1A’bicarai Batara ri nakke Nakana,
2"He tau, sadia mako untu’ angngadeli anjo kota rassia pabuno? Picinikiangi sikontu panggaukanna appakaringika."
3Nasuroa’ Batara Kaminang Tinggia ampabattui anne pasanNa mae ri Yerusalem, angkana, "Ikau salako lanri le’bakko ammuno jai tau battu ri pandudu’nu tonji, siagang nura’massi kalennu lanri anynyombako mae ri barhala-barhala nupareka kalennu. Lanri kammana anjo a’reppese’mi wattunnu laniadeli siagang lanarapi’mi kala’busang riwaya’nu. LaKubalang parekangko nicau-cau siagang nikakkali ri bansa-bansaya siagang ri sikontu pa’rasanganga.
4(22:3)
5Lanicau-cauko ri pa’rasangang-pa’rasangang bellaya siagang ambania lanri tuli nudakkai hukkunga siagang paratoranga.
6Sikontu pamimpinna tu Israel napattoangi kagassingang kalenna siagang nagaukangi ammunoa.
7Tena manna sitau battu ri pandudu’nu ampakalompoi tau toana. Nutipui bansa maraeng niaka annompang siagang angngalleko passawallang battu ri kasusaanna jandaya siagang ana’ kukanga.
8Tampa’-tampa’ ibadaya mae ri Nakke nura’massi siagang tena nanujampangi allo Pammari-marianga.
9Ri alla’na pandudu’nu nia’ tau nangai appasisala-salaya siagang ampitinai paranna tau sollanna nanihukkung mate anjo paranna tau. Nia’ todong nangai angnganre dageng le’baka nikoro’bangkang mae ri barhalaya. Nia’ todong nangai a’gau’ bawanga.
10Nia’ todong angngodoki siagang angngagangi sikatinroang amma’ aona, baine battua bulanna,
11bainenna paranna tau, yareka mintunna, yareka andi’ aona.
12Nia’ todong a’jari pabuno nigaji, nangaia ampaccoki julu bansana. Kabusu’na ke’nanga nakaluppaiMa’. INakke, Batara Kaminang Tinggia, anne akkana.
13Mingka kamma-kamma anne laKudengkai sikamma paellaka siagang pabuno taunu.
14Maka barani ijako yareka gassingijako untu’ angngangkaki limannu ri wattunnu le’ba’ Kuhukkung? INakke, Batara Kaminang Tinggia anne akkana, siagang laKupa’rupai apa le’baka Kupau.
15LaKupasisa’la’-sa’laki pandudu’nu mange ri sikontu pa’rasanganga siagang bansaya, siagang laKupammari anjo panggaukang ja’dala’nu.
16Ikau lanihinako ri bansa-bansa maraenga; nampa nuassemmo angkanaya iNakke Batara."
17Nakana Batara ri nakke,
18"He tau, anjo tu Israel tena matu-matunna mae ri Nakke. Rapangi ke’nanga tai bassi campurang, rapang tambaga, tima, bassi siagang tima le’leng tassesaya ri wattu le’ba’na nipakati’no’ peraka lalang ri pepeka.
19Jari kamma-kamma anne, iNakke, Batara Kaminang Tinggia, ampaui mae ri ke’nanga angkanaya anjo ke’nanga rapangi anjo bassi tenaya matu-matunna. Sangkamma lisere’ pera’, tambaga, bassi, tima le’leng siagang tima kebo’ nipantama ri pattunuanga untu’ nipakati’no’, kammatommi anjo laKupasse’rei ke’nanga siagang Kuerangi mange ri Yerusalem. Pangngalarroi lompoKu lampassolongi ke’nanga rapang pepe’ ampassolongi lisere’-lisere’ bassia.
20(22:19)
21Iyo, laKupasse’rei ke’nanga ri Yerusalem, Kuparinrai pepe’ pangngalarroingKu irawanganna ke’nanga, sa’genna ancuru’ assolong ke’nanga.
22Sangkamma pera’ nipassolonga lalang ri pattunuanga, kammatommi anjo batena lanipassolong ke’nanga ri Yerusalem. Jari naassemmi ke’nanga angkanaya iNakke, Batara, ampabattui pangngalarroingKu mae ri ke’nanga."
23A’bicarai pole Batara ri nakke, Nakana,
24"He tau, paui mae ri tu Israel angkanaya ra’masaki buttana ke’nanga, siagang lanri kammanami anjo naKularro siagang Kuhukkungi ke’nanga.
25Sikamma pamimpinna rapangi singa ammammuka ri le’ba’na angngokko’ apa-apa. Nabunoi ke’nanga ra’yaka, narampasaki sikontu barang-barang siagang kakalumanynyangngang nabuntuluka siagang jai tubaine janda napakamma ke’nanga.
26Sikamma imanna tu Israel nadakkai hukkung-hukkungKu siagang nara’massi apa-apa le’baka nisa’la’ untu’ iNakke. Tena napasimmaraengi ke’nanga angkanaya kereanga hallala’ siagang kereanga harang. Tena todong naajaraki ke’nanga ra’yaka untu’ ampasimmaraengi angkanaya kereanga tangkasa’ siagang ra’masa’ manuru’ paratorang agamaya. Tena najampangi ke’nanga allo Pammari-marianga. Lanri kammanami anjo nanahinaMa’ bansa Israel.
27Sikamma pagawe-pagawe pamarentana rapangi serigala angkae-kaei apa nakokkoka. Nagaukangi ke’nanga ammunoa lanri poro ero’na anggappa passawallang.
28Sikamma na’bia nacokkoi anjo dosa-dosaya; rapangi ke’nanga tau appa’leoki tembo’ ra’masa’. Paccini’-paccini’na ke’nanga sangnging tena nakontutojeng; kammayatompa sikamma botona ke’nanga sangnging balle-balle. Naani ke’nanga angkanaya anjo pasang napabattua ke’nanga iamintu pasang natarima battu ri Batara Kaminang Tinggia, padahala’ tena sikali-kali Kule’ba’ a’bicara mae ri ke’nanga.
29Sikamma tau kalumanynyanga annipui siagang angngellaki. Appaero’-eroki ke’nanga appanggaukang mae ri tau kasi-asia siagang napangngallei passawallang bansa maraeng annumpanga.
30Ri alla’na anjo tu Israel, a’boyA’ tau akkullea ambangung tembo’, yareka ammenteng ri tampa’-tampa’ runtunga tembo’na untu’ ampartahangkangi anjo pa’rasanganga punna erokKa’ angngancuruki lalang a’bettese’na larroKu; mingka manna sitau tania’ Kubuntulu’.
31Lanri kammana anjo kamma-kamma anne Kupabattumi pangngalarroingKu mae ri ke’nanga, siagang rapang pepe’ laKupanraki ke’nanga lanri sikontu panggaukanna ke’nanga. INakke, Batara Kaminang Tinggia, anne akkana."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel