Dual PanelSunna’ sia Pa’pasa dipogau’ dio Gilgal
1Iatonna rangimi mintu’ datu to Amori, tu dio rampe matampu’na Yordan sia mintu’ datu to Kanaan dio randan tasik, kumua Napamarangke PUANG tu uai Yordan dio tingayona to Israel sae lako tappunna lamban tu tau iato mai, raangmi penaanna sia pa’de deata, belanna mataku’ lako to Israel.
2Attu iato ma’kadami PUANG lako Yosua, Nakua: Garagangko kalemu ba’tu pira-pira piso batu, ammu pogau’ pole’i ma’penduanna tu sunna’ lako to Israel.
3Nagaragaimi Yosua tu ba’tu pira-pira piso batu, anna sunna’i tu mintu’ to Israel dao tanete Kuli’ salepe’ kasirisan.
4Iamo bannangna te, anna sunna’i Yosua tu tau iato mai, belanna mintu’ to tassu’ lan mai Mesir, iamotu mintu’ muane, tu mai pararinna, pura mate dio padang pangallaran dio lu lalan, tonna tassu’mo lan mai Mesir.
5Iatu mintu’ tau tassu’, mangkamo disunna’i, apa iatu mintu’ to dadi lan padang pangallaran dio lu lalan, tonna tassu’mo tu tau iato mai lan mai Mesir, tae’ nadisunna’i.
6Belanna patangpulo taunna tu to Israel ullingkai padang pangallaran, sae lako tappunna mate tu bangsa iato, iamotu mai pararinna, tu tassu’ lan mai Mesir, tu tang umperangii kadanNa PUANG; lako tau iato mai mangkamo umpalao sumpa tu PUANG, kumua tae’ Nala umpakitanni tu padang, tu mangka Naallu’ lako nene’ to dolona Napalaoi sumpa, kumua la Nakamaseangki’, iamotu misa’ padang nanii sebo pangandu’ sia tani’ enoan.
7Iami tu anakna muane tau iato mai Naangka’ Puang dadi sondana; iamote tu nasunna’i Yosua, belanna tae’ nadisunna’i, belanna inang tae’ nadisunna’i dio lu lalan tu tau iato mai.
8Iatonna pura nasangmo tu mintu’ bangsa disunna’i, torromi tu tau iato mai dio inanna lan to’ tenda sae lako mondona.
9Ma’kadami tu PUANG lako Yosua, Nakua: Allo iate Kulendokammo dio mai kalemi tu kanabellerammi to Mesir. Iamoto nasangai tau Gilgal tu inan iato sae lako allo iate.
10Iatonna ma’tenda tu to Israel dio Gilgal, napakarayami tu Pa’pasa tonna allo ma’pessangpulo a’pa’ bulan iato makaroen lan padang Yerikho.
11Iatonna upu’mo tu Pa’pasa, tonna masiang dio mai, ungkandemi bura padang, iamotu roti tang diragii sia gandung dira’tuk lan allo ia bangsiamoto.
12Iatonna kandemi tu bura padang, ra’dami tu manna, tonna masiang dio mai. Iamoto natae’mo manna dio to Israel, sangadinna ungkandemo bura padang Kanaan to taun iato.
Kataloanna Yerikho
13Den pissan tonna sikandappi’ Yerikho tu Yosua, nabangunanni tu matanna, mangngami, bendan tu misa’ tau nasitingoan untoe pa’dang tinonok. Nareke’mi Yosua lako nakutanai, nakua: Lu diorokomika mai kaleki ba’tu dio mai ualingki.
14Apa mebali, nakua: Tangia, sangadinna aku te Arungna mintu’ ma’dandan maritikNa PUANG; totemo saemo’. Tukkumi menomba tu Yosua rokko padang sia ma’kada lako nakua: Apara kadanNa Puangku lako taunna?
15Ma’kadami tu Arungna mintu’ ma’dandan maritikNa PUANG lako Yosua, Nakua: Alai tu sepatummu, belanna iatu inan munii bendan, maindan. Napogau’mi Yosua te.