Dual Panel1Hit men ap o Laodikia werehon men it winon an nebe niyarusa fuhon men unubahet yabuk sat toho wituk lahiyon tu honoluk aruhu peruk lahi.
2It arimano aru fahet onoluk amuhupteg inindi enehiyeg toho wereg lit it-it mangno roho wereg lit enebe misig toho wereg lamuhup. Allahn Kristus hirako foroho latfahon ino onoluk amuhupmu inindi seleg anggolo roho welamuhup.
3Mun ane man ane alem onoluk atukmu fuki roho wenggel harukon ari Kristus fam fano angge hiraho lit weregma At famen eneg onoluk amuhup.
4Anden alem tu uruk lahiyon ap winonen enele inilaheg toho uruk lit hinindi ninap henebuhup tohon ulug hiyag hisaruk lahi.
5An nebe hit sehelimu welam fug teg angge famen nindimuwen hit min mangno roho welahiyon inowen Kristus ubam hinindi wirik toho wenggel haruk lit hunubabut fano roho weregma yet hisaruk lit nahiyeg toho welahi.
6Hiren Yesus Kristus nit Nonowe ulug senetikibon ari famen At apma wereg lit Aren fanowon tu perukon hikit toho turuk lamuhup.
7Kristus ino kinang ineyon weregma hit hunumanggen At ubam yaho feruk lamuhup. Hit henebe o hag toho At ubam wiroho welamuhupteg wene fanowon tam hiyag hisaruson hinine roho senetuk lit Allah Ninikni uruk lit wel turuk lamuhup.
8Enele sibiling-sibiling ane uruk lit un ane hiyag hisahup tohon hinindimu honoluk toho wereg lit kahal enesug lamuhup. It indam welatfag inap arimanowen turuk latfahon hiyag isaruk lit Kristus fanowon inowen peruk ane senebuk fug angge kinang seneg lahe perukon arimano enepma wereg.
9Allahn alemet ondomiyet abir angge senehon arimano Kristus ap kinangmon atfagma At ubam imbibag.
10Ari hag toho hit hinindimu kolo reg latisi angge famen Kristus fam wirim atisi. Kinangma inine roho werehon aben yet harukon men yet ha fug tohon men arimano obog toho Aren eneg seneg lit wereg.
11Ap enembilahap paleg inap hag toho hit welahep fug angge famen Kristus ubam wereg lit henembilahap paleg hinap hag toho welahep. Hiren tam siyag ane turuk latikibon nonggoloho henembol fil embeseruk lahepma Kristus unuk fam henembilahap palehon hag toho welahep.
12Kristus kinangma salfahon ari hag toho hir oho ikma pilap heneptusa. Allah ineyon inowen ap war atuk ambehen Kristus olukap tibagma hir oho At ubam wenggel haruk latikipmu At min mangno roho honoluk atikip.
13Indam hir oho siyag ane turuk lit henembilahap paleg eleg inap wereg lit warehon hag toho welatikip angge famen Allahn Kristus men mangno roho honolukap heneptisi. Honolukap heneptisimu niren hare ane turuk latukukon fahet undama ahe laharisiyon ino hondo rebeserisi.
14Musa wene fam ari tuk fug ulug haharoho imbibag ane ariyen alem nunubam atfag. Alem nunubam atfagma niren paleg angge reg lit welatuk uwahon suwesingga fam haharoho werehon Aren ari elehap tibag. Paleg angge suwesingga fam haharoho werehon elehap tibahon ino Kristus men mangno roho e fam telfagma eleg atfag.
15Kinangma inine werehon aben yet harukon men yet ha fug tohon arimano sehen it ininggikmu werehon taluk toho hilaruk lit aben fog eneptuk lit ininggaliyap enebukag ulug inamma in enepfag. Inine roho turuk latfahon arimano Kristus inowen apmayap enepfagma Allah unuk palimu atfag.
16Ik suburu usa urukon men o usayap turuk sambil men pikalem keron inam atuk sambil men hup winaharuk lit sabit welahe urukon men alem ihiyon ari fahet umbusuhupmu unggum hunubam kuhu fug.
17Fobik aruhu ane ari Kristus ebe weregma mun angge man angge ihiyon ari ahuhe hag toho wereg.
18Onggo fanowon hit hininggikmu werehon ari ap winonen taluk henebuhup fug. It arimanowen ap onolohotman ininggareg apmayap taruk lit malaikat fahet ninikni uruk. Ninikni uruk inap arimanowen nei fulu roho waruk ninap uruk lit kinangmon fahet eneg wenggel haruk lit ininggareg suwap taruk.
19It ari roho turuk inap arimano Kristus ebe min mangno roho wereg eleg. Ebe ino Unggul palimu weregma Inggik Uyug umanggenen ahandip tegma uwag ine roho wereg lit Allahn peruk ane hikit toho fituk lamuhup.
20Kinang seneg lahe perukon arimanowen hit sen heneptusama Kristus men mangno roho war atuk lit ho roho embeserikip angge famen nin nungge fahet usa alem eke hag eke hag ap kinangmonen turuk hag toho turuk lahep?
21Iren usa urukon te, "Tu senebuk fug, ari na fug, hininggik tum fam tung ha fug," uruk.
22Iren uruk ane ari obog toho ap ininggikmu atukmu mondabi eleg aruhuwon fahet usa uruk lit ap kinangmonen wenggeltuk ane eneg turuk.
23Mun ane man ane alem nonoluk ninap hag toho welahe peruk lit ininggareg enemuwen Yesus peruk elehon fam sembahyang milal taruk. Ininggarehen apmayap taruk lit siyahap taruk angge famen aben yet nisalug fano pukag ulug kinangmonen peruk ane siyag ane eneg turuk.