Dual Panel1Hit hiyap ap oho lahebon nehebi, henehunsi enele holtuk lamuhup. Holtuk lamuhupmu ahunen wene fahet nirim peruk lit wereg halug hiyaben wene hiyag um fug teg angge famen fano ane turukmu ahunen yet hahureg wenggel haruk laruhu.
2Uhe puhun toho wereg lit indi fano roho weregma ahunen yet hahureg ahun oho Allah apma aruhu.
3Heneliliyangge selma werehon lahaptuk lamuhup fug. Honoruk het turukon fano-fano angge umbagpag turukon wan tuk fug angge sum il yinggirik-yenggereng urukon il fanowon wan turuk lamuhup fug.
4Heneliliyangge hinindimu hiraho lit werehon lahaptuk lamuhup. Hinindi apma roho wenggel haruk lit wiyig toho welahe peruk halug heneliliyangge fanowon eleg am fuhon hunundama foroho lit welahepma Allahn fano wereg peruk laruhu.
5Ari roho hiyap indam welatfahon Allah unuk fahet enekol toho wereg lit eneliliyangge lahaptuk latfag. It arimanowen Allahn eneg fanowap nenebuhu ulug tem toho Allah fam wenggel haruk latfag. Saran ahun Abraham ele holtuk lit nikni uruk latfag hag toho it arimanowen enehunsi enele holtuk latfag. Hiren henehunsi unubam fano ane turuk lit pet nenebusa ulug henekol ha fug angge wereg halug Sara indam welatfahon aholani hag toho hit welahep.
6(3:5)
7Hit ap hiyap oho lahebon nori, hinindimu fuki roho wenggel haruk lit hunuhesi men fano roho welamuhup. Hiyap uwag ine eleg ulug wenggel haruk lit hit it onori hag toho welamuhup. Hiren sembahyang urukon siyahap tuhup tohon hiyap oho mondabi fano welamuhup ulug Allahn sali imbibahon honoluk toho welamuhup.
8Nori, hit obog toho hunubam nele imin: Hinindi misig henebe misig wereg lit honori hinindi enesug lamuhup. Henewelwel tubat ta fug angge ap hinindi enesug lamuhup.
9Siyag ane aben hunubam turuk isalug hebeloho ayeg wabuhup fug. Pet heneptuk halug hebeloho per enebuk fug angge hi eneptuk lamuhup. Allahn hit An numaliki welahebon hi henebuhuk ulug wol heneptisiyon honoluk toho welamok.
10"An noluk wereg lit nahiyeg toho welaruhuk perukon inowen siyag ane nele si imin fug ulug inggareg ambilikmu sap teg laruhu.
11Ap inowen siyag ane hik isahureg fano ane eneg timin peruk lit nori men mangno roho welamuhuk ulug yami ruruk laruhu.
12Fano ane turuk inap Ninikni Allahn yer enesug lit weregma Ubam heng turukon fahet Isanggo leho feruk. Siyag ane turuk inap fahet Allahn nirim peruk lit Anduhun yig isaruk," ulug hahareg lit wereg.
13Hiren henesukun fano roho wereg lit fano ane eneg turuk lamuhup halug ap san hunubam siyag ane tuk teg?
14Hiren pikir ane turuk lamuhubon fahet hunusuruk halug henehiyeg toho welamuhup. Iren hit henekolap heneptuk halug hiren it unubahet yuk lagmag ulug henekol toho welamuhup fug.
15Kristus Nonowe ulug hinindimu sehet toho fet talug lamuhup. Likiya hupmu wene fahet eneg wenggel haruk lit ninirim puk fug angge weregma aben hinog-og hisarukmu hebeloho fag toho hiyag isaruk lamuhup. Hiyag isaruk lit Ninikniyen fanowap nenebuhu peruk lahe ulug henele fano roho unubam uruk lamuhup.
16Hit hinindi wirik toho wereg lit henele fano roho hiyag isaruk lamuhupmu iren Kristus umalikisi siyag ane turuk ulug henebug uruk inap arimano ininggali amuhup.
17Fano ane tuhubon fahet hunusuruk halug Allahn perisiyon fam nunusehesa ulug hinindimuwen fano puhup. Siyag ane tuhubon fahet hunusuruk halug nininggarehen siyag ane tehema nunusehesa peruk lamuhup.
18Niren hundig-hundig siyag ane turuk laheyon fahet Kristus misihim ware fisibag. Aren Allah ambeg hondog nenebuhuwen At pikir ane turukon ino nit hare ane turuk ninap fahet war atfag. At ino ap kinangmon atfagma ware fisibagma Allah hime fanowon inowen Olukap tibag.
19Olukap turuk lit Ineyap tibagma ap indam welatfahon enehime pug toho wereg ambeg wene hiyag isibag.
20Hiyag isibahon arimanowen indam hun Nuh inowen kou humon ino wituk lit weregma Allahn nele holuhup ulug Indi hondo reberuk latfag angge famen Ele holfag fug. Ele holfag fugmu ik humon yenggeltukmu ap tor angge likinen itano eneg koloweg wilip atfag.
21Ik humon yenggelfahon ino ap ikma pilap eneptukmu fanowap eneptuk ahik hag toho wirimangge yenggel atfag. Ikma pilap eneptuk ane ari sabelep nenebene werehon umatuk lahe fug, ninindi keron fanowon Allahn og nisawag ulug heng turuk lahe. Heng turuk laheyon ari Yesus Kristus Allahn Olukap tibagma At oluk wereg ulug heng turuk lahe.
22At ino poholma lahibareg malaikat men poholma ine roho werehon men arimano apma weregma At palimu Allah inggik pikit fil heriyeg lit wereg.