Alkitab Mobile SABDA
[VER] : [GULLAH]     [PL]  [PB] 
 <<  1 Yohanes 4 >> 

Mus Find Out Bout de Sperit Dem

1Me deah fren, mus dohn bleebe ebry sperit. Tes de sperit dem fa find out ef dey come fom God. Cause plenty prophet wa ain taak de trute beena gone out ebryweh.

2Listen how oona kin know ef dey hab God Sperit. Ef somebody say out een de open dat Jedus Christ done come fa be a man een dis wol, dat one hab God Sperit dey eenside um.

3Bot ebrybody wa ain taak so bout Jedus, da say e ain come fa be a man, dat one ain hab de Sperit fom God dey eenside um. Dat one hab de sperit wa come fom de one wa fight ginst Christ. Oona beena yeh say dis sperit yah gwine come eenta de wol, an now e dey een de wol already.

4Bot oona, me deah fren, oona God own people, an oona done win out oba de prophet dem wa ain taak de trute. Cause God Sperit wa dey eenside oona, e hab powa mo den de sperit wa dey eenside dem people wa blongst ta de wol.

5Dem lyin prophet blongst ta de wol, an de people een de wol da listen ta um, cause dey de wol own prophet.

6Bot we God own people. De one wa da know God, e da listen ta we. Bot de one wa ain God own ain gwine listen ta we. So den, dis de way we know who hab God Sperit wa true an who hab de sperit wa ain taak de trute.

God da Lob

7Me deah fren, leh we lob one noda, cause God de one wa pit lob een people haat. De one wa lob, dat one God own chile, an e know God.

8De one wa ain lob, dat one ain know God. Cause God da lob.

9Now dis de way God show we dat e lob we: E sen e onliest Son fa come eenta de wol, so dat e Son kin mek we hab life fa true.

10Wa lob da? Dis wa lob da: ain dat we lob God, bot God lob we an e sen e Son fa come eenta de wol fa sacrifice esef fa pay fa we sin so dat God kin paadon dat sin.

11Me deah fren, since dat hommuch God lob we, we oughta lob one noda too.

12Nobody ain neba see God, bot ef we lob one noda, God da keep on da lib dey eenside we haat. An God lob da mek we lob mo an mo til dat lob come fa be wa e wahn um fa be.

13God gii we e own Sperit eenside we haat. Dat wa mek we know fa sho dat we da lib een God an e da lib dey eenside we.

14We done see e Son an we tell people say, God done sen e Son fa come sabe de people ob de wol.

15De one wa say out een de open “Jedus, e God Son,” God da lib eenside e haat. An dat one da lib een God.

16So den, we beena know an trus een God lob fa we. God da lob. An de one wa all de time keep on da lob, dat one da lib een God an God da lib dey eenside um.

17As we da lib een Christ, de lob wa we da lob een Christ gwine grow mo an mo ta wa e oughta be. Den we ain gwine haffa warry bout wen we gwine stan op fo God dat day wen e jedge all people. Cause we da lib een dis wol same like Christ lib.

18Wen we lob, feah ain able fa lib dey. Cause ef some one lob fa true like e oughta, dat lob da shrow out all feah. Cause de one wa fraid, e da tink pon punishment. E ain da lob fa true like e oughta lob.

19We lob cause God fus lob we.

20Ef somebody say e lob God bot e hate e broda, dat one dey ain da taak true. Cause ef some one ain lob e broda wa e beena see, e ain able fa lob God wa e ain neba see.

21So den, de one wa lob God haffa lob e broda too. Dat wa Christ chaage we fa do.



 <<  1 Yohanes 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran