Alkitab Mobile SABDA
[VER] : [YALI]     [PL]  [PB] 
 <<  Kolose 1 >> 

1Yesus Kristus inowen an Paulus nubam yonggo laruk laruhun ulug Allahn tam perisiyon hikit toho hiyag nitisimu nenere Timotius men mangno roho wereg lit suwesingga tu emberuk lahe.

2Nonori, hit Kristus ubam tem toho wenggel haruk lit At fahet Nonowe peruk lit o Kolose welahebon hunubahet suwesingga tu emberuk lahe. Ninikni Allah ubabut fanowon inowen hinindi yuwahap heneptuk laruhu ulug sembahyang uruk lahe.

3Niren hit hunubahet sembahyang uruk lit Nonowe Yesus Kristus Ikni Allah ubam hundig-hundig Ninikni uruk lahe.

4Hit Yesus Kristus ubam wenggel haruk lit wene holtuk inap fahet hinindi enesug lahepma niren holtukukteg Allah fam Ninikni uruk lahe.

5Fano angge Allahn andog toho poholma hit fahet foroho lit werehon ino wene fanowon tam hiyag hisarusama tem toho og nisahu perikip.

6Wene fanowon ino o pumbuk kema-kema su atisireg anggen fanowon yihik ferisi. Wene ari henembeg waharisimu hiren holtikipteg Allahn tem toho Indi henesuhon fahet honoluk atisi. Honoluk atisi sambilen ak turuk lit wene ari hit sehelimuwen oho su atuk lit anggen fanowon yihik ferisi.

7Nonowe Kristus inowen nit nenere ninindi reg laheyon Epafras ino hit wene hiyag hisawag ulug mingming tirisimu hiyag hisarisimu ihiyon ari obog toho hit honoluk atisi.

8At inowen ir oho Allah hime fanowon Apma wereg lit it-it inindi roho wereg ulug nit nunubam hiyag nisa waharisi.

9Hiyag nisa waharisimu holtukukteg likiya hupmu hit fahet nenepeleg am fug angge sembahyang uruk latukuk. Ninikni Allahn peruk ane fuki roho honoluk aruhumu mun ane man ane fahet hinindi anggar aruhuwen Ahime fanowon fam selehap tukag ulug niren Allah fam heng turuk lahe.

10Hiren turuk lahep ane obog toho fahet Aren fano puhuwen At olohotma Umalikisi fanowon welamuhup. Allahn perukon fam wenggel haruk lamuhup ane ariyen fituk lit yabuk fano roho wiri feruk lit anggen fanowon yihik feruk lamuhup.

11Mun ane man ane alem hunubam atukmu hinindi imbik wamburuk lit welamuhuben Allah ine fanowon inowen hinineyap heneptuk laruhu.

12Allahn fano angge Umalikisi seleg tegma wereg inap og isahuk perisiyon ino hit faher oho fano og isahuk peruken henehiyeg toho wereg lit Ninikni ulug Allah wel turuk lamuhup.

13Nit hik tegma wereg lit siyahon apma welatukukmu Aren windat neneptuk lit Amloho indiyon wereg ambeg seleg tegma hondoko nunumbaharisi.

14Siyag ane niren turuk latukukon Aren ambolmayap tirisimu At min mangno roho wereg lit nit nininggik hele lolehon hag toho welahe.

15Allah ino aben yet ha fug teg lit weregma Yesus ino pingganet hag toho wereg. At Kristus ino wandabon weregma mun angge man angge wal tibahon arimano ilabowon hag toho wereg.

16At unuk palimu weregma mun angge man angge poholma werehon kinangma werehon men yet ha rehon yet ha fug tohon men At apma welamuhup ulug wal tibag. Lehoma ap suwon hur atuk ambeg men o pumbuk ap suwonen sen enesug ambeg men kinangma inine roho werehon aben yet harukon men yet ha fug tohon men arimano At ngi roho welaruhu ulug Kristus unuk fam wal tibag.

17Mun angge man angge uwan wal tuk fugmu we At eneg tam welatfag. At weregma eneg mun angge man angge welam teg.

18Allah wene holtuk inap Inggik Uyug weregma At unggul wereg. Alem te At wereg. Ap war atuk ambehen At wandabon Oluk atfareg mun angge man angge alem Aren seneg lit wereg.

19Allahn alemet ondomiyet abir angge senehon arimano Kristus ubam atfag.

20Kristus ubam atfagma mun angge man angge seli roho werehon arimano mangnowap enepfag. Teltuk ahen fam Kristus amep wilip atfahon inowen poholma werehon kinangma werehon obog toho mangnowap enepfag.

21Allah henepelehen indam hiren oho siyag ane turuk latikibon ariyen Allah men hinindi fam seli roho welatikip.

22Welatikip angge famen ketiya Kristus ebe kinangma war atfag ane ariyen Allah min mangno atikip. Mangno atikipmu hit fano wereg lit hunubam usanduk singon tag teg eleg angge welamuhupmu At alukema unduhuk hunubahaku.

23Ari roho unduhuk hunubahakuwen mulilik la mulilik wam tuk fug angge pikit toho unduhuk lit At ubam wenggel haruk ane hinine roho senetuk lit wene hit fanowap henebuhuwon ino fahet ninirim puk fug angge welamuhup. An Paulus oho wene fanowon aru amingmingangge atikikteg hiyag hisarukmu hiren oho fano holtikip. Ap obog toho kinang atogman atogma werehon wene ari hiyag isarusa.

24Hit fahet an siyahap naptukmu ketiya nahiyeg toho welahi, Kristus ebe siyahap turuk lit tot minggiroho emberuson ino ketiya an nubam atuk. An siyahap naptuk ane aru Kristus inggik uyug Allah umalikisi werehon unubahet nubam atuk.

25Allahn an nubahet yabuk wibuk teg perisireg hiyag nutuk lit An nawene eke umbusuk fug angge ap hiyag isaruk laruhun ulug unduhuk nubaharisimu Allah umalikisi enemingmingangge atikik.

26Nunumbasi indam welatfahon men ketiya welatuson men inil fam hiraho lit welatisi angge famen ketiya Awene holtuk inap fahet inamap tirisi.

27Allahn inamap turuk lit atam hiraho latisiyon fano anggolowon ino ap o pumbuk obog toho fahet og isahuk perisi. Hir oho og hisahuk perisiyon ino Kristus hit sehelimu weregma Aren mondabi fanowap nenebuhu peruk lit mangno ruruk lamuhuk.

28Yesus wene ino fahet hiyag isaruk lit ap obog toho enebe wal taneg komo eneptuk lit nit ninindi anggat teg lahe ulug ap obog toho milal eneptuk lahe. Kristus fahet inindi fano roho wereg lamuhup ulug ap obog toho enebe wal taneg fer enesug lit hiyag isaruk lahe.

29Allahn ine og nitisiyon hikit toho ari fahet lisag toho yami ruruk lahi.


  Share Facebook  |  Share Twitter

 <<  Kolose 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel