Alkitab Mobile SABDA
[VER] : [MADURA]     [PL]  [PB] 
 <<  Imamat 2 >> 

1Mon oreng ngatorragiya kurban sasajin ka PANGERAN, kurban jareya kodu aropa teppong se paleng bagus se eselene mennya’ jaitun ban epobuwi mennyan e attasanna.

2Sasajin jareya kodu egiba ka mam-imam toronanna Harun. Imam se atugas kodu ngala’ teppongnga sapergem, ban mennya’ jaitunna sarta mennyanna kabbi, pas ngobbar jareya kabbi e attassa mezba menangka tandha ja’ jareya eatorragi ka PANGERAN kabbi. Bauna kurban kakanan jareya masenneng panggaliyanna PANGERAN.

3Karena kurban sasajin jareya bagiyanna para imam. Kurban jareya talebat soccena sabab tamaso’ bagiyanna kakanan se la eatorragi ka PANGERAN.

4Mon kurban se eatorragiya aropa roti se epanggang e pamangganganna roti, rotina ta’ olle ragi’i; olle epakandel, adunna kodu kagabay dhari teppong se alos se eola ban mennya’ jaitun, olle keya ngangguy jajan se pera’ ebulidi mennya’ jaitun.

5Mon se eatorragiya jareya roti se epanggang e attasanna pamangganganna, roti jareya kodu ekagabay dhari teppong se alos se eola ban mennya’ jaitun, tape ja’ ragi’i.

6Roti se eatorragi ka Pangeran jareya kodu era’-kerra’, pas selene mennya’ jaitun.

7Mon se eatorragiya jareya roti se eola e paguringan, roti jareya kodu ekagabay dhari teppong se alos se eola ban mennya’ jaitun.

8Roti se ekagabay kalaban cara se kantha jareya kodu eatorragi ka PANGERAN ban epassra’agi ka imam se ngeba tor-ator jareya ka mezba.

9Imam ngala’ sabagiyan dhari roti jareya se pas eobbar e attassa mezba menangka tandha ja’ jareya kabbi la eatoraggi ka PANGERAN. Bauna kurban sasajin jareya masenneng panggaliyanna PANGERAN.

10Lebbina bagiyanna para imam. Roti jareya talebat soccena polana tamaso’ bagiyanna kakanan se la eatorragi ka PANGERAN.

11Kurban sasajin se eatorragiya ka PANGERAN ta’ olle campore maddu otaba ragi, sabab maddu ban ragi ta’ olle eobbar kaangguy tor-ator ka PANGERAN.

12Dhari hasella tana se dha’-adha’ sabban taonna, sabagiyan kodu eatorragi ka PANGERAN, tape ta’ olle eobbar e attas mezba.

13Saneyap kurban sasajin kodu bujai, jareya ja’ kaloppae sabab buja nandha’agi parjanjiyan e antarana ba’na ban Allahna. Daddi tor-atorra ba’na kodu bujai kabbi.

14Mon ba’na ngatorragiya gandum se eanye dha’-adha’ ka PANGERAN, giba gandum se esangngar otabana se la etoto epaalos.

15Gandum jareya kodu eselene mennya’ jaitun ban epobuwi mennyan e attasanna.

16Imam kodu ngobbar sabagiyan dhari gandum ban mennya’ jareya sarta mennyanna, menangka tandha ja’ jareya la eatorragi ka PANGERAN kabbi.



 <<  Imamat 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran