Pilé Ata Israél
1Aku tombo ata molor agu toé nggopétk, ai aku mosé neki-ca agu hi Kristus. Ici naig lut téi saka-si lorong titong de Nai Nggeluk,
2te aku ngawa-ngaés agu wéong kéta naig.
3Ngot aku ngoéng te mawang agu bégas oné mai hi Kristus, landing kaut le nuk asé-ka’ég, ata ca wa’u agu akus.
4Isé ata Israél, ata poli tétid ciri anaks, agu poli tiba mengit, reké, ngaji agu wintuk Taurat.
5Isé waé de empo ata loas Mésias. Hia béta-mai sanggéd cao-ca. Hia hitu Mori Keraéng ata patun te naring tédéng lén. Amén!
6Maik reké de Mori Keraéng, toét-toé rapaky. Ai toé sanggén ata situt mai oné mai Israél ata pilé le Mori Keraéng.
7Nenggitu kolé toé sanggén ata situt bilang waé di Abraham ngong anak di Abraham taungs, maik: “Hanang oné mai waé di Ishak te caro waé de hau.”
8Betuan: Toé sanggéd anak lut weki situt caro sanggéd anak de Mori Keraéng, maik sanggéd anak landing le reké ata caro nenggitu.
9Ai reké de Mori Keraéng nenggo’oy: “Du cekeng nenggo’o aku te mai, du hitu kole hi Sara mangag anak ata ronan.”
10Maik toé hitu kanang. Céwé si’ang kolé hi Ribka, loas sua taus anak ata rona oné mai hi Ishak, empo dité.
11Ai du sanggéd anak situ toéd loas agu toéd pecing te pandé di’a ko da’at, kudut ngoéng de Mori Keraéng te wakéy latang te pilé Diha. Toé landing le pandé, maik landing le bénta Diha --
12ného hitut poli taé agu hi Ribka, “Anak ata ngaso te ciri mendi de anak-cucu,”
13ného manga tulis oné Surak Nggeluk: “Momang Laku hi Yakob jogot Laku hi Esau.”
14Émé nggitu gi, apa ata kudut curup lité? Asa, toé agiln Mori Keraéng ko? Toé ta!
15Ai Hia curup agu hi Musa: “Aku momang ata siot ngoéng momangs Laku, agu séndé ata siot ngoéng séndés Laku.”
16Jari, wérét situ toé lorong ngoéng ko rébok de manusia, maik lorong momang de Mori Keraéng.
17Ai oné Surak Nggeluk Mori Keraéng taé oné hi Firaun, “Itu tara Aku téti hau, kudut Aku toto kuasag oné hau, agu kudut mésén ngasang Daku oné temu tana lino.”
18Jari, Hia momang latang te céi kaut ata ngoéng Diha agu pandé kembe-lu’ak céi kaut ata ngoéng Diha.
19Ho’o ga, méu te curup agu aku, “Émé nggitu gi, apan kolé ata salan Liha? Ai céi ata ngancéng dungkang ngoéng Diha?”
20Céing kéta néng méu, oé manusia, wiga méu ngancéng léwang Mori Keraéng? Ngancéng weli hiat dédék latay taé agu hiat dédékn, “Co’o tara nenggitu dédékg aku le hau?”
21Asa weli ga, isét dung lewing toé weli nia-ngoéngd kudut te pandé gelo oné-mai tana liling situt camas? Ngancéng liha pandé can gelo ata di’an agu can kolé ata toé di’an.
22Jari, émé Mori Keraéng kudut toto cumpeng agu kuasa’N, Hia toto lembak mesén latang te isét kudut wahéng Liha, ai isé ata poli pandé rabon Hia. Ai poli mengkekn Liha te pandé ampus.
23Mori Keraéng kolé ngoéng te toto bora mengit Diha, latang te sanggéd ata momang Diha ata poli mengkekd latang te mengit,
24ngong ité ata poli bénta Liha toé hanang oné mai ata Yahudi, maik oné mai wa’u bana kolé.
25Cama ného ata poli taéN Liha oné surak di Nabi Hoséa, “Ata toé ro’éng Daku, te caro ro’éngs Laku, agu wa’u ata toé momangs, ciri momangs Laku.”
26Agu oné osang nia te curup agu isé, “Méu toé ro’éng Daku.” Nitu kudut te curup agu isé, “Meu ho’o anak de Mori Keraéng ata mosé.”
27Agu hi nabi Yésaya curup latang te wa’u Israél, “Koném po nekid wa’u Israél cama ného laing sili tacik, maik hanang récid ata tiba selamak.
28Ai apa ata poli curup Liha, te pandé le Mori Keraéng oné lino, jepek agu gélang kéta.”
29Cama ného ata poli taé li nabi Yésaya bebolon, “Émé Mori Keraéng de lino ho’o, toé reding ité anak, ité poli ciri mempo cama ného béndar Sodom agu Gomora.”
Selamak Data Wa’u Bana Agu Wéléng de Wa’u Israél
30Émé nggitu gi, apa ata kudut tombo lité? Kali wa’u bana ata toé kawé selamak, poli tiba selamak, ngong selamak ali imbid.
31Maik ata Israél, koném po dolong wintuk hitut kudut main selamak, toé laong caid oné wintuk hitu.
32Co’o tara toén? Ai isét Israél dolong wintuk hitu toé landing le imbi, maik lorong pandéd. Isé do’ong oné watu ata pandé pangga,
33ného manga ata poli tulis: “Ata tu’ungn, Aku na’a oné Sion ca watu timpok te pandé pa’u ata, agu céing ata imbi oné Hia, toé manga majan Liha.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel