Alkitab Mobile SABDA
[VER] : [YALI]     [PL]  [PB] 
 <<  Yakobus 1 >> 

1An Yakobus Ninikni Allah men Nonowe Yesus Kristus men enemingmingangge welahiyon inowen hi heneptuk lahi. Ap ununggul unuk nisanggowen arimanowon famen o kema-kema ap eneseheli ke linggik-longgo reg lit welahebon fahet suwesingga aru emberuk lahi.

2Nori, wal hisaruk ane alem eke hag eke hag hunubam atuk halug fano nunubam atuk peruk lamuhup.

3Allah fam tem toho wenggel haruk ano ulug aluwat hisaruk lit wal hisaruk ane ariyen hinindi wirik aruhu ane ari fahet honoluk.

4Hinindi wirik toho eneg welamuhupmu siyahon tor angge oho hunubam wereg elehen mondabi fano wereg lit anggen fanowon yihik feruk lamuhup.

5Ap misig hit sehelimu wereg halug mun ane man ane alem onoluk atuk ane apeleg toho wereg halug at inowen Allah fam heng turuk laruhu. Heng turuk laruhumu alem oluk atuk ane hiyag utuk laruhu. Allah inowen ap obog toho Indi isaruk lit Indi wiyig toho wereg lit Inggik ahako roho og isaruk.

6Allah fam heng turuk lit indi nonghong uk fug angge indi misig toho wereg lit heng turuk laruhu. Indi nonghong toho wereg ahun ino siyeluwen ik ahummu fu rurukmu kililik la kililik wam turuk hag toho wereg.

7Ap ari hag toho werehonen Allah fam heng uruk angge tor angge oho og nuruhu puk fug.

8Ap indi piren toho wenggel haruk lit werehon ino indi nonghong uruk lit eneg wereg.

9Ap misig wene fam wenggel haruk lit anggengge eleg angge wereg halug Allah olohotma palimu roho werehen ahiyeg toho welaruhu.

10Ap misig anggengge anggolo wereg halug Allah olohotma apma roho welahi peruk laruhu. At ino e owil loloho wamburukon hag toho welaruhu.

11Mo lahik waharuk lit mo oloken e inggila halo ulug owil loloho wamburuk lit orohole fanowon ino siyag aruhu. Ap anggengge anggolo werehon ino oho ari roho tuhu. Nanggengge anggolo welalep peruk ane ino obog toho teko la fugmu at ino siyag aruhu.

12Ap misig siyahonen wal harukmu indi wirik toho welaruhuwon ino ahiyeg toho welamag. At ino indi wirik toho welaruhumu Allahn aliliyangge mondabi fano welaruhuwon og uruhu. Ap sa-o sa-o An inindi Nasug lamuhubon fahet og isahuk ulug Allahn sali imbibag.

13Siyahonen ap misig wal haruk halug ap inowen, "Allahn wal niyaruk," uhu fug. Siyahonen Allah wal haruk eleg hag toho Allah inggarehen oho ap wal isaruk eleg.

14Inggareg undaman timin peruk ane inowen heg toho wol turuken wal haruk.

15Inggareg undaman timin peruk ane inowen hiyap malik ahummu atuk hag toho ahummu atukmu siyag ane endetuk. Siyag ane ino mondabi wirik atuk halug war atuk ane ondoko laruk.

16Anden nindi henesug lahiyon nori, aben enele si uruk ane fahet tem toho uruk puk fug.

17Fanowon og nisarukon men nininggikmu fano angge emberukon men Ninikni Allah seleg fanowon wal tibahon inowen poholman pilabik waharuk. Allah wereg ambeg mo kun atuk ane men seleg atuk ane men tuk fug angge orohole nin atuk eleg.

18Inggareg indimu wenggel hibareg wal tibag angge arimano obog toho palimu malik wandabon hag toho welamag ulug tem ane uruk lit wal nenepfag.

19Anden nindi henesug lahiyon nori, alem tu fahet wenggel haruk lamek. Hinisanggo fam holtuk ane ari folo-folo holtuk lamuhup. Henembilik fam uruk ane ari men ap per enebul ulug hunundama ahe laharuk ane ari men folo-folo ul peruk lamuhup fug.

20Ap per enepmin ulug undama ahe laharuk ane inowen Allah indi fanowap turuk eleg.

21Alem ari fahet sabelep siyahon hunubam werehon obog toho hik isahup. Wene fanowon hinindimu yag atisiyon ari eneg hinindi yuwag toho seneg lamuhup. Wene fanowon ino ine reg lit hit mondabi fanowap henebuk teg.

22Allah ele hinisanggo fam eneg holuk fug angge hininggik fam oho Allahn uruk ane hikit toho turuk lamuhup. Hikit toho turuk lamuhup fug halug hininggarehen hininggareg henele ying taruk lamuhup.

23Allah ele isanggo fam eneg holtuk lit Aren uruk ane hikit toho turuk eleg halug wirimangge ap misihen ik ahum fam orohole kim haruk ahun hag toho wereg.

24Kim haruk angge famen ilanma tot lalug folo-folo orohole apeleg atukon hag toho wereg.

25Allahn komo eneptuk ane ine anggolowen ap ininggik hele lol eneptukon mondabi fano wereg. Ap san Allahn komo eneptuk ane ino nisanggo fam holihi ulug tot welatil laruk lit apeleg am fug toho welaruhu halug at ino ahiyeg toho welaruhu. At inowen Allah ele alem fuki roho yami ruruk lit hikit toho turuk laruhu ane ino fahet inggik fam turuk ane Allahn let turuk laruhu.

26Ap misig wene noluk nahun welahi uruk angge famen inggareg ambilik fam uruk ane fuki roho wenggel haruk elehen at ino inggarehen inggareg ele ying taruk. Ari turuk lit aren sembahyang urukon ino saplangge uruk.

27Aben sembahyang uruk ane fahet Allahn mondabi fano anggolo uruk perukon alem tu: Malik suwarehon men hiyap yuwohon men enenggengge eleg toho weregma kim isaruk lit ler eneptuk ane ari fahet fano peruk. Ap kinangmonen siyag ane turukon anden tihi ha nowen peruk lit kahaleg lit wereg ane ari fahet Allahn oho fano peruk.


  Share Facebook  |  Share Twitter

 <<  Yakobus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel