1Kerna ini Malki-Sadak, ia'itu raja Salim dan imam Allah yang Maha Tinggi, yang sudah berjumpa sama Ibrahim waktu dia balek deri kalahkan itu raja-raja, dan yang sudah berkatkan Ibrahim,
2dan yang k-pada-nya Ibrahim sudah bhagikan s-puloh satu dalam smoa barang (itu Malki-Sadak kalau tersalin arti-nya mula-mula raja kbnaran, dan kmdian raja Salim pula, ia'itu raja sjahtra;
3dngan t'ada bapa, t'ada mak, t'ada surat kturunan, t'ada permula'an hari-nya, dan t'ada ksudahan umor-nya, ttapi sudah di-samakan dngan Anak Allah) dia-lah kkal, slalu mnjadi imam.
4Perhatikan-lah brapa bsar ini orang, yang k-pada-nya kita punya nenek-moyang Ibrahim sudah kasi s-puloh satu deri antara smoa rampasan-nya.
5S-brapa orang deri antara anak-anak Liwi yang trima pangkat imam, dia-orang dapat hukum ambil hasil s-puloh satu deri-pada orang bangsa itu turut hukum-taurit, ia'itu deri-pada dia-orang punya sudara-sudara, sunggoh pun itu orang smoa sudah kluar deri Ibrahim punya pinggang:
6ttapi Malki-Sadak yang kturunan-nya t'ada di-bilangkan antara itu orang smoa, dia sudah ambil hasil s-puloh satu deri-pada Ibrahim, dan berkatkan orang yang ada itu perjanjian Allah.
7Ttapi satu orang pun ta'boleh berbantah yang orang kurang pangkat-lah trima berkat deri-pada yang lbeh pangkat.
8Di sini orang yang nanti mati trima hasil s-puloh satu, ttapi di sana dia yang di-saksikan yang dia ada hidop.
9Jadi, boleh bilang, yang dalam Ibrahim mski Liwi pun, yang biasa trima s-puloh satu, sudah bayer s-puloh satu;
10kerna dia ada lagi di dalam pinggang bapa-nya, waktu Malki-Sadak jumpa dia.
11Sbab itu, jikalau ksmpurna'an datang oleh imam-imam suku-bangsa Liwi (kerna bangsa Isra'el sudah trima hukum-taurit dalam hal itu orang smoa jadi imam), apa guna lain satu imam pula kluar turut aturan Malki-Sadak, dan yang bukan di-bilangkan turut Harun punya aturan?
12Kerna bila imam-nya tukar, ta'boleh tidak hukum-nya pun msti tukar.
13Kerna smoa perkara itu sudah di-katakan deri-hal satu orang yang deri-pada lain suku-bangsa, dan deri-pada itu suku-bangsa satu orang pun blum buat pkerja'an tmpat korban itu.
14Kerna nyata-lah yang Tuhan kita sudah kluar deri suku-bangsa Yahuda; dan Musa t'ada kata satu apa pun fasal imam-imam deri-hal ini suku-bangsa.
15Dan lbeh nyata lagi bgitu kalau sudah terkluar satu imam yang lain turut tuladan Malki-Sadak,
16yang sudah jadi imam, bukan-nya turut hukum deri-hal perkara dunia ini, ttapi turut kuasa hidopan yang t'ada putus:
17kerna ada di-saksikan, "Angkau-lah satu imam s-lama-lama-nya, Turut aturan Malki-Sadak."
18Jadi hukum yang dhulu itu sudah di-sblahkan deri sbab lmah dan t'ada berguna
19(kerna hukum-taurit t'ada bikin satu apa pun smpurna), dan sudah di-bawa masok pula satu pngharapan yang lbeh baik, yang oleh-nya kita datang dkat Allah.
20Dan lagi sdang ia'itu bukan-nya dngan t'ada sumpah
21(kerna itu orang smoa sudah di-jadikan imam dngan t'ada sumpah; ttapi dia ini dngan satu sumpah deri-pada Allah yang kata deri-hal dia, "Tuhan sudah sumpah, dan t'ada nanti mnysal, 'Angkau-lah imam sampai s-lama-lama-nya;'")
22bgitu juga lbeh baik punya perjanjian yang Isa sudah jadi akuan-nya.
23Dan itu orang smoa sudah di-jadikan imam banyak juga, kerna kmatian tahankan dia-orang jangan kkal:
24ttapi dia ini, sbab dia tinggal kkal sampai s-lama-lama-nya, jadi imam yang kerja-nya t'ada ganti-ganti.
25Sbab itu dia ada kuasa slamatkan dngan smpurna smoa orang yang datang dkat Allah oleh dia, sdang dia slalu ada hidop mau minta do'a kerna dia-orang.
26Bgini-lah punya kpala-imam yang patut sama kita, ia'itu kudus, t'ada salah, t'ada chachat, di-asingkan deri-pada orang-orang berdosa, dan di-tinggikan lbeh tinggi deri-pada langit;
27dan ta'usah dia s-hari-hari bawa korban sperti smoa itu kpala-imam, mula-mula kerna dia sndiri punya dosa, dan kmdian kerna orang bangsa itu punya dosa; kerna dia sudah buat ini satu kali juga, ia'itu bila dia sudah srahkan diri-nya.
28Hukum-taurit itu tntukan orang yang ada klmahan mnjadi kpala-kpala-imam; ttapi perkata'an sumpah yang datang kmdian deri-pada hukum-taurit, tntukan satu Anak, yang sudah di-smpurnakan sampai s-lama-lama-nya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel