Alkitab Mobile SABDA
[VER] : [MONGONDOW]     [PL]  [PB] 
 <<  Lukas 20 >> 

1Kon singgai tobatuí, ki Yesus yogot motunduí bo mopoyaput in Habar Mopia nongkon i Allah kon intau mita inta kom bonu im Baḷoi Tuhan. Imang mita itoi, mototunduí mita kon agama, bo itoi mita intau Yahudi namangoi,

2bo noguman ko'i Yesus nana'a, "Pogumankah ko'inami mongo kawasa i ine im pinakeí-Mu mogaid kon tua mita, bo ki ine nobogoi ing kawasa tatua ko'i-Nimu?"

3Tubag i Yesus ko'i monia, "Aku'oi im moliboí doman ko'i monimu. Pogumankah ko'i-Nakoí.

4Baptisan i Yohanes tua nongkon i Allah mongo nongkon intau?"

5Daí mosia noyosingog mongo onu im potubag, kai monia, "Aka tubagan naton nongkon i Allah, daí Sia im moliboíbií nana'a, 'Aka natua yo nongonu sim mo'ikow in diaíbií mopirisaya ko'inia?'

6Ta'e aka tubagan naton, 'Nongkon intau, daí intau mita tanion mogarabbií im batu ko'inaton,' sim mosia im mopirisayabií kong ki Yohanes tua in tobatuíbií nabi."

7Daí mosia notubag nana'a, "Diaí kota'auan nami."

8Daí ki Yesus noguman ko'i monia, "Aka natua yo diaí doman poguman-Ku ko'i monimu mongo kawasa i ine im pinakeí-Ku nogaid kom bayongan tua."

9Ki Yesus nongonguman doman kon intau mita porumpama'an tana'a, "Oyuíon intau nogaid kong gobaí bo pino'muḷa'annya kon anggur. Onda intua pinotomoyoknya kom mototomoyok mita bodongka minayak in lipuí ibanea no'onggot kon tua.

10Onda in wakutunyadon mosipuí kom bungai in anggur, ki togi gobaí tatua nopotabaí im bobantungnya tobatuí minayak kom mototomoyok mita tatua sim mogamaí kon silainya. Ta'e mototomoyok mita tatua tongaíbií nomongkug kom bobantung tatua poḷat pinoki'pobuian monia, bo diaí inogoian in onu bo onu.

11Onda intua ki togi gobaí bui nopotabaí im bobantungnya ibanea, ta'e bobantungnya tatua binongkug doman monia poḷat pinoko'po'oyakmai bodongka pinoki'pobuian, diaí doman inogoian in onu bo onu.

12Daí buipa doman ing kitogi gobaí tatua nopotabaí kom bobantungnya intoḷunya, ta'e bobantung tatua sinomu doman monia binongkug bo dongka pinogarab kon ḷuai ing gobaí.

13Pangabisannya ki togi gobaí norai nana'a, 'Onupa degaí in aidanku? Oh..., potabaíkudon ing ki adiíku inta kotabi-tabiku. Aka sia yo pasti ko'insimbií monia.'

14Ta'e naonda im mototomoyok mita tatua noko'ontongmai ko'i adiínya tatua, mosia noyosingog bo noguman nana'a, 'Sia na'a inta mogabat kong kapunya'an i amaínya. Igai baí limodon naton in sia, simbaí mo'ilabuídon ko'i naton ing gobaí tana'a.'

15Daí pinogarabdon monia in adií tatua kon ḷuai ing gobaí bodongka ilimod." Bo ki Yesus noliboí ko'i monia, "Yo aka ki togi gobaí tatua bo mobuidon mangoi, yo onu in aidannya kom mototomoyok mita tatua?

16Notantuí bidon kom mamangoi in sia molimod kom mototomoyok mita tatua, bo gobaí tatua im potomoyoknyadon kom mototomoyok ibanea." Nokodongogmai kon tua, intau mita noguman ko'i Yesus nana'a, "Poyayukdon ka'asií."

17Bo nobobui ing ki Yesus ko'i monia bo noliboí, "Aka natua yo onubií im mangale inta aim pinais kom Buk Mosuci nana'a? 'Batu inta iḷumbuídon in intau mita inta mogogaid kom bangunan nobaliídon batu inta baraguna totok.'

18Intau mita inta noḷabuí kom batuí tatua morimumud, bo ki ine ing kolintogannea mobalií ḷobud."

19Mototunduí mita kon agama bo imang mita itoi nonota'au, kom porumpama'an-Nya tatua pinomakusud-Nyabií ko'i monia, sahingga in ramijiondon monia bo domokon in Sia kon dodai intua. Ta'e mosia mo'ondok kon intau mobayong tatua.

20Mototunduí mita kon agama bo imang mita itoi umuran monarukira makow ko'i Yesus. Kon tua mosia nonondan kon tobatuí intau inta mayak ko'i Yesus bo ki ubo-uboḷmai naí intau mopia. Mosia nokiliboí in soaáḷ inta inanggap monia mota'au ko'uliían monia kon taḷa i Yesus, sahingga oyuíondon im baliíon monia dodoyonan podomokkan ko'i-Nia bo posarahkan ko'i gubernur.

21Daí intau mita inta ain sinokoubolian tatua noliboí ko'i Yesus, "Pak Guru, kino'ta'auanbií nami kom bayongan inta siningog bo inta sinunduí i Pak Guru tua ing komintanbií totu'u. Kino'ta'auan doman nami kong ki Pak Guru im motunduí umuranbií taran-tarangan moguman kon onu ing ko'ibog i Allah. Sing ki Pak Guru in diaíbií momomilií kon intau.

22Tuamai pogumankah ko'inami, aka podudui in hukum agama naton, mota'au degaí andeka diaí im moguboli kom pajak ko'i Kaisar?"

23Ta'e kinota'auanbií i Yesus im makusud monia tua. Tuamai Sia noguman,

24"Po'ontongkah ko'i-Nakoí in tobatuí doit perak." Bo Sia noliboí, "Gambar bo tangoi ine in na'a?" Daí kai'n tubag monia, "Gambar bo tangoi i Kaisar!"

25Daí ki Yesus noguman ko'i monia, "Aka natua yo ogoidon ko'i Kaisar onu inta patus ogoi ko'i Kaisar, bo ogoi ko'i Allah onu inta patus ogoi ko'i Allah."

26Kon tayowon intau moaíntoí tatua, mosia diaí noko'ulií kon taḷaí i Yesus tobatuípamai. Sedang bo tongaíbií noherang totok im mosia nokodongog kon tubag-Nya tatua, daí dongkadon kibio-bioímai im mosia.

27Tongonumai intau in Saduki namangoi ko'i Yesus. (Mosia na'a ing kolompok intau inta moguman kon intau minatoi in diaíbií mobiag bui.) Mosia noliboí ko'i Yesus,

28"Pak Guru, ki Musa nomais kon hukum tana'a ko'i naton: Aka tobatuí ḷoḷaki inta ain nobuḷoi bo minatoi, ta'e diaípa kogadií, daí ki utatnya ḷoḷaki im mustibií mobuḷoi ko'i baḷunya tua, simbaí sia mobogoi ing katurunan ko'i utatnya inta ain minatoi.

29Noko'imontandon nobalií kom pitu mogutat inta komintan ḷoḷaki. Inta guya-guyang nobuḷoi kon tobatuí bobay. Ta'e ḷoḷaki tatua minatoi diaípa kogadií.

30Daí bobay tatua bui bo pinobuḷoi i ai-ainya induanya, ta'e minatoi doman ing ki ai-ainya tatua diaípa doman kogadií.

31Natua turus in nobalií ko'i ai-ainya intoḷunya dapot impitunya. Mosia nodait minatoi takin diaí kogadií.

32Pangabisannya bobay tatua minatoi doman.

33Yo naíonda intua? Ki ine ing ki buḷoi im bobay tatua kon sigad nayapitu tatua aka kon singgaidon kobiagan bui intau mita minatoi, sin tayapitu tua komintanbií ain notonibuḷoi takin bobay tatua?"

34Daí ki Yesus noguman ko'i monia nana'a, "Intau mita inta nobiag masa in na'a mobuḷoi ande mokipobuḷoibií mita,

35ta'e intau mita inta patus biagon bui nongkon kinopatoiannya, bo mobiag kon masa inta mo'iduduimai, mosia tua in diaí bidon bui morobuḷoi ande mokipobuḷoi.

36Sing ka'ada'an monia tua in naíonda bidon bo malaekat inta diaí bidon mato-matoi. Mosia tua inta sinangoian ki adií mita i Allah sin aindon biniag bui nongkon kinopatoian monia.

37Ki Musa tontanií aindon noguman kon intau minatoi in totu-totu'ubií kom biagon bui. Tua im pinaisnya kom Buk Mosuci inta nongonguman kon onu in inontongnya kon yuaí-yuaík in diaít. Kon tua ing ki Tuhan sinangoinya, 'Ki Allah i Abraham, i Ishak bo i Yakub.'

38Sia in de'emanbií ki Allah intau minatoi, ta'e ki Allahbií in intau inta nobiag. Sing kon tayowon i Allah komintan intau im mobiagbií."

39Nokodongogmai kon tua, tongonumai im mototunduí mita kon agama noguman nana'a, "Tubag i Pak Guru tua im mopia totok."

40Tuamai diaídon kobalií nopolibo-liboí im mosia ko'i Yesus.

41Bo ki Yesus noliboí ko'i monia, "Naíonda sin intau im mogumanbií kon Raja Mopoposaḷamat tatua ing katurunanbií i Daud?

42Padahaḷ ki Daud tontanií ain nomais kom bonu im buk Mazmurnya nana'a, 'Ki Tuhan aindon noguman ko'i Tuangku: lituídon kon dotaí ing koḷanan-Ku,

43modapot in saturumu mita baliíon-Ku tumungkud ko'i-Nimu.'

44Daí aka ki Daud tontanií monangoi ko'i-Nia ki Tuangnya, yo naíondabií sin Sia in tangoionbií doman ki adiínya?"

45Koyogotpa intau mita mokidongogmai ko'i-Nia, ki Yesus nongonguman doman kom murií-Nya mita nana'a,

46"Mokopo'ingat mo'ikow kom mototunduí mita kon agama. Mosia tua in mo'ibo-ibog mogiḷambung mo'onag aka maya-mayak makow, bo mo'ibog doman totok hormaton kom pasar mita. Mosia tua im mo'ibo-ibog doman limituí kom muna totok aka kom baḷoi pososambayangan bo kom pesta mita.

47Mosia tua mongongakaḷ kon intau inta dongkadon boba-bobay bo mogagow kom baḷoi monia. Bo oaíid monia inta mora'at tatua olingoian monia in sambayang inta moḷanggoí! Hukuman ko'i monia tua in nopastibií kom mobogat totok!"



 <<  Lukas 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel