Alkitab Mobile SABDA
[VER] : [BABA]     [PL]  [PB] 
 <<  1 Tesalonika 5 >> 

1Ttapi deri-hal sgala waktu dan ktika, hei sudara-sudara, ta'usah orang tulis k-pada kamu.

2Kerna kamu sndiri pun tahu baik-baik yang hari Tuhan itu datang sperti pnchuri tempo malam.

3Ktika orang ada bilang, "Sjahtra dan slamat," itu juga nanti datang kbinasa'an di atas-nya dngan sgra, sperti sakit beranak atas prempuan yang mngandong; dan skali-kali t'ada dia-orang nanti dapat lpas.

4Ttapi kamu ini, hei sudara-sudara, bukan-nya dalam glap, sampaikan itu hari datang atas kamu sperti satu pnchuri:

5kerna kamu smoa anak-anak trang, dan anak-anak siang: kita ini bukan-nya deri-pada malam, atau deri-pada glap;

6jadi itu, jangan-lah kita tidor sperti orang-orang lain, ttapi biar kita berjaga dan mnahan diri.

7Kerna orang yang tidor itu tidor waktu malam; dan orang yang mabok pun mabok waktu malam juga.

8Ttapi biar-lah kita ini yang deri-pada siang mnahan diri, dan pakai perchaya dan kaseh buat baju rantai; dan harapan slamat buat ktopong.

9Kerna Allah sudah tntukan kita bukan spaya kna marah, ttapi spaya boleh trima slamat oleh Tuhan kita Isa Almaseh,

10yang sudah mati kerna kita, spaya baik jaga baik tidor, kita boleh hidop sama-sama dia.

11Sbab itu nasihatkan-lah satu sama lain, dan tgohkan masing-masing, sperti yang kamu ada buat juga.

12Ttapi, hei sudara-sudara, kita minta kamu knal sama orang-orang yang berpnat di antara kamu, dan yang kpalakan kamu dalam Tuhan, dan kasi kamu nasihat;

13dan kasi banyak hormat sama dia-orang dngan kaseh deri sbab dia-orang punya kerja. Biar-lah kamu sjahtra antara kamu sndiri.

14Hei sudara-sudara, kita minta kamu nasihatkan orang yang ta'turut prentah, ttapkan orang yang tawar-hati, tolong orang yang lmah, sabar sama smoa orang.

15Ingat baik-baik, jangan satu orang pun balas jahat dngan jahat k-pada siapa-siapa pun; ttapi slalu tuntut apa yang baik, satu sama lain, dan sama smoa orang pun.

16Biar-lah kamu slalu bersuka-hati;

17minta-lah do'a dngan t'ada berrnti-rnti;

18dan mnguchap shukor dalam smoa hal: kerna ini-lah kahandak Allah dalam Isa Almaseh atas kamu.

19Jangan-lah padamkan Roh;

20jangan hinakan nabuat;

21choba-lah smoa perkara, dan pegang-lah apa yang baik:

22jauhkan kamu punya diri deri sgala rupa kjahatan.

23Dan biar-lah Allah sndiri yang bri sjahtra kuduskan kamu dngan smpurna-nya; dan biar-lah kamu punya roh dan jiwa dan badan di-pliharakan dngan s-chukop-nya, dngan t'ada bersalah waktu kdatangan Tuhan kita Isa Almaseh.

24Stiawan-lah dia yang panggil kamu, dan dia-lah juga nanti buatkan.

25Hei sudara-sudara, minta-lah do'a kerna kita.

26Kasi-lah tabek sama smoa sudara dngan chium yang kudus.

27Dmi Tuhan sahya minta kamu banyak-banyak biar-lah ini surat di-bacha k-pada smoa sudara.

28Biar-lah anugrah Tuhan kita Isa Almaseh bersama-sama kamu.



 <<  1 Tesalonika 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran