1Pihsananna kupahandang anna kuita yato Änä' Domba ke'de' yaho di Tanete Sion sibaha-baha sangngatu' uhpa'pulo uhpa' sa'bu tau sangka' tiuki' sanga Änä' Domba anna sanganna Ambena di hao di kandinnaii.
2Mane unghingngiä' mesa kamaha memuhhung yaho di suruka sinnoa oninna salänsäng malängkä' anna sinnoa kundäng balu. Yato kamaha maleke dihingngi sinnoa oninna katapi.
3Di olona yato ohko'ang tomaraya anna yato uhpa' hupanna ang menanaha anna to dipakeangka', yato sangngatu' uhpa'pulo uhpa' sa'bu tau sangka' sika umpopenani penaniang bakahu. Penaniang indee dai mala napellaya'i tau senga', ke dai sika dia toboe' ang puha disulängngi yaling mai di lino.
4Katuhoannaii masero. Sihapang tau ang dai aha ungngindä'-indä' pa'bannetauang, dai aha sika umpenombai ang senga' supung Änä' Domba. Diamo naola yato Änä' Domba, dia tunne' sika naola. Puhang sika disulängngi di alla'na ingkänna tau di lino. Sinnoanna boa pengkähäng ang uhuna dipopenomba, noa tunne' inde mai tau dipopenomba dai' di Puang Alataala anna dai' di Änä' Domba.
5Daliu aha sika loseng anna dai aha sallaanna moi poro la sai'di'.
6Mane kuita boi aha mesa malaeka' lella' lumolo' yaho di nähäng. Yato malaeka' umbaha Kaheba Mapia ang dai aha puhanna, la napepainsangnging pano di hupatau ang aha yaling di lino dianto pano di ingkänna bohto.
7Yato malaeka' ma'kara napekäyyängngi naoatee, "Penombakoa' dai' di Puang Alataala anna pamatandei! Aka' temponang Puang Alataala la umpahehsa hupatau. Penombaii yato ang umpadahi langi', kalantanang, le'bo' anna ingkänna timbu!"
8Mentindo' siang malaeka' kaderuanna anna ma'karai napekäyyängngi naoatee, "Puhang sitale-tale! Bohto Mahoa' Babel ang käyyäng puhang sitale! To Babelmito indee ang umpadahi katasampa'ang lambi' samai bohto mamponialai untindo' pampemalanna ang tasampa'! Sinnoanna napaenu' ang mepamalango."
9Mentindo' bumi malaeka' katallunna anna ma'karai napekäyyängngi naoatee, "Tau ang umpenombai yato olo'-olo' anna tau-tau ang nababe, anna ang ketanda di hao di kandinna bahtu' teyyena,
10dianto tau ang la pahallu ungngenu' angkoro'na Puang Alataala. Angkoro' yatoo dianto kakeaha'anna Puang Alataala ang puha napatoka la dienu', dai aha kuhang masahhu'na moi poro sai'di'. Ingkänna yato tau la didahha tama di api handang maluhsu' di olona semalaeka'ang ang masero anna yato di Änä' Domba.
11Hambunna yato api ang la sika dipandahhai la mapulu' lolo lambi' sapano-panona. Allo-bengi dai aha tohhona sika didahha yato ang sika umpenombai olo'-olo' anna tau-taunna, anna ang ketanda di hao di kandinna bahtu' di teyyena."
12Dahi petauanna Puang Alataala ang mampehingngii pahentana, anna matoto' kapampetahpa'anna dai' di Puang Yesus, pahallu sa'bara'.
13Puhai yatoo, unghingngimä' kamaha yaho mai di suruka naoatee, "Uki'i indee: mengkalao dinoa, tau ang mampetahpa' dai' di Puang Yesus lambi' mate, dianto ang la ullambi' kamasannangang yaho mai di Puang Alataala!" Mentimba'mi Inaha Maserona Puang Alataala naoatee, "Inang tahpa'na. Sika la natohhoing mengkähäng kahha' aka' boana pengkähängannaii dianto la mamposolai dai' di suruka."
14Ma'pahandang bouä', ya' kuitang mesa ang sinnoa hupatau mohko' di salehu' mabusa. Mesongko' bulahang anna untokei mesa kandao pahe'la'.
15Pihsananna sohong bumi mesa malaeka' yaling mai di Dasang Ada'na Puang Alataala yaho di suruka anna umpa'karaii yato tau ang mohko' yaho di salehu' napekäyyängngi naoaintee, "Pakeng ne kandaomu dinoa, aka' lambi'mi tempona pepaheang. Matuang lino malang dipepahe!"
16Tahpa ungngängkä' siang kandaona yato tau naung di lino, ya' dikandaong lino.
17Mane ungngita bouä' mesa malaeka' senga' sohong yaling mai di Dasang Ada'na Puang Alataala yaho di suruka ang untokei toe' kandao pahe'la'.
18Tahpana yatoo, suleng mesa malaeka' senga' ang ma'kuasa didiona api yaling mai di pantunuang penombaang. Umpa'karai yato ang untokei kandao pahe'la' napekäyyängngi naoaintee, "Pakeng ne kandaomu naung di lino anna ungngalai asangngi boana angkoro', aka' matuang!"
19Ungkandao siang boa angkoro' di hao mai di bätänna mane napensaleba'ing tama di landaang käyyäng, dianto kakeaha'anna Puang Alataala. Dianto inde pohapangang didiona ang la napanoa Puang Alataala pano di to karake.
20Landaang yatoo di aneanna bohto mahoa'. Mesalu siang haha sinnoa angkoro' ungngola sahuhang yato di pampihsä'ang salamang salu uhai. Tallungngatu' kilo makahaona anna malimbenna sai'di' tala dommete'.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel