Alkitab Mobile SABDA
[VER] : [ARALLE]     [PL]  [PB] 
 <<  Efesus 3 >> 

1Aka' ingkänna yato ang puha nababeingkoa' Puang Alataala, lambi' kodi' Paulus, ang ditahungkung aka' ungkähängngä' pengkähänganna Kristus Yesus yaling kuduluikoa' ingkämmu ang tadia to Yahudi, kusambayangngi lolokoa'.

2Tantunte' anna ungnginsammia' ungngoatee nakalemuiä' Puang Alataala lambi' nabeaä' inde pengkähängang anna malakoa' kudului.

3Aka' napalosaiä' pahtuyu membuninna Puang Alataala, lambi' kuinsang. Anna didiona inde kaha-kaha, ya' puhang kuuki' sai'di'.

4Ponna ke umbatangnga', ya' la ungnginsammia' pole' ungngoatee kukalesong anna kupähämmi yato kara membuninna didiona Kristus.

5Dolu yato pahtuyu nabunike', dake' aha napepainsangnging pano di hupatau. Ampo' dinoa napepainsamming pole' Inaha Maserona Puang Alataala pano di ingkänna to napama'tantu mendahi rasulna sibaha nabinna.

6Yato ang dioainte kara membuni, bahtuanna: moi tau ang tadia to Yahudi, noa tunne' to Yahudi, mendahi mesang anna para-para la untahimbo yato mana'na Puang Alataala, ang inang puha nadandi aka' pengkähänganna Kristus Yesus. Ingkänna yatoo mala dahi aka' umpetahpa' tau Kaheba Mapia.

7Mana' pa'kalemunnanto Puang Alataala anna malamä' nasuo umpepainsangnging yato Kaheba Mapia. Anna mala kutahimbo yato pengkähängang aka' kakuasaanna.

8Di alla'na ingkänna petauanna Puang Alataala kodi'mito ang handang madihoi'ang. Ampo' moinnakato noa, nabea touä' kodi' Puang Alataala mana' pa'kalemunna la umpepainsangnging Kaheba Mapia didiona pa'kalemunna Kristus ang dai aha puhanna pano di ingkänna tau ang tadia to Yahudi.

9Anna kupakaleso toinne' pano di ingkänna tau umba napanoa Puang Alataala ang umpadahi ingkänna aka-aka umpembabeing yato pahtuyunna ang tibuni mengkalao dolu.

10Yato pahtuyunna Puang Alataala la umpamesa ingkänna to mampetahpa' anna malai nainsang pole' ingkänna malaeka' anna kakuasaang senga' yaho di langi' naoatee, "Ingkänna aka-aka nainsang asang Puang Alataala."

11Dianto yato pahtuyunna Puang Alataala mengkalao dolu ang la nakähäng yaling di Kristus Yesus, Dehatanta.

12Aka' kapampetahpa'anta anna kasikenteanta Puang Yesus Kristus, lambi' damingkea' la mahea' anna bata-bata mengngolo dai' di Puang Alataala.

13Dianto anna kupalauia' mating kuoatee, dakoa' la kuhang inaha didiona kamasuhsaangku mengeä' yaling di tahungkung aka' dianto ang la mambahaingkoa' kamapiaang.

14Aka' yato ingkänna ang puha nababeingkoa', dianto anna menombaä' anna ma'sambayangngä' dai' di Ambeta Puang Alataala, to napoambe ingkänna kasanghapuang, noa ang yaho di suruka, noa ang yaling di lino.

15(3:14)

16Kupalau dai' anna malai kakuasaanna, ang dai aha mantondong kamatandeanna, la umpamatohoa' inahammu ungngolai pengkähänganna Inaha Maserona,

17anna malai tohho lolo Kristus yaling di bätäng sungnga'mua' aka' kapampetahpa'ammua'. Anna ma'sambayang touä' anna malai ingkänna pembabemua' la mengnguhaka' anna menumpu yaling di pa'kalemu,

18lambi' malakoa', ingkämmu petauanna Puang Alataala, para-para umpähäng manahpa umba noa malua'na, kalambe'na, malängkä'na, anna matamanna pa'kalemunna Kristus.

19Moinnakato anna dai mala nalosa lahpa' pihki'na hupatau, ampo' kupalauke' dai' di olona Puang Alataala anna malai unsa'dingnga' yato pa'kalemunna lambi' malakoa' napunnoi sipa'na Puang Alataala.

20Yato kakuasaanna Puang Alataala yaling di kalaetaa', dianto ang mengkähäng lambi' nabeaingkea' pampemalanta la'bi puha nei' andana yato ang tapalau, moi yato ang dake' nalambi' pihki'ta.

21Dahi sihatang pano di ingkännaingkea' to mampetahpa' la umpa'käyyängngi Puang Alataala ungngolai Kristus Yesus mengkalao dinoa lambi' sapano-panona! Aming.



 <<  Efesus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran