Dual Panel1Ap sa fobik fanowap nabuhu ulug tem toho peruk ahun ino indimu Allah fam wenggel haruk lit wereg. Ap san ilen yet haruk eleg angge famen indi yuwag toho wereg ahun ino indimu Allah fam wenggel haruk lit wereg.
2Ninikni umban ari hag toho Allah fam wenggel haruk latfagma Allahn it fahet fano pibag ane inam atfag.
3Allah eleyen pohol men kinang men wal turukmu mun angge man angge yet haruk laheyon ino yet haruk lahe fuhon fam atfahon ino fahet ninindimu Allah fam wenggel haruk lit nonoluk atuk.
4Habel inowen indimu Allah fam wenggel haruk lit Allah fahet emberuk angge hubu lahapfahon ino palimu regman hun Kainen hubu lahapfahon ino apma reg latfag. Allah fam wenggel haruk latfag ane ariyen aren emberuk angge fahet Allahn fano peruk lit indi pikiron wereg peruk latfag. Indi wenggel haruk latfag ane ariyen war atfag angge famen ketiya oho ele uruk.
5Henokh inowen indimu Allah fam wenggel haruk latfagma poholma lisoho wibag. War atuk ane at ubam aruhu fug ulug Allahn poholma lisoho wibagma ap inilen oho yet hibag fug. At poholma uwan lahuk fugmu Allahn at fahet Indi reg ane inam atfag.
6Allah fam wenggel haruk eleg ahun ino fahet Allahn nindi reg lahi puk fug teg. Ap san Allah men ambiyeg welaruhuk peruk ahun inowen Allah tem toho wereg ulug At yami rurukon onggo og isahu ulug tem toho indimu peruk laruhu.
7Nuh inowen indimu Allah fam wenggel haruk lit werehen uwan yet ha fug angge fahet Allahn hiyag itfagma Ele holfareg kou witfag. Nuhe malik men nonoluk welamuhuk ane fahet Allahn hiyag nitisi ulug kou witfag. Allah fam wenggel haruk lit ap kinangmon unubam alem imbibareg at Allah fam indi wenggel haruk ane hikit toho fano atuk ane at ngi atfag.
8Abraham inowen indimu Allah fam wenggel haruk lit werehen Allahn hat hibam ngi aruhun ambeg Anden hiyag hitminon fam lamihin ulug wol tibagma fano ulug Allah ele holfag. Holfareg lahuk ambeg ari kema lahuk ulug indimu apeleg toho laruk latfag.
9Allah fam indimu wenggel haruk lit o hat ngi aruhun ulug hiyag itfag ambeg ino libareg ap pohon hag toho welatfag. Pohon hag toho wereg lit Ishak men Yakub men o sabo wit tibareg welatfag. Allahn Abraham fam sali imbibahon ino Ishak men Yakub men ir oho ngi amuhup ulug imbibag.
10O pumbuk e uwag ineyon fam wirihon ino Allahn wiruhuk pibareg Ele ibahon ino hag toho we tem toho wiruhu ulug Abrahamen mangno ruruk latfag.
11Sara inowen indimu Allah fam wenggel haruk lit sabal atfag angge famen Allahn ineyap turukmu malik fet talug latfag. Malik indag tahun ulug hiyag itfahon ino fahet tem toho hiyag nutuk peruk latfag.
12Abraham ino mondabi sabal atfareg malik endebuk fug teg latfag angge famen at famen ap anggolo ondoko libagma winag ha fug toho suhal men ik yinggi men mondeg hag toho welatfag.
13It obog toho arimano inindimu Allah fam wenggel haruk lit werehen og hisahuk ibahon ino ininggikmu am fugmu war atfag. Nit kinangma tuma ap pohon nenemu ninap hag toho welahe ulug fag toho ibareg we yatman yet haruk lit ininggik fam kaya roho hi ribag.
14It ari roho perukon arimanowen enele uruk lit nit ninibam yug toho welamuhuk ambeg asengseng toho yami ruruk lahe ulug fag toho uruk.
15It inibam embeselug watfag ambeg ino fahet enele elepma suhuloho inibam la hag teg lalep.
16Nit ninibam yug toho welamuhuk ambeg yami ruruk laheyon urukon ari o mondabi fanowon poholma werehon fahet wenggel haruk. Aren o pumbuk fanowon it fahet wiroho foroho lit it Inikni Allah wereg uruk ane fahet Allah inggali ha fug teg.
17Abrahamen Allah fam indimu wenggel haruk lit werehen at indi wal hibag sambil ino Ishak esetmin pibag. Allahn ele sali emberuk lit, "Ishaken ondohowon arimano Abraham umalikisi suwal enebuhup," ulug hiyag itfag angge famen amloho we misig enehangge ino esetmin pibag.
18(11:17)
19Allah inggik ineyon inowen ap warehon onolukap eneptukon At wereg pibag. Ap warehon onoluk amuhup hag toho Ishak ino hebeloho oluk angge inggikmu atfag.
20Ishak inowen indimu Allah fam wenggel haruk lit fobik aruhu ane yet haruk lit umalikisi Yakub men Esau men Allah unuk fam hi enepfag.
21Yakub inowen indimu Allah fam wenggel haruk lit war atukon horog tehen Yusuf amlohoki piren Allah unuk fam hi enepfareg wanggun tomuk fam unggul timi reg lit sembahyang ibag.
22Yusuf ino indimu Allah fam wenggel haruk lit war atuk ane horog tehen Israel inap o Mesiren embeselug wilip atuk lit an nuwag walug lahup ulug hiyag isibag.
23Musa ikni men isinga men inindimuwen Allah fam wenggel haruk lit malik Musa fanowon aru indag tehe ulug ap suwon inowen ibag ane fahet enekol eleg toho pikalem hinahan fam hirako foroho latfag.
24Musa ino su atfareg indimu Allah fam wenggel haruk lit Firaun ahalohowen amlohowap nabuhu ane ari an nirim pibag.
25Allah umalikisi enele ying eneptuk hag toho an oho fano nele ying nabukag peruk lit siyag ane ilamna werehon fahet nahiyehap turuk ane nirim pibag.
26Kristus waruhu ibahon fahet inggaliyap turuk ane ari an nanggengge fano-fano angge hag toho palimu regma o Mesir fam fano-fano angge werehon obog toho apma reg pibag. Ari peruk lit onggo suwon ino yet teg latfag.
27Musa inowen indimu Allah fam wenggel haruk lit ap suwonen olok harukon fahet akol eleg toho o Mesir embeselug wilip atfag. At ino indi yuwag toho wereg lit yet ha fug tohon ino yet haruk latfag.
28At ino indimu Allah fam wenggel haruk lit malik wandabon unusibag ahun inowen it umbusukag ulug wam Paskah esetuk lit mep ino sok fene lahapfag.
29Israel inap inindimu Allah fam wenggel haruk lit kinang lilog teg ke laruk hag toho ik il huluwon ino paloho fuma nindig atfagma Mesir inap it lahasa hag toho lul ulug turukmu ik ahummu ubuk uruk lit waroho lin ibag.
30Israel inaben inindimu Allah fam wenggel haruk lit o Yerikho elehet walinggoho kilabohon ino hup sabirenam walinggoho larukmu halog toho lin ibag.
31Rahab yaying turuk latfag hiyap ino indimu Allah fam wenggel haruk lit aluwar eneptuk inap ibam fano hondoko kilap enepfagma sohu-sohu ane turuk inap obog toho unusibagma hiyap ino oluk welatfag.
32Anden nungge ane eke imin? Gideon men Barak men Simson men Yefta men Daud men Samuel men atam wene hiyag isaruk latfag inap nabi men arimano fahet tindiloho hiyag isarukmen o hup am teg.
33It arimano inindimu Allah fam wenggel haruk latfareg o pumbuk winon-winon pin unusuruk latfag, alem eke hag eke hag fano roho haltuk latfag, og hisahuk ulug sali imbibahon arimano ininggikmu atuk latfag, olomene onolokon enembilik latuk latfag,
34indok ambulpul turukon ware feseruk latfag. It winon karog olokon fam unusirikim fano wilip atuk latfag. It winon wiyig toho werehon arimano inine atuk latfag. It winon tog aptukmu onolok atuk lit seliyon asan-asan angge luhaloho kurukon arimano yanggal eneptuk latfag.
35Enehunsi unumalikisi war atukon arimano onolukap eneplug suhuloho unuhesi inisingasi og isaruk latfag. Ap winonen fobik mondabi nonolukap nenebuhu peruk lit nunusukag ulug enembol yig isaruk lit windat nenebuk fug uruk latfag.
36It winon ininggaliyap eneptuk lit e paleg fam unusuruk latfareg ininggik hele waroho penjara fam kilap eneptuk latfag.
37It winon helep fam kog toho unusuruk latfag. It winon arimano sohobol eneptuk latfag. It winon arimano oho e paltuk angge men karog men fam kong eneptuk lit pinggi unusuruk latfag. It winon arimano wam domba oruk men kambing oruk men wan teg lit suburu oboken enehummu siyag toho wereg lit siyahon anggolo unubam atuk latfag.
38It unubabut fanowon arimano kinang siyahon aru fam welalep fug. Ari rehen it arimano fare keyen punumu laharuk lit kiling elma keheg owikmu keheg mase ril laruk lit tung-tung angge turuk latfag.
39It arimano obog toho Allahn og hisahuk ibahon ininggikmu atfag fug angge famen inindimu Allah fam wenggel haruk latfagma Allahn it fahet fano pibag ane inam atfag.
40Nit elegma it enemu eneg mondabi fanowap enebuhuk fug ulug Allahn nit obog toho fahet mondabi fanowon wep toho imbibag.