Alkitab Mobile SABDA
[VER] : [MAKASAR]     [PL]  [PB] 
 <<  1 Raja-raja 20 >> 

1Ri se’reang allo, Benhadad, karaeng Siria, napa’rappungangi sikontu tantarana, siagang 32 karaeng maraeng siagang kareta pa’bundukang siagang jaranna ke’nanga, nakurungi siagang nabunduki kota Samaria.

2Nampa nia’mo tau nasuro mange ri Ahab, karaeng Israel, ri anjo kotaya na napasang angkanaya,

3"Natuntukko Karaeng Benhadad sollanna nusare bulaeng, pera’, sikamma bainennu, siagang ana’-ana’nu kassaka."

4Appialimi Ahab angkana, "Paumi mae ri Karaeng Benhadad angkana situjua’. Akkullea’ nakammai siagang sikontu apa-apangku."

5Nampa ammotere’mo anjo sikamma tunisuroa mange pole ri Ahab untu’ ampabattui tuntutang maraenna Benhadad. Kammaminne apa natuntuka, "Riolo natuntuki karaenna ikambe sollanna nupassareang ri ia bulaeng, pera’ siagang sikamma bainennu, kammayatompa ana’-ana’nu.

6Mingka kamma-kamma anne lanasuroi battu perwira-perwira tantarana untu’ anggaledai balla’ kakaraengannu siagang balla’na sikamma pagawenu, nampa naalle ke’nanga sikamma apa nakanaya ke’nanga nia’ anggaranna. Labattui mae anrinni ke’nanga ammuko kira-kira ri kamma-kammana anne wattua."

7Jari nakio’ ngasemmi Ahab sikontu pamimpinna Israel na nakana, "Nusa’bi ngasemmi kalennu angkanaya anne taua erokki’ napanraki. Natuntuki sollanna kupassareang sikamma bainengku, ana’-anakku, kammayatompa bulaeng-perakku, siagang kusitujuimi anjo pappala’na ke’nanga."

8Nakanamo sikamma pamimpinga siagang ra’yaka, "Teaki’ jampangi karaeng. Teaki’ turukiangi ero’na ke’nanga."

9Lanri kammana anjo appialimi Ahab ri anjo sikamma tunisurona Benhadad angkana, "Pauangi karaennu, angkanaya kusitujui anjo uru natuntuka, mingka anne natuntuka makaruaya tena nakkulle kusitujui." Jari a’lampami anjo sikamma tunisuroa nampa ammotere’ mange ri Ahab pole angkana,

10"Lanakiringi karaenna ikambe sanna’ jaina tantara untu’ angngancuruki kotanu, sa’genna manna limbu’bu’na anne kotanu akkulle tongi naangka’ ke’nanga naporo limannaji bawang nabonei. Assumpai angkanaya poro nihukkungi ri rewata-rewataya, ba’lalo manna pole nibunoi, punna tena nanagaukang anjo kammaya!"

11Appialimi Ahab angkana, "Pauangi Karaeng Benhadad angkana tantara sitojennaya nampami akkulle nakana pore kalenna punna le’ba’mo a’bundu’, teai ri tenanapa nale’ba’ a’bundu’."

12Nipabattumi anjo pappialinna Ahab mae ri Benhadad ri wattunna sitabang angnginung-nginung siagang karaeng-karaeng maraeng naaganga sita’gala’ lalang ri kemana ke’nanga. Nalangngere’na Benhadad anjo, naparentakammi sikontu perwira tantarana untu’ sadia mange ambunduki Samaria. Jari sadia-sadia ngasemmi ke’nanga.

13Lalang anjo wattua, nia’mo sitau na’bi mange ri Karaeng Ahab na nakana, "Nakana Batara, ‘Nuciniki anjo tantara jaia? LaKusareko pammetang mae ri ke’nanga anne alloa. Lanuassengi angkanaya iNakkemi Batara.’"

14Akkuta’nammi Ahab angkana, "Inai rolong musti maju?" Appialimi anjo na’bia angkana, "Tantara rungka-rungkaya, pangawala’na sikamma kapala daeraya. Kammaminjo kananNa Batara." Akkuta’nammi pole karaenga angkana, "Na inai ampimpingi anjo lamajua?" Appialimi anjo na’bia angkana, "Ikatte kalenta".

15Jari napagio’mi karaenga sikamma tantara rungka-rungkaya pangawala’na sikamma kapala daeraya. Yangasenna nia’ 232 tantara. Nampa napakammatommi anjo tantara Israel. Yangasenna nia’ 7.000 jaina tau.

16Appakkaramulai maju ri wattunna allo, ri wattu sitabanna angnginung-nginung Benhadad siagang anjo tallumpuloa karaeng naaganga sita’gala’, sa’genna nasa’ring ke’nanga lalang ri kemaya.

17Ia majua la’bi riolo iamintu anjo tantara rungka-rungkaya. Tau nasuroa Benhadad untu’ angngodoki musua, battumi a’laporo’ mae ri Benhadad angkanaya nia’ sipa’rappungang tantara lalang pa’jappang ero’ ambattui ke’nanga, battu ri tujunna Samaria.

18Naparentakammi Benhadad sollanna nijakkala’ attallasa’ anjo tantara musua, natanijampangia angkanaya apa eroki battu ke’nanga untu’ a’bundu’ yareka untu’ assibajiki.

19Anjo tantara rungka-rungka napagioka Karaeng Ahab appakkaramulai gio’ battu ri Samaria, nipinawangi ri tantara Israel.

20Massing nabunomi ke’nanga musu nadallekanga. Larimi tu Siria, na niondang ri tu Israel. Mingka ta’lappasaki Benhadad. Lari siagang jaranna, nirurungang ri siapa are tantarana a’jaranga.

21Amminawang tongi Karaeng Ahab a’bundu’, na naancuru’ kareta-kareta pa’bundukanna musua siagang nabuno jaranna. Anjo alloa nibeta lompoi tu Siria.

22Nampa battumo pole anjo na’bia mange ri Ahab siagang angkana, "Kamma-kamma anne bajikangngang ammotere’ maki’ siagang kikassakki kalenta, kammayatompa apparekki’ rancana bajika, nasaba’ labattu iji karaeng Siria ammajuiki’ ri wattu pakkaramula accu’la’na sikamma poko’-poko’ attallasaka."

23Sikamma perwira tantarana Benhadad nakana ri Benhadad, "Rewata-rewata nasombaya Israel koasai ri pa’monconganga, iaminjo saba’na nanabetaki’ anjo bansaya. Mingka mattantu akkullei nibeta ke’nanga punna rawaki’ ri lapparaka a’bundu’.

24Bajiki punna kisambei kamma-kamma anne anjo tallumpuloa anrua karaeng siagang perwira tantara kalenta.

25Nampa musti kipagioki pasukang sangkammaya jaina siagang anjo pasukang le’baka nibeta, kammayatompa jarang siagang kareta pa’bundukang sangkammaya todong jaina anjo rioloa. Laniewai a’bundu’ anjo bansa Israel rawa ri lapparaka, nakimattantu lammeta kamma-kamma anne." Situjumi Karaeng Benhadad, nampa naturuki ero’na anjo sikamma perwira tantarana.

26Ri wattu appakkaramulanamo accu’la sikamma poko’-pokoka, napagio’mi tantarana battu ri kota Afek untu’ ammajui tu Israel.

27Na tu Israel napasadia tommi tantarana nampa napagio’ ke’nanga. Nampa majumo anjo tantarana Israel lalang rua pasukang, nampa akkema sidallekang siagang anjo tu Siria. Punna nipasimbandingi anjo tantara Siria jaia tassiara’ anrassi anjo daeraya, sangkammaji nicini’ tantara Israel ruang pa’rappungang bembe.

28Nampa nia’mo sitau na’bi battu mae ri Karaeng Ahab siagang angkana, "Iaminne Nakananga Batara: ‘Lanri anjo tu Siria nakanangi ri daera pa’moncongangi bawang jari kakoasangKu na tena ri lappara’ rawaya, laKusareko pammetang mae ri anjo tantarana ke’nanga, sannaka ta’liwa’na jaina. Ikau siagang ra’ya’nu lanuassengi angkanaya iNakkemi Batara.’"

29Tuju allo sallona tulusu’ lalanna massing ri kemana tu Siria siagang tu Israel, assidale’-dallekang ke’nanga. Ri makatujuna alloa appakkaramulami ke’nanga simajui a’bundu’. Lalang ri anjo pa’bundukanga nia’ 100.000 tu Siria nibuno ri tu Israel.

30Sikamma tau lappasaka, lari mange ri kota Afek, mingka rumbangi tembo’na anjo kotaya, na nia’ 27.000 tau ri ke’nanga nituju. Lari tommi Benhadad mange anjoreng ri kotaya nampa accokko ri se’reang balla’ ri kamara’ bageang lalang.

31Battumi sikamma perwira tantarana angkana, "Nakana taua, karaeng-karaenna Israel sangnging karaeng lompo pangngamaseang. Lanri kammana, kipa’biammi ikambe mange andallekang ri karaeng Israel ammake kaeng karung a’jari pammatei sesse’ lalang siagang otere’ ri kallong a’jari pammatei tau tundu’. Poro tena laloja nabunoki’ karaenga."

32Jari ammakemi ke’nanga kaeng karung siagang otere’ ri kallong, nampa a’lampa ke’nanga mange andallekang ri Ahab siagang angkana, "Benhadad iami atanna karaenga. Napalaki ri katte sollanna tena nakibunoi." Appialimi Ahab angkana, "Attallasa’ ijika anjo sari’battangku?"

33Memang anjo sikamma perwira tantarana Benhadad natayangi anjo tanra bajika kammaya battu ri Ahab. Jari, nakanana Ahab, "sari’battang," appialimi linta’ ke’nanga angkana, "Iye’ kammatojengi anjo Benhadad sari’battanta." Nakanamo Ahab, "Antaraki mae!" Battuna Benhadad, nikio’mi ri Ahab nai’ ri karetaya.

34Nampa nakanamo Benhadad ri ia, "Lakupoterangi mae ri katte kota-kota le’baka narampasa’ manggeku battu ri manggeta. Akkulle tongki’ ambangung tampa’ pa’danggangang ri kota Damsyik sangkamma nagaukanga manggeku ri Samaria." Appialimi Ahab angkana, "Battu ri anjo janjinta nakulappassangki’." Le’baki anjo appare’mi Ahab parjanjiang siagang Benhadad, nampa nalappassang Benhadad.

35Lanri parentaNa Batara, nia’mo sitau na’bi battu ri pa’rappunganna anjo na’bia ansuro ba’ji anjo aganna. Mingka taerokai anjo aganna.

36Nakanamo anjo na’bia, "Lanri tenana nanugaukangi parentaNa Batara, lanibakkaiko ri singa tena nasallo ammotere’nu battu anrinni." Kammatojengi. Tena nasallo ammotere’na battu anjoreng, nibakkaimi nanikokko’ ri sikayu singa.

37Nampa a’lampa anjo na’bia mae ri tau maraenga siagang nakana, "Ba’jia’!" Jari niba’jimi nipisannakki sikali ri anjo taua, sa’genna loko’.

38Le’baki anjo naroko’mi rupanna anjo na’bia siagang sipolong kaeng, sollanna tena naniassengi ri taua, nampa a’lampa ammenteng ri biring aganga antayangi panumalona karaeng Israel.

39Numalona karaenga, akkio’mi anjo na’bia angkana, "O Karaeng Mala’biri’, ri wattungku a’bundu’ ri tampa’ pa’bundukanga nia’ tau angngerang mae ri nakke sitau musu nijakkalaka. Nakana anjo taua, ‘Jagai anne taua baji’-baji’. Punna lari, kau musti ansambeangi nibuno yareka a’bayara’ 3.000 doe’ pera’.’

40Mingka ri boko, ri wattungku sibu’, larimi anjo taua." Appialimi karaenga angkana, "Ikau tonji antappuki hukkunganga mae ri kalennu. Musti nutanggongi anjo hukkunganga."

41Nasungkemi pa’roko’ rupanna anjo na’bia, nampa niassemmo ri karaenga angkanaya na’bi anjo taua.

42Jari nakanamo anjo na’bia ri karaenga, "Iaminne Nakananga Batara: ‘Tau Kuparentakanga Kusuro buno nulappassammi attallasa’. Lanri kammana anjo musti mateko a’jari sambenna. Tantaranu laancuruki lanri nalappassanna lari tantara musua.’"

43Ammotere’mi karaenga mange ri Samaria. Sanna’ lussa’na siagang sanna’ larrona pa’mai’na.



 <<  1 Raja-raja 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran