Adat pepalemken
1Ibereken TUHAN man Musa
2peraturen-peraturen kerna lakon pembersihen man kalak si nggo malem penakit kulitna. I bas wari i ja ate ia ikataken nggo bersih, ibaba lah ia ku adep-adepen imam,
3janah ibaba imam lah kalak ndai ndarat i bas ingan erkemah nari, emaka ipepayo imam ia. Adi penakit ndai nggo malem,
4arus maka iperentahken imam kalak si nggo malem ndai maba dua perik si bersih rikutken aturen agama, radu ras sengkeret batang aras, benang megara, ras setangke batang hisop.
5Kenca bage iperentahken imam lah maka perik ndai igeleh sada i das kudin taneh si isin lau mbergeh si ibuat ibas ulu lau nari.
6Emaka ibuatna lah perik si sada nari ndai, jenari icebukkenna ku dareh perik si nggo igeleh ndai, radu ras batang aras, benang megara ras hisop ndai.
7Ipirpirkenna lah dareh e pitu kali ku babo kalak si man bersihenken erkiteken penakit kulitna e, kenca bage ikatakenna lah maka ia nggo bersih. Emaka ipekabangna lah perik si la igeleh ndai ku mbalmbal.
8Kalak si nggo ikataken malem ndai icucina lah pakenna, icukurna kerina bukna, kenca bage ridi; emaka ia nggo bersih rikutken aturen agama. Emaka ia nggo banci bengket ku ingan erkemah, tapi arus ia tading i darat kemahna pitu wari dekahna.
9I bas wari si pepituken, arus maka icukurna ka takalna, janggutna, alis matana, ras kerina buk si lit i bas badanna; emaka icucina lah pakenna, kenca bage ridi, emaka ia nggo bersih rikutken aturen agama.
10Pewaluh wariken ibabana lah dua bajar biri-biri, sada biri-biri beruna umur sada tahun si la lit sitik pe man pandangen, telu kilo tepung campur minak saitun, sepertelu liter minak saitun.
11Ibaba imam lah kalak enda ndai ras barang-barang persembahenna ku pintun Kemah Perjumpan.
12Kenca bage ibuat imam lah sada bajar biri-biri e janah radu ras minak saitun si sepertelu liter ndai ipersembahkenna lah jadi persembahen penebusen. Ipersembahkenna lah e jadi pemere khusus man TUHAN guna imam.
13Igelehna lah biri-biri ndai i bas ingan kalak nggeleh asuh-asuhen guna persembahen pengalemi dosa, ras persembahen tutungen. Arus maka ibahanna bage, erkiteken persembahen penebusen e bali ras persembahen kerna dosa, eme sikerajangen imam, janah seh kal badiana.
14Ibuat imam lah sitik dareh biri-biri ndai, itamakenna ku cuping si kemuhen, ku kambal-kambal tan si kemuhen, ku kambal-kambal nahe si kemuhen kalak si man pebetehenken nggo bersih e.
15Ibuat imam lah sitik minak saitun e, iilingkenna sitik ku tapak-tapak tanna si kawes,
16emaka icalehkenna sada jari-jari tanna si kemuhen ku minak ndai, jenari ipirpirkenna sitik minak e pitu kali i adep-adepen TUHAN.
17Ibuat imamlah sitik minak si i bas tapak-tapak tanna ndai, ras sitik ka dareh biri-biri ndai emaka itamakenna ku cuping si kemuhen, kambal-kambal tan si kemuhen, ku kambal-kambal nahe si kemuhen kalak si man pebetehenken maka ia nggo bersih e.
18Iba-iba minak si i bas tapak-tapak tan imam ndai isapukenna lah ku takal kalak ndai. Bagendalah ibahan imam ngelakoken lakon pembersihen e.
19Kenca bage ipersembahken imamlah persembahen pengalemi dosa jenari ilakokenna lah lakon pembersihen. Kenca bage igelehna lah asuh-asuhen guna persembahen tutungen e,
20emaka ipersembahkennalah e radu ras persembahen pangan e i babo batar-batar. Bagenda lah ibahan imam ngelakoken lakon pembersihen e, emaka bersih me kalak ndai rikutken aturen agama.
21Adi kalak sakit e musil, dingen la ia ngasup nikapken lebih asa si e, ibabanalah sada bajar biri-biri si nguda denga jadi persembahen penebusen, eme pemere si khusus man TUHAN guna imam. Ibabana saja sada kilo tepung si icampur ras minak saitun, guna persembahen pangan ras sepertelu liter minak saitun.
22Bage pe ibabanalah dua ndukur ntah nderapati, sada man persembahen penasap dosa, sada nari man persembahen tutungen.
23Si enda kerina arus ibabana man imam i bas wari pewaluhken kenca lakon pembersihen e, i pintun Kemah.
24Ibuat imamlah biri-biri ras minak saitun e jenari ipersembahkenna jadi pemere si khusus man TUHAN guna imam.
25Igelehnalah biri-biri ndai, ibuatna sitik darehna, emaka itamaken ku cuping si kemuhen, ku kambal-kambal tan si kemuhen, ras ku kambal-kambal nahe si kemuhen kalak ndai.
26Iilingken imam lah sitik minak ku tapak-tapak tanna si kawes,
27emaka alu sada jari-jari tanna sikemuhen ipirpirkenna sitik pitu kali i adep-adepen TUHAN.
28Itamakenna lah sitik minak ndai ku inganna namaken dareh ndai, eme: cuping kalak ndai si kemuhen, kambal-kambal tanna si kemuhen, ras kambal-kambal nahe si kemuhen.
29Iba-iba minak si lit i bas tapak-tapak tan imam ndai isapuken imam lah ku takal kalak enda ndai: Alu bage nggo idalankenna lakon pembersihen.
30Kenca bage maka ipersembahkennalah sada ndukur ntah nderapati ndai
31jadi persembahen nasapken dosa, janah sada nari jadi persembahen tutungen radu ras persembahen pangan e. Bagenda lah ibahan imam ndahiken lakon pembersihen e.
32Enda me peraturen-peraturen man kalak si kena penakit kulit, tapi la ngasup ngelitken persembahen bagi semalna guna lakon pembersihen.
Rumah-rumah si dawanen
33Ibereken TUHAN man Musa ras man Harun
34peraturen-peraturen kerna rumah si dawanen. (Peraturen-peraturen enda gunana man bangsa Israel kenca ia bengket ku negeri Kanaan, si nandangi ibereken TUHAN jadi sikerajangen bangsa Israel.)
35Ise si ngidah dawan i bas rumahna, ikatakenna lah e man imam.
36Arus maka iperentahken imam gelah kerina isi rumah e ipedarat ope denga ipepayona dawan e; adi la bage iban, maka sinasa lit i bas rumah e ikataken la bersih. Kenca bage maka imam berkat ku rumah e,
37jenari ipepayonalah dawan e. Adi lit turah meratah-ratah ntah pe megara-gara si tempa-tempa nggo ipanna dingding e,
38itadingkenna ras ikuncina lah rumah e pitu wari dekahna.
39Pepitu wariken, arus maka mulihken ia ku je emaka ipepayona ka rumah e. Adi dawan e nggo erbelangna,
40iperentahkennalah maka batu dingding ingan dawan e turah iagui janah iambekken ku bas ingan si la bersih i darat kota.
41Kenca bage, arus ikis-kis kerina dingding rumah e si arah bas, emaka kerina plester si nggo ikis-kis ndai arus itanemken ku ingan si la bersih i darat kota.
42Kenca bage buat lah batu si mbaru nggantiken batu dingding si nggo iambengken ndai, jenari pergunaken lah plester si mbaru ngelapisi dingding ndai.
43Adi dawan ndai turah denga ka i bas rumah e kenca batu e iambekken, janah dingdingna pe nggo ikis-kis, ras nggo ka pe iplester mulihken,
44ipepayo imam lah mulihken. Adi dawan e nggo erbelangna, rumah e lanai bersih.
45Arus maka rumah e iruntuhken, janah kerina batuna, perkayunna, plesterna arus iangkut ndarat i bas kota e nari janah itamaken ku bas ingan sampah si tertentu.
46Ise bengket ku bas rumah e tupung rumah e sangana ikunci denga, ia nggo la bersih seh ben wari.
47Ise si medem ntah man i bas rumah e, arus maka icucina pakenna.
48Adi rumah e ipepayo imam ka mulihken, jenari dawan ndai lanai lit turah kenca nggo iplester, arus maka ikatakenna rumah e nggo bersih rikutken aturen agama, erkiteken dawan e lanai lit sitik pe i bas rumah e.
49Guna mbersihken rumah e rikutken aturen agama arus maka ibabana dua perik, sengkeret kayu aras, selambar benang gara, sentangke batang hisop.
50Igelehna lah perik e sada i babo sada kudin taneh si isin lau mbergeh i bas sumbul nari.
51Ibuatnalah batang aras, hisop, benang gara, ras perik si langa igeleh e, emaka icebukkenna kerina ku dareh perik si nggo igeleh ndai ras ku bas lau mbergeh e. Emaka ipirpirina lah rumah e pitu kali.
52Alu bage ibersihkenna me rumah e alu dareh perik, lau mbergeh, perik si nggeluh denga, batang aras, hisop ras benang megara e.
53Kenca bage maka ipekabangnalah perik si nggeluh denga ndai ku mbalmbal. Bagenda lah perbahan imam ngelakoken lakon pembersihen guna rumah e, gelah rumah e bersih rikutken aturen agama.
54Enda me peraturen kerna penakit kulit;
55eme ugah, bareh, ras dawan i bas paken ntah rumah.
56(Im 14:55)
57Peraturen enda nentukenca sada-sada barang la bersih dingen katawari ka nggo bersih rikutken aturen agama.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel