Alkitab Mobile SABDA
[VER] : [KARO]     [PL]  [PB] 
 <<  1 Timotius 5 >> 

Tanggung jawab nandangi kalak Kristen

1Ula rawai kalak si umurna tuan asangken kam, tapi beluhlah min kam muat ukurna, bahan ia tempa-tempa bagi bapandu. Kalak si nguda bahanlah bagi agindu.

2Diberu si nggo metua bahanlah bagi nandendu, janah man diberu si nguda denga arus bersih lagu langkahndu, janah bahanlah bagi turangndu.

3Mehamatlah kam nandangi diberu-diberu si nggo mbalu si lanai ersima-sima.

4Tapi adi sekalak si nggo mbalu lit anakna ntah kempuna, anak ntah kempuna e lah lebe nehken tanggung jababna man keluargana e. I bas si e ersimulih ia man orang-tuana bage pe man ninina, sabap si enda me si ngena ate Dibata.

5Diberu si tuhu-tuhu nggo mbalu, si lanai lit sima-simana, ia erpengarapen man Dibata. Ertoto ia man Dibata suari ras berngi mindo penampat.

6Tapi diberu si nggo mbalu si nggeluh guna pesenangken dirina saja, ia nggo mate aminna pe ia nggeluh denga.

7Pesehlah bana ajar enda gelah ia nggeluh alu la erpandangen.

8Adi lit si la mperdiateken kade-kadena, terlebih-lebih keluargana, nggo ipersokenna kinitekenna. Jahaten me ia asangken kalak si la tek man Jesus Kristus.

9Sekalak si nggo mbalu, adi langa dem umurna enem puluh tahun ula suratken gelarna ku bas gelar-gelar kalak si nggo mbalu. Arus pe maka sekali denga ngenca ia erjabu,

10janah terberita kerna perbahanenna si mehuli: i bas ngepkep anak-anakna, i bas ngalo-ngalo kalak si kesilang ku rumahna, aminna pe la itandaina, i bas ia ngaloken kalak si erkiniteken i bas rumahna, i bas ia nampati kalak si ngenanami kiniseran, bage pe i bas ndahiken erbage-bage dahin si mehuli.

11Ula suratken gelar kalak si mbalu e adi nguda denga ia. Sabap adi sereh denga atena la ia patuh man Kristus,

12ilanggarna padanna ndube si nggo ibahanna.

13Tambah si e, isia-siakenna paksa si lit guna kirumah-kirumah alu la lit tujunna; janah si la mehulina i bas si e, e me erlajar cekurak ia, icampurina urusen kalak, bage pe icakapkenna si la perlu.

14Emaka ulin kuakap kalak si mbalu erjabu mulihi adi nguda denga ia. Ipupusna anak janah ipekena-kenana jabuna, gelah ula erdandanken ia, icekuraki imbang-imbangta kita.

15Sabap lit piga-piga diberu si nggo mbalu papak jenari ikutkenna Iblis.

16Tapi adi sekalak diberu si nggo tek man Jesus Kristus lit piga-piga kade-kadena nggo mbalu, isampatinalah kade-kadena si mbalu e. Alu bage perpulungen banci nampati diberu-diberu si nggo mbalu si lanai lit sima-simana.

17Pertua-pertua si erdahin alu mehuli selaku peminpin patut iergaken dua kali lipat, terlebih-lebih kalak si tutus erdahin i bas meritaken Berita Si Mehuli dingen ngajar.

18Sabap lit tersurat i bas Pustaka Si Badia, "Ula tutupi babah lembu si ipake sangana ngerik," bage pe, "kalak si erdahin arus dat upah."

19Ula begiken kalak si nalahken pertua, pala si nalahkenca e lit dua ntah telu kalak.

20Si ersalah ajarkenlah i lebe-lebe perpulungen gelah teman si deban pe mbiar.

21I lebe-lebe Dibata, Kristus Jesus, ras i lebe-lebe malekat-malekat si badia kupindoken kal man bandu gelah ikutkenlah pedah-pedah enda alu tutus janah rembang-tengahlah min kam rukur man ise pe.

22Ula pedassa tangkuhken kalak si erdahin i bas dahin Tuhan. Adi kalak si deban erbahan dosa ula ikutken. Jagalah dirindu gelah tetap bersih.

23Ula kam minem lau saja, tapi inem pe sitik anggur maka sikap beltekndu, sabap megati kam sakit.

24Lit deba jelma minter teridah dosa-dosana, janah si e tangkas ope denga ia iadili. Tapi deba seh ndekah maka teridah dosa-dosana.

25Bage pe perbahanen-perbahanen si mehuli minter nge teridah, tapi si mesera kal pe ngidahsa labo terbuniken.



 <<  1 Timotius 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran