Alkitab Mobile SABDA
[VER] : [YALI]     [PL]  [PB] 
 <<  2 Timotius 2 >> 

1Namloho, Yesus Kristus men mangno roho welahenma Indi hasug lit werehen hine roho unduhuk laruhun.

2Ap anggolowen hol niyaruk lit weregma anden hiyag hitikikmu holtikin ane haren ap fano holuk teg peruk lahenon eneg hiyag isaruk laruhun. Ap winon fano roho hiyag isa reg peruk lahenon eneg milal eneptuk laruhun.

3Sehen seneg ahunen ambong se roho laruk hag toho haren Yesus Kristus ombolim laruk lit sat haruk laruhun.

4Sehen seneg ahun ap seliyon yami eneptuk lit nanggengge lin isahukon ari siyag puk fug angge sehen seneg inap onowesiyen fano pukag ulug yami eneptuk.

5Aben onggo og nisalusa ulug hali watuk lit alem hal eneptuk ahun inowen hili emberukon pisan isa fug angge hali watuk ahun ino onggo og um teg.

6Ap eke yabuk inggik ine roho wit taruk ahunen suburu atamon yahal talug na reg.

7Anden hiyag hutuk lahiyon aru hindi wenggel haruk lamin. Wenggel haruk lit weregman obog toho ihi ane fahet Nonoweyen hindi anggarap haptuk laruhu.

8Yesus Kristus ino Dauren ondohowonen endetfagma ap warehon wereg ambehen Oluk atfahon ari fahet anden hiyag isaruk lahi ane hat hindimu holuk toho welaruhun.

9Wene fanowon aru fahet sat toho turuk latikik ane fahet siyag ane turuk inap unusuruk hag toho ninggik hele wat naptusa. Wat naptusa angge famen Allah wene aru hele wabuk fug teg.

10Allahn mumal eneptisi inap arimano fahet nindi hondo reberuk lit sat toho turuk lahi. Ir oho Yesus Kristus inowen fanowap enebuhumu mondabi fanoma welamuhuben turuk lahi.

11"Nit At men war atukuk halug nin nit oho At men nonoluk amuhuk.

12Ninindi wirik toho welamuhuk halug nit oho At men palimu amuhuk. Niren At fahet awiya waruk halug Aren nit faher oho awiya wahu.

13Nit ninindi wirik teg eleg halug At ino Indi wirik toho welaruhu, Inggarehen turuk ane fahet Aren awiya wa fug teg." Anden hiyag hisaruk lahiyon aru tem ane hiyag hisaruk lahi.

14Hit Allah alukema palu roho wereg lit anden hiyag hutuk lahi ane obog toho haren hiyag isaruk lit komo eneptuk laruhun. Alem haleg elehon fahet enele sahal-sahal uruk lit ap fano holtul peruk inap arimano inindi nonghong isaruken ari tuk fug ulug komo eneptuk laruhun.

15Allah amingmingangge wereg lit Allahn hat fahet fano puhuwen yami ruruk laruhun. Wene fanowon tem toho urukon ari haren seleg toho hiyag isaruk lit hinggali eleg toho welaruhun.

16Enele sibiling-sibiling ane uruk lit alem fano reg elehon urukmu holmin fug ulug iniraham welam fug. Enele ari roho urukon ariyen Allah wene embeserukon su atuk.

17It arimano enele urukon ari salukangge hag toho su aruhu. It ari roho urukon sehelimu hun Himeneus men Filetus men wereg.

18It itanowen tem ane embeseruk lit un ane eneg uruk latusa. Un ane uruk lit ap war atukon onoluk amuhup ulug hiyag isaruk ane fahet nit mondabi nonoluk atukuk uruk lit ap anggolo inindi fano wenggel ha reg angge famen inindi ninap eneptuk.

19Allahn helep ubule yuk tuk fug tohon kinangma yaho ferisi. Helep ino fam hahare feruk lit, "Ap At ngi amuhubon Nonowe Yesus oluk teg," ulug hahatuk lit, "Nonowe Yesus unuk uruk inaben siyag ane umbusukag," ulug enehangge hahare ferisi.

20O suwon undama kou ili faya rurukon men umbagpag turukon men eneg wereg eleg, e fam laltukon men kinang fam laltukon men oho wereg. Atamon arimano eneluke fil wereg, fobikon arimano enembol fil wereg.

21Ap sa siyag ane indimu het toho werehon ari ho roho embeseruk halug at ino kou aluke fil wereg hag toho welaruhu. O ngi ahun inowen kou ino fanowap turuk lit fano angge kilabe feruk lit fano angge esetukon ulug wep toho emberuk. Ap ubabut ari hag toho werehonen mun ane man ane fanowon eneg tuk hag teg laruhu.

22Ap kabiniyonen tila peruk ane hambolma embeseruk lit pikir ane turukon men hindi tem toho Allah fam wenggel harukon men ap hindi enesug lit mangno roho werehon men mutug laruk laruhun. Inindimu hiraho ferukon eleg angge Nonowe wel turuk inap men mangno roho welaruhun.

23Alem haleg elehon ket-ker ane fahet sahaltuk lit umung hiyaruk halug it enele holuk fug angge wereg lit suwahal ul eneg perukon ari hat holuk.

24Nonowe Yesus amingmingangge werehonen onori men suwahal uruk lit hili roho welam fug angge ap obog toho unubam fano ane uruk lit welaruhu. At inowen ori fam seleg toho milal enebuk teg lit indi imbik wambuk hag teg lit welaruhu.

25Suwahal uruk lit enele palimu roho uruk inap ele fano roho komo eneptuk laruhu. It arimano ke hareyon embeselug ke pikiron lawag ulug Allahn inindi anggarap enebuk teg.

26Anggarap eneptuk halug eneg Iblis inowen anden peruk ane hikit toho turuk lamuhup ulug yep teg ambeg kuruson arimano hele lol isalug wilip amuhupteg inindi anggar aruhu.


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel