Alkitab Mobile SABDA
[VER] : [ARALLE]     [PL]  [PB] 
 <<  1 Tesalonika 5 >> 

1Ingkämmua' solasohongki', didiona di pihhang la dahii inde kaha-kaha, dang mangki' kipayalingngingkoa' inde di suha'ki',

2aka' ungnginsang manahpangnga' nei' ungngoatee allo kasuleanna Dehata la sihapang kasuleanna to paboko ke bengii.

3Di tempona ma'kara hupatau naoatee, "Mapia asang inaha anna malinong tau," ya' donetoo sule siang katallangang, sihapang mesa bahine ang pihsa' tomande' mansa'ding aka' la keänä'. Anna dai mala tala nahoa asang to tamampetahpa'.

4Ampo' dioa' dio ingkämmu solasohongki', dakoa' dio noa tau senga' ang tuho yaling di kamalillingang. Dahi, ke suleng allo yatoo, dakoa' dio la tungke'du' sinnoa tau ang tungke'du' aka' pihsa' nakasulei to paboko.

5Aka' tuho asangkoa' dio yaling di kamabayaang, sinnoa tau ang mellao di allo. Daingkea' tuho yaling di kamalillingang, sinnoa tau ang mellao di bengi.

6Dianto anna daingkea' kita' la noa tau senga' ang mohahe-hahe supu. Ampo' la suhaka loloingkea' kita' anna la ungkuasaiingkea' kalaeta, dai sinnoa to mäbo'.

7Aka' bengiete' supu ang si naonge tau hahe anna naonge tau mäbo'.

8Ampo' kita' indee dianto tau ang tuho yaling di kamabayaang, dahi pahalluingkea' la ungkuasai kalaeta. Pahallu touingkea' mampetahpa' dai' di Puang Yesus anna ma'kalemu pano di para-paranta. Dianto yato kaya' pa'tolla'ang ang la mandakaiingkea' umbali kamalillingang. Pahallu touingkea' hannu lolo la napasalama' Puang Yesus. Yato panghannuanta sihapang songko' bahsi.

9Aka' daingkea' napillei Puang Alataala la natahungkung ampo' napilleiingkea' la namana' kasalama'ang yaling di Dehatanta Puang Yesus Kristus.

10Puang Yesus mate napasalama'ingkea' anna malai ke sumulei dako' tontongngingkea' kita' la sibaha-baha lolo, diaraka tuhokingkea' nalambi' bahtu' matemingkea'.

11Diantoo anna la sipakaleha-lehakoa' anna sipakatoto' lolokoa' noa yato ang inang si umbabea'.

12Kipalau mating ingkämmua' solasohongki', pahallukoa' umpakäyyäng tau ang mengkähäng kahha' yaling di alla'-alla'mua', dianto ang napillei Puang Alataala la mampatehtekoa' yaling di salu katuhoammu ang la mampakalehakoa' andana umbabekoa' kakarakeang.

13La umpakeangka'a' anna umpakäyyäng si'da-si'daia' sitonda pa'kalemu aka' pengkähänganna yaling di alla'-alla'mua'. Anna la tontong lolokoa' sikalemui mesa anna mesa.

14Anna kipalaui si'da-si'da toukoa' nei' kioatee, pa'karaii solamua' ang tengkong bosi mengkähäng ampo' pakahangaine' tau ang pa'mahea'ang. Duluiine' tau ang malamma anna sa'bara'koa' pano di ingkänna tau.

15Pengkakalehaiia' andana sipatumpu-tumpuikoa', ampo' peäng loloi lalang anna membabe mapia lolokoa' pano di para-parammu mesa anna mesa, noa toe' pano di tau senga'.

16Yaling di ingkänna kaha-kaha pahallukoa' tontong lolo umpamahasa inahammu, ma'sambayang anna ma'kuhhu'sumanga', aka' dianto pa'elo'na Puang Alataala tama di kalaemua' aka' tuhokoa' yaling di Kristus Yesus.

17(5:16)

18(5:16)

19Daungkalapai Inaha Masero.

20Daungngita-ita naung tula' ang nasanga tau sule yaho mai di Inaha Masero.

21Ampo' sändä'i asangngia' dolu, mane untuhu'ia' ang mapia

22anna umpakahaoine' ingkänna ang karake.

23Kuhannuang Puang Alataala, ang mebea kamasahkeang anna kamalinoang, la napadahikoa' tau ang punno kamaseroang. Anna malai noa inahammu, noa sungnga'mu, noa bätäng puntimmu dai aha sallaanna ke suleng Dehatantaa' Puang Yesus Kristus.

24Puang Alataala ang mala dipetahpa' ang untambaikoa' dianto ang la umpadahi kaha-kaha yatoo.

25Oa' solasohongki', pa'sambayang touingkang kami'.

26Sisalama'koa' anna sikalemu-kalemuikoa' ingkänna solasohong yaling di Puang Yesus.

27Sibaha sanganna Dehata kupalau liu mating anna malai inde suha' la dibata nahingngi ingkänna solasohontaa' to mampetahpa'.

28Ke la malai Dehatanta Puang Yesus Kristus umbehekoa' para-para.



 <<  1 Tesalonika 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran