Alkitab Mobile SABDA
[VER] : [TORAJA]     [PL]  [PB] 
 <<  Yosua 2 >> 

To ma’serre’i dio Yerikho

1Nasua bunimi Yosua, anakna Nun, dio mai Sitim tu da’dua to ma’serre’i, nakua: Malekomi untiroi tu padang iato sia iatu Yerikho. Malemi tu tau iato, anna tama banuanna misa’ baine kadake gau’, disanga Rahab, nama’bongi dio.

2Naparampomi tau lako datu Yerikho nakua: Manassa bongi iate den tau sae dio mai to Israel la usserre’i te tondok.

3Nasuami datu Yerikho tu tau male umpokadanni Rahab, nakua: Sorongi tu to sae lako kalemu, tu tama banuammu, belanna sae la usserre’i te mintu’ tondok.

4Apa mangkamo nasolan baine iato tinde muane da’dua, anna bunii. Ma’kadami nakua: Tonganna iatu tau iato sae lako kaleku, apa tae’ kutandai ba’tu umba nanii sae.

5Apa iatonna mabongi sia la disalli’mo tu babangan, tassu’mi tu tau iato, tae’ kuissan naolainna. Melo ke miula’i madoi’, manassa milambi’pa.

6Apa nasuamo tinde baine tu tau iato sola duai kendek langngan bubungan banuanna, nabunii diong to’ dalame rami, tu naampa’ dao bubungan banua.

7Malemi tu tau unnula’i tu tau iato ma’palulako Yordan sae lako to’ kalambanan. Iatonna tassu’mo tu to unnula’i, nasalli’mi tau tu babangan.

8Iatonna tae’pa namamma’ sola duai, kendekmi tu baine iato langngan bubungan, tu nanii tau iato,

9anna ma’kada lako nakua: Kuissanmo kumua iate tondok iate Nasorongmo PUANG lako kalemi sia iatu kadikatakurammi narampoimokanni sia mintu’ tau lan tondok ma’parondomo ungkataku’komi.

10Belanna kirangimo umba Nakua PUANG umpamarangkei tu uai tasik Teberau dio tingayomi, tommi tassu’ lan mai Mesir, sia iatu apa mangka mipogau’ lako tu da’dua datu to Amori sambalinna lu Yordan, iamotu Sihon sola Og, umba mikua ussabu’i.

11Iatongki rangi nasangi to, raangmi tu penaangki, sia moi misa’kan tae’mo tang pa’de deata napobua’ kamatakurangki lako kalemi, belanna iatu PUANG, Kapenombammi, iamo Kapenomban lan langi’ dao sia diong kuli’na padang.

12Totemo umpalaokomi sumpa unnallu’i lako kaleku tete dio PUANG, kumua belanna kupogau’mo tu kameloan lako kalemi, la mipogau’ dukamo tu kameloan lako sangdadiangku; sia la mibenna’ misa’ tanda manassa,

13kumua tae’ mila umpatei tu indo’ku sola ambe’ku, sia mintu’ siulu’ku muane sola baine sia iatu mai solana sia la mirampanangkan dio mai kamatean.

14Mebalimi tu tau sola duai lako, nakua: Manassa la kiindo’ikomi, penaangki la ussonda penaammi, podo da mimale umpokadai. Manassa iake Nasorongmi PUANG te tondok iate lako kaleki, la kipogau’mo tu kameloan sia kamarurusan lako kalemi.

15Narorro’mi ulang tu tau rokko dao mai pentiroan, belanna iatu banuanna baine iato rampe salian dao benteng tembo’ kota, na iatu baine iato torro dao benteng tembo’.

16Nakuami lako tau iato: Malemokomi langngan tanete, da nakabu’tuikomi tu to male unnula’komi, ammi membuni dao lu agi-agi tallung allo, sae lako sulena tu to unnula’komi; mangkato mimane sule unnola lalanmi.

17Ma’kadami tinde tau lako, nakua: Maseromokan dio mai tu sumpa lako kalemu tu mupa’pesuan lako kaleks-

18iake tamakanni te tondok iate, manassa iate ulang bannang karamisi dikaridi’ la mupemporian dao pentiroan tu munii urrorro’kanni, ammu pasirampunni tu indo’mu sia ambe’mu sia siulu’mu muane sia baine sia mintu’ sangdadiammu lan banuammu.

19Minda-minda tassu’ lan mai ba’ba banuammu, iatu rarana la sule langngan botto ulunna, na iatu kami maserokan to; apa minda-minda musolan lan banuammu, iatu rarana la sule langngan botto ulungki, ke denni misa’ tau umpata’pai lima.

20Apa iake mupa’peissananni tu diona kami te, maserokanni dio mai tu sumpa lako kalemu, tu mupa’pesuan lako kaleki.

21Ma’kadami tu baine iato, nakua: Susimo tu mipokadanna. Naelorammi male sola duai; anna iatu ulang karamisi napemporian dio to’ pentiroan.

22Malemi sola duai anna rampo langngan buntu, natorro dao tallung allo sae lako sulena tu to unnula’i. Nadaka’mi te to unnula’i dio lu mintu’ lalan, apa tae’ naappa’i.

23Sulemi tu tau iato sola duai dao mai buntu, anna lamban lian narampo lako Yosua, anakna Nun, anna uleleananni tu mintu’ apa urrampoi.

24Ma’kadami lako Yosua, nakua: Tonganna Nasorongmo PUANG te mintu’ tondok iate tama limanta, belanna ma’parondomo tu mintu’ to lan tondok iato ungkataku’ki’.


  Share Facebook  |  Share Twitter

 <<  Yosua 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran