Alkitab Mobile SABDA
[VER] : [ABUN]     [PL]  [PB] 
 <<  Roma 8 >> 

1Sane su ré men yé gato si Yesus Kristus tepsu dik ne, Yefun Allah yo syo sukye nai men mo sukibit gato men ben ne o nde,

2we Yesus Kristus kak os ndo wa men anato Yefun Allah Gen nai men wé kadit sukjimnut ibit gato jom men. Yefun Allah Gen sombok men wé kadit ye Yahudi bi sukduno gato gwat sukkwop wa men re.

3Sukjimnut gato tik men mit wa ben sukibit ne jom men yetu. Sane anato ye Yahudi bi sukduno-i yo nggiwa ós men nde. Sane Yefun Allah fro bi os-i tara re. Yefun Allah syo An bi Gan ma mo bur ré su kaim ka sa men yetu kaim. Yefun Allah syo An bi Gan ma wa bi nggwa tepsu suktot wa men subere kak sukjimnut ibit ne wé kadit men re.

4Yefun Allah syo An bi Gan ma subere men ku os wa men benbot suk gato Yefun iwa men ben, gato Yefun kadum mo ye Yahudi bi sukduno-i ne. Sane men kem mo bur ré, men benbot sukjimnut gato tik men mit wa ben sukibit, bere men yo ku os nde, wo men jammo Yefun Allah Gen sa, bere men nggiwa men benbot suk gato Yefun iwa men ben ne re.

5Ye gato benbot sukjimnut gato tik an mit wa ben sukibit ne, ye ne bi sukjimnut-i kem pe mo suk gato yetu iwa ben ne sor. Sarewo ye gato benbot suk gato Yefun Allah Gen kadum ne, ye ne bi sukjimnut-i kem pe mo suk gato Yefun Allah Gen iwa ye ne ben ne.

6Men bi sukjimnut-i kem pe mo sukjimnut ibit ne yo, bere gwat sukkwop wa men. Sarewo men bi sukjimnut-i ne kem pe mo Yefun Allah Gen ne yo, bere Yefun Allah Gen jom men, sane men kem not, ete men si Yefun Allah kem ndo su yu.

7Ye gato bi sukjimnut-i kem pe mo yetu bi sukjimnut ibit ne, ye ne tepsu yeko wa Yefun Allah. Ye gane yo iwa jammo Yefun Allah bi sukduno-i nde, ye ne yo nggiwa benbot dom nde.

8Ye gato jammo sukjimnut gato tik an mit wa ben sukibit ne sor, bere ye ne yo ku os wa ben suk gato Yefun Allah iwa an ben ne nde.

9Nin dakai sa, sukjimnut gato tik nin mit wa nin ben sukibit ne yo jom nin o nde, wo Yefun Allah Gen jom nin sor re. Yefun Allah Gen do kem pe mo nin mit yo, bere An jom nin re. Wo Yefun Allah Gen yo kem mo nin mit nde yo, bere An yo jom nin nde. Ye gato Yefun Allah Gen yo kem mo an mit nde yo, ye ne yo sok mo Yesus Kristus bi yetuge-i nde.

10Sarewo Kristus do kem mo nin mit it yo, kapre nin da kridek bere kwop mo sukibit gato nin ben ne, Yefun Allah Gen ós nin da gesyos kem ndo, we Yefun Allah nai nin gum sok mo An bi rus-i it.

11Yefun Allah gato sun Yesus Kristus kadit sukkwop, An Gen do kem mo nin mit ete nin kwop it yo, bere Yefun Allah waii sun nin da kridek mbau satu. Yefun Allah sun nin da kridek su Yefun Allah Gen bi suktinggi gato kem mo nin mit.

12Sane ji bi nji, ji bi nyanggon, men jammo sukjimnut gato tik men mit wa men ben sukibit ne o nde, wo suk gato Yefun Allah Gen kadum wa men ben ne, men nut mo men mit do, men benbot sor, men kamo su nde, men misyar wa nde.

13Men benbot suk gato Yefun Allah Gen kadum nai men ne sor, we men do benbot sukjimnut gato tik men mit wa ben sukibit ne yo, bere men kwop sor re. Sarewo men jammo Yefun Allah Gen sa, bere Yefun Allah Gen ben men nggiwa men kak sukibit gato men dakai ben ne wé kadit men re. Men do kak sukibit ne wé it yo, bere men kem sisu ndo it anane.

14Ye gato jammo Yefun Allah Gen sor anato tepsu Yefun Allah bi pa-i re.

15Yefun Allah Gen, gato bok nggwa mo men ne, yo ben men tepsu pakwerut wa suknyu o nde, wo Yefun Allah Gen ben men tepsu Yefun Allah bi pa-i. Sane Yefun Allah Gen mo men mit ben men kendo Yefun Allah do, "Ai o, ji bi Ai o."

16Yefun Allah Gen kadum mo men mit subere men jam rer do, men anato Yefun Allah bi pa-i it.

17Men tepsu Yefun Allah bi pa it yo, bere men ku Yefun Allah bi sukrok gato An fro wa syo nai An bi pa-i. Men si Kristus sino bere ku suk gato Yefun Allah fro wa men, we men ku sukye tepsu Yesus Kristus ku ne. Sane yo, bere men ku suk gato ndo wai ne tepsu Kristus ku suk gato ndo wai mone dom.

18Ji dakai nut do, men kem mo bur ré, men ku sukye, sarewo sukye gato men ku ré yo sye teker eta nde, wo su kam sari ne ma men ku suk gato ndo mwa wai kadit sukye gato men ku mo bur ré o re. Sukye gato men ku mo bur ré wokgan yi, wo bere sukndo gato men ku mo gu mwa wai kadit ne o re.

19Suk bok ne sino gato Yefun ut ne eswa kam gato Yefun Allah ma kadum An bi rus-i nai suk bok ne sino jam. Suk bok gato Yefun ut ne sino mit iwa jam nje gato sok mo Yefun Allah bi rus-i.

20Suk bok ne sino gato Yefun ut ne eswa Yefun bi pá-i ne bor, we suk bok ne sino ku sukye mo bur ré gato ben suk bok ne ibit o re. Suk bok ne yo iwa ku sukye nde, wo Yefun Allah dakai syo sukye nai suk bok ne. Yefun Allah misyar suk bok ne sino ku sukye mone, we Yefun bi sukjimnut dik sare do:

21suk bok gato Yefun ut ne sino bere sombok kadit suk sato bom e, syumbar e ne gato ben suk bok ne ibit e, mbras, e mbu e ne. Bere suk bok ne sino si men yé gato sok mo Yefun Allah bi rus-i kem ndo sino. Bere suk bok gato Yefun ut ne si Yefun bi pá-i kem gesyos mo nat gato ndo wai o re.

22Men jam do, kadit ketke kom more, suk bok ne sino gato Yefun ut ne ben sato wo ete saiye su sukye tepsu nggonfar gato nukwe i su bi pa wa kem su ne.

23Suk bok ne sino saiye su sukye sor nde, wo men yé gato Yefun Allah Gen bok nggwa mone, men dom saiye su sukye gato men ku mo men kaim budat. Yefun Allah syo suk mwa gato ndo nai men. Ketke An syo An Gen nai men re, or o men eswa Yefun Allah sombok men kaim budat wé kadit sukye mo bur ré, ete syo men kaim be nai men. Men eswa saresa, men ben sato men saiye su sukye ne mo men mit dom.

24Men kwabom kam mo Yefun Allah do, bere An nai men kaim budat wé kadit sukye mo bur ré. Sarewo Yefun do nai men wé kadit sukye ne it yo, bere men bi sukjimnut yo kas kom mone o nde, we je u anato eswa ku suk gato an ku it ne?

25Sarewo Yefun yo nai men wé kadit sukye ne nde tó yo, men kwabom kam mo An do, bere An nai men wé mone tó, men eswa sor, bere An nai men wé kadit re.

26Sane dom men yo nggi o nde yo, bere Yefun Allah Gen ós men mone. Men jam nde suk gato tep wa men ki su Yefun ne yo, Yefun Allah Gen dakai ós wa ki suk su Yefun Allah tepsu yegweswai wa men, ete men mit ba su sukdu ne, men yo nggiwa ki sukdu ne yo bor sye wa yé jam nde.

27Sane suk gato Yefun Allah Gen ndek mo Yefun wa ye gato onyar kem mo Yesus Kristus ne, bere sukdu ne tepsu Yefun Allah mit re. Sane anato Yefun Allah gato jam men yetu kom mo mit ne, An jam An Gen bi sukjimnut-i re.

28Men yé gato bi sukjimnut sye kas subot Yefun Allah ne, men jam do, mo suk mwa ne sino gato bor mo men, bere kom mo rut, Yefun Allah fro suk mwa ne ndo wa men yé gato simo os ndo gato An fro ne.

29Yefun ben An bi suk-i ndo su men, we men tepsu yé gato Yefun Allah jam suga nyim tuya do, bere men onyar kem mo An ne, sane Yefun Allah fro men subere An nai men tepsu An bi rus-i suga nyim ne it. An fro men subere men ben men bi suk-i ne tepsu An bi Pa, Yesus Kristus. Sane bere Yesus Kristus tepsu pa doketke mo Yefun Allah bi pá mwa ne sino.

30Sane Yefun Allah kendo ye gato An dakai fro suga nyim tuya ne. Ye gato Yefun Allah kendo sok mo An bi rus-i ré, Yefun Allah ki mo yé ne do, yé ne sa, tep wa Yefun nai yé ne gum sok mo An bi rus-i ne. Ye gato Yefun Allah nai gum sok mo bi rus-i yo, Yefun bes yé ne gum kok sye wai tepsu Yefun o re.

31Su ré, men ki suk sato suma o subot suk gato Yefun Allah fro wa men ne? Yefun Allah anato tepsu men bi yenggras, sane bere je u anato nggi wai kadit men ete ben men ibit ne?

32Yefun Allah yo nai An dakai bi Gan wé kadit sukye nde, wo Yefun Allah syo An bi Gan ma kwop win men yetu sino. Yefun Allah dakai syo An bi Gan ma wa men yi, sane bere An dakai syo suk mwa neya yi nai men dom, fe!

33Men yé gato Yefun Allah fro suga nyim wa men sok mo An bi rus-i ne te, bere je u anato nggiwa ki men gum ibit mone ne? Mo nde, wo Yefun Allah dakai ki do, men tep wa men sok mo An bi rus-i.

34Ye yo ku os wa ki men gum ibit ne mó e? Yo mo nde, we Yesus Kristus gato kwop wa men ete mbau satu o, Yesus Kristus ne kem tak Yefun Allah de syim ge, anato Kristus gwa yawa men gum mo sukdu gato ye kiket men daret re.

35Suk sato suma anato nggi ya mo miten wa men si Kristus subere Yesus Kristus yo ku os wa mewa men o nde ne? Men ku sukye anato Yesus Kristus yo ku os wa mewa men mone nde, bado? Mo nde. Ye yo ben sukye nai men anato Kristus yo ku os wa mewa men mone nde, bado? Mo nde. Sukonde e, men yewa suk e, yeko futma wa gu men kwop su nyom e ne anato Kristus yo ku os wa mewa men mone nde, bado? Suk bok gane bere yo ben sukye mo mit wa men si Kristus mo nde, bere Kristus mewa men petok sor,

36tepsu ye krom mo Yefun Allah bi sukdu do, "Men tepsu Nan bi rus-i, sane noru nombrak men ku sukye ndo nde, bergan men kwop rok. Yé nut mo men do, men tepsu domba gato bergan yé gu kwop wé sor."

37Sukye gato men ku ne yo nggi wai kadit men nde, we mo suk mwa ne sino, Yesus Kristus mewa men anato bere men nggi wai kadit sukye mwa neya re.

38Ji jam rer do, Yesus Kristus mewa men pe sor, sukye yo ku os wa yawa miten wa men si Kristus nde, ji jam ware. Kapre men kwop o, men mbau o, bere Yesus Kristus mewa men mone tó. Malaikat e, suk gato i-mok mone sato yerom e, aboksye e ne yo ku os wa yawa miten wa men si Kristus dom nde. Suk gato bor su ré e, suk gato bor su kam sari e, suktinggi yi neya e,

39suk mwa gato nggi mo gu nim ne si bur ré sino yo ku os wa yawa miten wa men si Kristus dom nde. Yefun Allah bi sukjimnut sye kas subot men pe sor anato men bi Yekwesu Yesus Kristus mewa men, sukye bok neya yo ku os wa yawa miten wa men si Kristus mo nde.



 <<  Roma 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran