Alkitab Mobile SABDA
[VER] : [BABA]     [PL]  [PB] 
 <<  2 Korintus 7 >> 

1Jadi itu, sdang kita ada ini perjanjian smoa, hei kkaseh, biar-lah kita suchikan diri kita deri-pada apa-apa yang najiskan badan dan roh, serta smpurnakan kkudusan dngan takot Allah.

2Kasi kita tmpat di dalam kamu punya hati: kita ini bukan-nya sudah buat salah sama satu orang pun, kita bukan-nya sudah rosakkan satu orang pun, kita bukan-nya sudah chari untong deri-pada satu orang pun.

3Sahya ada bilang bgini bukan-nya mau salahkan kamu: kerna dhulu sahya sudah bilang, yang kamu ini ada di dalam kita punya hati, spaya kita sama hidop sama mati.

4Sangat-lah brani sahya punya perchakapan k-pada kamu, sangat-lah sahya mgahkan diri fasal kamu: pnoh-lah sahya dngan pnghiburan, dan sahya punya ksuka'an jadi mlempah dalam smoa kita punya ksusahan.

5Kerna bila kita sudah sampai di Makadoniah pun badan kita t'ada dapat perhentian, ttapi kita kna susah sana-sini: di sblah luar ada perklahian, sblah dalam ada ktakotan.

6Dalam pada itu, Allah yang hiburkan orang yang rndah-hati sudah hiburkan kita pun oleh Titus punya kdatangan;

7dan bukan saja oleh dia punya kdatangan, ttapi oleh itu pnghiburan yang oleh-nya dia sudah di-hiburkan fasal kamu, waktu dia chritakan sama kita kamu punya rindu, kamu punya mnangis, dan kamu punya rajin kerna sahya; sampaikan sahya bersuka-suka lbeh lagi.

8Kerna sunggoh pun sahya sudah kasi kamu susah hati dngan surat sahya, sahya t'ada mnysal, mski pun dhulu sahya sudah mnysal; kerna sahya tengok yang itu surat sudah kasi kamu susah-hati, sunggoh pun chuma s-kjap saja.

9Skarang sahya ada bersuka-suka, bukan-nya sbab kamu sudah kna susah-hati, ttapi sbab kamu sudah kna susah-hati sampaikan bawa tobat: kerna kamu sudah kna susah-hati turut sperti kahandak Allah, spaya jangan kamu kna rugi oleh kita dalam satu perkara pun.

10Kerna ksusahan yang mnurut kahandak Allah kerjakan tobat yang bawa slamat, yang ta'boleh di-ssalkan: ttapi dunia punya ksusahan kerjakan kmatian.

11Kerna tengok itu perkara juga, ia'itu fasal kamu kna susah hati turut sperti kahandak Allah, brapa usaha sudah di-kerjakan di dalam kamu smoa, dan brapa pngaduan, dan brapa gram, dan brapa ktakotan, dan brapa rindu, dan brapa rajin, dan brapa balasan. Dalam smoa hal kamu sudah nyatakan diri kamu suchi dalam itu perkara.

12Jadi itu, sunggoh pun sahya sudah tulis sama kamu, bukan-nya kerna orang yang sudah buat salah punya sbab, dan bukan sbab orang yang sudah kna itu salah, ttapi spaya di dpan Allah kamu punya usaha kerna kita boleh di-nyatakan k-pada kamu sndiri.

13Itu sbab-lah kita sudah di-hiburkan: dan dalam kita punya pnghiburan, kita sudah lbeh lagi bersuka-hati deri sbab Titus punya ksuka'an, kerna dia punya roh sudah di-sgarkan oleh kamu smoa.

14Kerna jikalau sahya sudah mgahkan diri apa-apa k-pada Titus deri-hal kamu, t'ada juga sahya kna malu; ttapi sperti kita sudah chakap smoa perkara dngan s-btul-nya sama kamu, bgitu juga kita punya kmgahan dpan Titus pun sudah di-nyatakan jadi btul.

15Dan dia punya chinta ada bertambah-tambah k-pada kamu, sdang dia ingat kamu smoa punya turut-prentah, bagimana kamu sudah sambot sama dia dngan takot dan mngglitar.

16Sahya suka hati sbab dalam smoa perkara sahya brani taroh harap fasal kamu.



 <<  2 Korintus 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran