Alkitab Mobile SABDA
[VER] : [KARO]     [PL]  [PB] 
 <<  Galatia 3 >> 

Undang-undang ntah kiniteken

1O kalak Galati bodoh! Ise kin erbahanca maka kam kena si bage? Kematen Kristus i kayu persilang nggo tangkas kugambarken i lebe-lebe matandu!

2Jabaplah penungkunen enda: Erdandanken idalankenndu Undang-undang kin maka ialokenndu Kesah Dibata, ntah kin erdandanken ibegindu jenari tek kam Berita Si Mehuli e?

3Oh, seh kal bodohndu! Nggo ibenakenndu geluhndu si mbaru e alu Kesah Dibata; atendu kin kegeluhenndu e ibahanndu jadi serta alu kuasandu jine?

4La kin lit gunana kerina pengalamenndu si pagit e? Tentu lit!

5Dibata nggo mereken KesahNa man bandu janah IbahanNa tanda-tanda sengget i tengah-tengahndu: si enda jadi erdandanken idalankenndu Undang-undang kin ntah erdandanken ibegindu jenari tek kam Berita Si Mehuli e?

6Si enda bali ras si tersurat i bas Pustaka Si Badia kerna Abraham, "Tek Abraham man Dibata, janah kinitekenna e irkira Dibata jadi kebenaren Abraham si erbahanca ia rembak ras Dibata."

7Dage arus ietehndu maka si tuhuna si jadi kesusuren Abraham eme kalak si tek man Dibata.

8Pustaka Si Badia nggo leben ngidah maka Dibata ngerembakken si labo kalak Jahudi ras DiriNa erdandanken kinitekenna. Bage pe nai nggo leben iberitaken Dibata Berita Si Mehuli man Abraham bagi si tersurat i bas Pustaka Si Badia nina, "Kupasu-pasu kerina manusia i doni enda arah kam."

9Tek Abraham man Dibata, janah ipasu-PasuNa ia. Bage me pe kerina kalak si tek man Dibata ipasu-pasu bagi Abraham.

10Kalak si ernalem man kengasupenna ndalanken Undang-undang geluhna tetap iancam ukumen Dibata. Sabap i bas Pustaka Si Badia lit tersurat, "Kalak si la tetap ndalanken kerina si tersurat i bas Kitap Undang-undang, isumpahi Dibata me ia!"

11Tangkas dage maka labo ise pe iperembakken ras Dibata arah ndalanken Undang-undang; sabap lit tersurat i bas Pustaka Si Badia, "Kalak si iperembakken ras Dibata erdandanken kinitekenna, nggeluh me."

12Undang-undang labo erpalasken kiniteken, tapi erpalasken perbahanen. Bagi lit tersurat i bas Pustaka Si Badia, "Kalak si ndalanken kerina si tersurat i bas Undang-undang nggeluh me i bas Undang-undang e nari."

13Tapi Kristus nggo mulahi kita i bas ancamen ukumen si lit i bas Undang-undang e. Enda IbahanNa alu ngendesken DiriNa iukum erdandanken kita. Sabap i bas Pustaka Si Badia lit tersurat, "Kalak si igantung i das batang kayu isumpahi Dibata kap."

14Si enda igengken Kristus gelah pasu-pasu si nggo ipadanken Dibata man Abraham banci ibereken man si labo kalak Jahudi arah Kristus Jesus. Gelah kita, arah kiniteken, banci ngaloken Kesah Si Badia si ipadanken Dibata.

Undang-undang ras padan

15O senina-senina, kubuat sada contoh i bas kegeluhenta si tep-tep wari: Adi lit dua kalak si nggo ersada arihna dingen nggo iesahken i bas runggun, apai pe ia lanai banci ngataken maka arihna e la esah ntah pe nambahisa.

16Dibata nggo erpadan man Abraham ras kesusurenna. I bas Kitap si Badia labo ikataken, "ras man kesusuren-kesusurenndu," ertina nterem jelma. Tapi isuratken, "ras man kesusurenndu," ertina sekalak saja, eme Kristus.

17Maksudku eme: Dibata nggo erbahan sada iketen padan janah erpadan guna nehkenca. Undang-undang si reh empat ratus telu puluh tahun kenca si e la ngasup erbahanca mosar iketen padan e seh maka masap ibahanna padan Dibata e.

18Sabap adi pemere si ibereken Dibata erpalasken Undang-undang kin, maka si e labo erpalasken padan Dibata. Tapi erdandanken Dibata nggo erpadan nge maka IberekenNa man Abraham.

19Adi bage, kai kin tujun Undang-undang e? Undang-undang itambahken guna nuduhken si salah. Undang-undang e erguna seh reh sekalak i bas Kesusuren Abraham, si man BaNa ibereken padan e. Undang-undang e isehken malekat-malekat arah sekalak kelang-kelang.

20Tapi sekalak kelang-kelang labo perlu adi labo lit dua pihak; janah "Dibata sada kap," eme palas kinitekenta. Si enda la teridah alu tangkas arah mereken Undang-undang arah sekalak kelang-kelang, tapi tangkas i bas Dibata erbahan padan man Abraham secara langsung.

Tujun Undang-undang

21Ntah kin si enda ertina maka Undang-undang e erlawanen ras padan Dibata? Tentu lang! Adi banci kin kepe manusia ndat kegeluhen alu patuh nandangi Undang-undang, si enda ertina maka manusia banci rembak ras Dibata arah Undang-undang e.

22Tapi rikutken si tersurat i bas Pustaka Si Badia kerina manusia i doni enda ikuasai dosa; erkiteken si e pemere si ipadanken erpalasken kiniteken man Jesus Kristus e banci ibereken man kalak si tek.

23Ope denga kiniteken enda reh, kita ipenjaraken Undang-undang bagi kalak tahanen, seh maka kiniteken e ipetangkas.

24Alu kata si deban Undang-undang e desken sekalak pengawas si tugasna naruhken kita kempak gurunta, eme kap Kristus, gelah kita iperembakken ras Dibata erdandanken kinitekenta.

25Genduari erdandanken nggo seh kita i bas kiniteken e, Undang-undang e lanai erkuasa man banta.

26Arah kiniteken me maka kam kerina jadi anak-anak Dibata i bas persadanndu ras Kristus Jesus.

27Kam nggo ipersada ras Kristus arah lakon peridin, emaka nggo lit i bas kam biak-biak Kristus e.

28Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus.

29Adi kam sikerajangen Kristus, kesusuren Abraham me kam, janah ialokenndu me kai si nggo ipadanken Dibata.



 <<  Galatia 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran