Alkitab Mobile SABDA
[VER] : [MAKASAR]     [PL]  [PB] 
 <<  Imamat 2 >> 

1Punna nia’ tau assare koro’bang nipatala mae ri Batara, anjo koro’banga musti a’rupa labu’ kaminang bajika, ia nitirikia siagang minynya’ zaitun siagang nisarea kamanynyang rateanna.

2Musti naerangi mange ri imang jari-jarina Harun. Imang tugasaka anjo wattua musti naallei sikangkang anjo labuka siagang minynya’ zaitunna kammayatompa sikontu kamanynyanna, nampa natunu irate ri tampa’ pakkoro’bangnganga, salaku pammatei angkanaya yangasenna anjo nipassareang ngasemmi mae ri Batara. Rasanna anjo koro’bang kanrea lanapakasannangi nyawaNa Batara.

3La’binna anjo koro’bang nipatalaya iaminjo bageanna sikamma imanga. Anjo koro’banga teai sipato’ tangkasa’na lanri niallei battu ri kanre le’bakamo nipassareang mae ri Batara.

4Punna anjo napassareanga roti nitunu lalang ri pattunuang rotia, anjo rotia musti tena nammake pa’gambang. Anjo rotia akkullei kapala’, nipareka battu ri leokang labu’ alusu’ siagang minynya’ zaitun; akkulle tongi kanrejawa nisapua siagang minynya’ zaitun.

5Punna anjo roti napassareanga iamintu roti nilanggaya irate ri pa’langganga, anjo rotia musti nipareki battu ri labu’ alusu’ nileoka siagang minynya’ zaitun, mingka takkulleai ammake pa’gambang.

6Anjo roti nipassareanga musti nipue-puei, nampa nitiriki minynya’ zaitun.

7Punna anjo roti napassareanga iamintu roti nipallu ilalang ri pamajaka, anjo rotia musti nipareki battu ri labu’ alusu’ nipasileoka siagang minynya’ zaitun.

8Anjo roti nipare’ kammaya musti nipassareangi mae ri Batara siagang nipassareangi mae ri imanga nampa naerang mange ri tampa’ pakkoro’bangnganga.

9Naallei imanga sipa’gang anjo rotia nampa natunu irate ri tampa’ pakkoro’bangnganga a’jari pammatei angkanaya yangasenna anjo nipassareang ngasemmi mae ri Batara. Rasanna anjo koro’banga lanapakasannangi nyawaNa Batara.

10La’binnaya, iaminjo bageanna sikamma imanga. Anjo rotia teai sipato’ tangkasa’na lanri niallei battu ri kanre le’bakamo nipassareang mae ri Batara.

11Koro’bang nipatalaya mae ri Batara takkulleai nipa’bengkoro’ siagang bani yareka pa’gambang, lanri anjo je’ne’ bania siagang pa’gambanga takkulleai nitunu untu’ a’jari passare mae ri Batara.

12Battu ri wassele’ buttaya, ia bungasa’ niallea tunggala’ taung, musti nipassareangi sipa’gang mae ri Batara, mingka takkulleai nitunu irate ri tampa’ pakkoro’bangnganga.

13Tunggala’ koro’bang nipatalaya musti nice’lai, lanri anjo ce’laya a’jari pammatei ri parjanjianNa Allata’ala siagang ikau ngaseng. Jari sikontu anjo passarea musti nice’lai.

14Punna assareko koro’bang mae ri Batara, iamintu gandung bungasa’ nukattoa, erangi anjo gandung berua ia le’baka nidengka sa’genna alusu’ yareka le’baka nilangga.

15Anjo gandunga musti nitiriki minynya’ zaitun siagang nisarei kamanynyang irateanna.

16Imanga musti natunui sipa’gang anjo gandunga siagang anjo minynyaka kammayatompa sikontu anjo kamanynyanga, a’jari pammatei angkanaya yangasenna anjo le’ba’ ngasemmi nipassareang mae ri Batara.



 <<  Imamat 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran