammo.
8Sumarroko butung misa’ anak dara ma’karoro’ belanna sikampanna tonna mangura.
9Iatu kande dipemalaran sia pemala’ pantedok dialai dio mai banuanNa PUANG; iatu mintu’ to minaa, iamo tu to untoe pentoeanNa PUANG rossomo penaanna.
10Sanggangmo tu pa’lak; makarorrongmo tu padang, belanna mangsan nasangmo tu gandung, ma’timo tu uai anggoro’ ba’ru sia meremo tu minna’.
11Bangngo ara’na tu mintu’ to lako padang sia sumarro tu mintu’ to ma’palak anggoro’ diona gandung sia dalle sisikan, belanna iatu bura padang tallanmo.
12Marangkemo tu garonto’ anggoro’ sia malayumo tu garonto’ ara; iatu garonto’ dalima sia ia duka tu garonto’ koroma sia garonto’ appel, mintu’ kayu dio padang malayu nasangmo. Tonganna masiri’mo tu kaparannuan, anna mallai dio mai ma’rupa tau.
13Ma’tambeke’komi sia unnurrukkomi, e kamu mintu’ to minaa; sumarrokomi e mintu’ to untoe pentoean dio inan pemalaran; maikomi ammi ma’bongi ma’pote dibolong, e kamu to untoe pentoeanna Kapenombangku, belanna iatu kande dipemalaran sia pemala’ pantedok dipatoyang dio mai banuanNa Kapenombammi.
14Pamaindanni tu misa’ allo pa’puasan, pasirampunni tu misa’ kasirampunan kamenomban; e kamu pekaamberan, rampunni tu mintu’ tau lan tondok lako banuanNa PUANG, Kapenombammi sia metamba-tambakomi lako PUANG.
15A’a tu allo iato! Belanna mandappi’mo tu alloNa PUANG; saemo tu allo iato susi kasanggangan lu dio mai To umpoissan angge maritik.
16Tae’raka naka’tu tu mintu’ kande dio mai pentirota? Sia ka’tu dukamo tu kaparannuan sia la’tek lan mai banuanNa Kapenombanta.
17Mintu’ tu lise’ banne tikkurrungmo diong to’ apa’ litakna; mintu’ tu alang sanggang; mintu’ tu palipu’ tiserang-serangmo, belanna malayu nasangmo tu mintu’ gandung.
18A’a, tumbai sarrona tu mintu’ patuoan! Mintu’ tuntunan sapi male-male bang, belanna tae’mo padang kariuanna; sia ia duka tu mintu’ tuntunan domba mandasa.
19Lakori Kalemi, o PUANG, kunii metamba, belanna napoppongimo api tu kariuanna dio lu padang pangallaran, sia nalepa’i api tu mintu’ garonto’ kayu dio lu padang.
20Ondongpi mintu’ olo’-olo’ dio lu padang mentingara langngan Kalemi ma’peagi, belanna ma’timo tu salu’-salu’ sia napoppongimo api tu kariuanna dio lu padang pangallaran.