Dual Panel1Nori, hit welahebon aruma anggolowen wene hiyag isaruk ninap welala puk fug. Nit wene hiyag isaruk ninap alem nunubam werehon Allahn kong tuhu sambil anggin atuk lit nonori winon arimano unubam se aruhu.
2Nit wene hiyag isaruk ninap siyag ane anggolo turuk lahe. Ap san ambilik fam siyag ane uruk elehon at ino mondabi fano. At inowen ebe abir angge fano foroho lam teg.
3Wam kuda funggalem pikit lawag ulug niren ambilikmu kumbi ilili felug atog fumag-fumag seneg lahe.
4Wirimangge eke kou humon ik ahummu larukon yet hemek. Siyelu ine roho fu ruruk lit kou miyaltuk angge famen kou hebeltuk angge toron seneg ahun inowen kou pikit lawag ulug kou ambiyang haluk teg.
5Ari hag toho ap enembilikanggen wereg. Tor angge ap ebe fam wereg angge famen tor angge inowen alem suwon inamap turuk. Ari hag toho wirimangge eke indok anggen tor angge famen ohi humon harep na rehon ari yet hemek.
6Ap enembilikanggen indok hag toho wereg. Siyag ane anggolo alem hag toho wereg lit suwap turuk. Nenebe fam werehon obog toho arimano at misig inowen orohole siyahap turuk. Indok olokon mondabi ambulpul turukon inowen hunduhuk lit nit nenebe welaheyon obog toho wiyal neneptuk.
7Kinangma wereg angge suwe pak men pisanggo men ik ahummu wereg angge men aben inil sahuhap tuk teg angge famen
8ap enembilikanggen ap misihen oho il sahuhap tuk fug teg. Ap pinggi ware feseruk angge ino olok anggolowon ubam werehen ine anggolo rehen aben apmayap tuk fug teg.
9Nenembilikanggen fam Ninikni Allah wel turuk lit ap Allahn pingganet hag toho wal enepfahon arimano huluwap eneptuk lahe.
10Enembilik misihon ele keyen hi eneptuk ane men huluwap eneptuk ane men wilip atuk. Nori, hiren tu hag toho turuk lamuhup fug.
11Ik eleruk misig famen ik fanowon men sihon men ambi roho wilip am teg?
12Nori, e soluk famen sawe anggen yig am teg? Hele husin famen soluk anggen yig am teg? Ari hag toho saho ahik famen ik saplanggeyon wilip am fug teg.
13Ap misig hit sehelimu wereg lit mun ane man ane alem fahet indi anggat toho wenggel harukon wereg halug at ino ubabut wereg ane fano welaruhu. Mun ane man ane alem fahet oluk teg lit indi apma roho wereg ane ariyen fano ane eneg inam atuk.
14Honoriyen tohon hilila ulug henehummu siyag toho wereg lit suwahal ul peruk lamuhup halug hininggareg wel ta fug angge Allahn tem peruk ane fahet henele si uk fug.
15Mun ane man ane alem oluk atukon ari hag toho Allah wereg ambehen waharuk eleg. Wenggel haruk ane ari ap kinangmonen unundaman tila peruk ane siyahon setan arimanowen hiyag isaruk.
16Noriyen tohon helele ulug indimuwen peruk lit suwahal ul peruk ambeg ino siyag-siyag ane men het-pet toho uruk ane men wereg.
17Mun ane man ane fahet alem onoluk atuk ane Allah famen waharukon tu: Ap inindi wirik toho wereg lit mangno atuk ane men, inindi wiyig toho wereg lit ap enele holtukon men, ap inindi enesug lit fano ane turukon men, ap orohole yami ruk fug angge ele si ane uruk elehon fahet ihi.
18Ap seliyon mangnowap eneptuk inap arimanowen anggen fanowon fog turukmu pikir atuk ane wilip atuk.