Alkitab Mobile SABDA
[VER] : [YALI]     [PL]  [PB] 
 <<  Wahyu 5 >> 

1Anden yet harukmen hur atuk angge fam heriyeg lit werehon ino Inggik pikit fil suwesingga eke undama filet sel filet haharehon yinggiloho weregma enehangge sabiren fam seleben tegma ki reg latisi.

2Ki regma anden yet harukmen malaikat humon misihen ele hi roho uruk lit, "Suwesingga yinggilohon enehangge seleben tohon aru ap san filila ruk teg?" urukmu holtikik.

3Hol harukmen ap poholma werehon oho kinangma werehon oho kinang apma werehon misihen oho suwesingga yinggiloho werehon ari filila roho undama kim ha fug teg latisi.

4Ap misig oho ubabut fanowon welatisi fugmu suwesingga yinggiloho werehon ino fam undama filet sel filet haharehon aben filila roho kim ha fug teg latisimu an nindimu siyag teg lit uba anggolo yatikik.

5Uba yatukmu iniknisi roho welatuson arimano misihen an hiyag nutuk lit, "Hat uba yabuk fug, ununggul unuk Yehuda enemene olokon Daud ubalmangge ino palimu atisi. Palimu atisireg At inowen suwesingga yinggilohon fam enehangge sabiren itano Aren filila ruk teg," ulug nubam irisi.

6Yet harukmen hur atuk angge men lebe ruruk angge uhan welatuson itano men iniknisi rohon arimano men it sehelimu wam domba umalik misig senggelehon hahon welatisi. Andimbuk sabiren il sabiren teg latisi. Sabiren angge ari Allah hime fanowon kinang atogman atogma mon eneptukon wilibig latisi.

7Ari regma wam domba umalik ino waharisimu hur atuk angge fam heriyeg Ahun inowen suwesingga yinggiloho werehon ino og Itisimu ki ririsi.

8Suwesingga ino ki regma lebe ruruk angge uhan welatuson itano men iniknisi rohon uhaneg fumahen welatuson arimano men domba alukema ying arik larusa. Ying atuk lit wal taneg pinggong men kubag ili rurukon fam indok munggaltukmu amben turukon fanowon men seneg latusa. Kubag ino fam indok munggaltuk angge ari Allah umalikisiyen sembahyang urukon fahet wereg latisi.

9It yinggig latuson arimanowen sini keron misig yunggultuk latusa. Yunggultuk lit, "Hat hubabut fanowon inowen suwesingga yinggilohon ino og Herehekma wehenteg enehangge itano filila ruk teg lahen. Ap ununggul unuk wal taneg werehon men enele wal taneg urukon men o pumbuk wal taneg werehon men inibam wal taneg werehon men arimano fahet Hat senggel Haptukmu Hamep wilip atisiyon ari fam Allah fahet ayeg war isarikin.

10Ap arimano ayeg war isarikinon o yowi misigmu mangnowap eneptuk lit Allah amingmingangge imam hag toho welamuhup ulug lahap eneptikinmu iren ap kinangma werehon sen enesug lamuhup," uruk latusa.

11Yet harukmen hur atuk angge men lebe ruruk angge uhan men iniknisi rohon men malaikaren waling enesug lit enele anggolo urukmu hol isarikik. Malaikat arimano anggolo teng-teng angge winahuk fug toho wereg lit

12enele ine roho uruk lit, "Wam domba umalik senggelohon ino Ubabut fano rehen Ineyap turuk lit Anggengge anggolowap turukon men mun angge man angge alem Olukap turuk lit suwap turukon men wel turuk lit palimuwap turukon men At fene sini uruk lamuhup," uruk latusa.

13Sini ari urukmu hol harukmen wal tibag angge poholma werehon kinangma werehon kinang apma werehon ikma werehon obog toho arimanowen enele urukmu holtikik. Enele uruk lit, "Hur atuk angge fam heriyeg lit werehon men domba umalik men Inine roho werehon unubam sini uhupteg wel eneptuk lit mondabi hi eneptuk lamuhup," ulug enele uruk latusa.

14Enele urukmu lebe ruruk angge uhan welatuson itanowen, "Amin!" irikim iniknisi roho welatuson arimanowen enelenggen fam hur atusareg sembahyang uruk latusa.


  Share Facebook  |  Share Twitter

 <<  Wahyu 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel