Alkitab Mobile SABDA
[VER] : [MONGONDOW]     [PL]  [PB] 
 <<  Roma 7 >> 

1Utat mita! Mo'ikow komintandon nonota'au kon hukum. Daí kinota'auan bidon monimu kon intau ing kotugatanbií in hukum wakutu in nobiagpa in sia.

2Umpamanya, bobay inta kobuḷoi noyotogotpabií in hukum takin i buḷoinya kowakutu ing ki buḷoinya nobiagpa. Ta'e aka ki buḷoinya minatoidon, daí no'ipilat bidon in sia nongkon hukum inta nopoyotogot ko'i naya dua motonibuḷoi tua.

3Tuamai aka bobay tatua bo nosi-aḷumandon in ḷoḷaki ibanea kowakutu ing ki buḷoinya nobiagpa, daí bobay tatua tangoian nonuaḷing. Ta'e aka ki buḷoinya minatoidon, daí podudui in hukum, bobay tatua no'ipilatdon. Bo aka sia pobuḷoiondon in ḷoḷaki ibanea, daí sia in de'eman bidon nonuaḷing.

4Natua domandon im mo'ikow utatku mita. Kon hukum agama Yahudi, mo'ikow aim minatoi, sim mo'ikow ain sinobatuí takin awak i Kristus bo nobaliídon kapunya'an-Nya inta aim biniag bui nongkon kinopatoian. Sia biniag nongkon popatoi simbaí kita mobaragunadon ko'i Allah ko wakutu im mobiagpa.

5Sing kolipod kita nobiag podudui ibog in awak na'a. Ko wakutu intua ibog mita inta mokobaradosa in nomukaí sin oyuíon in hukum agama, bo tua in nokadai ko'inaton. Manangka intua kita mogaid kon soaáḷ mita inta mokopopisií kong kopatoian.

6Ta'e tana'a ing kita diaídon no'itogot kon hukum in agama Yahudi. Kita aim bidon minatoi kon hukum inta kolipod nongawasa ko'i naton. Kita in diaí bidon mobantung naí cara tungkuḷ intua, inta pinodudui kon hukum inta pinais. Ta'e tana'a kita im mobantungbií podudui in cara mobagu inta sinunduí in Roho i Allah ko'i naton.

7Aka natua, yo onu in singogon naton? Mora'at degaí in hukum agama Yahudi? Tantuí diaíbií! Sin hukumbií tatua in notunduí ko'inakoí soaáḷ dosa. Sin diaíbií kinota'auanku onu in sinangoian: "Ibog mo'iliu" aka hukum agama diaí noguman: "Dona'ai motama'a."

8Ta'e pinongin hukum agama, dosa noko'ulií kong kasampatan mopomukaí kom bayongan ibog mo'iliu kom bonu ing ginaku; sin aka hukum in agama bo diaí, yo dosa tua im matoibií.

9Kolipod aku'oi nobiag diaíbií nomakeí in hukum agama. Ta'e naonda in hukum agama oyuíondon, yo dosa im mulaidon mobiag

10bo aku'oi im minatoi. Daí hukum agama tatua, inta muna pinopomakusud kom mobogoi ing kobiagan, ta'e na'anta mokopoaíngoibií kom popatoi ko'inakoí.

11Sin lantaran hukum agama tatua, daí dosa noko'uliídon kong kasampatan monguboḷ bo molimod ko'inakoí.

12Hukum agama tua in nongkon i Allahbií, bo pomuḷoi im parentah kom bonu in hukum tatua namangoibií nongkon i Allah, manangka intua moaídilbií bo mopia.

13Daí aka natua, yo degaí inta mopia tua im mokopatoi ko'inakoí? De'emanbií tua, dosabií in nokopoaíngoi kom popatoi tatua. Pinodoyon kon inta mopia, dosa mokopoaíngoi kom popatoi ko'inakoí simbaí sipat mita in dosa ko'ontongandon motarang. Pinongin parentah mita i Allah, monyatadon kon totokbií im mora'at in dosa tua.

14Kinota'auanbií naton kon hukum in agama Yahudi tua in nongkon Rohobií i Allah; ta'e aku'oi in tongaíbií intau ilo-ilow. Aku'oi aim pinotaḷui mobalií ki ata in dosa.

15Sin diaí doman komangaleanku in oaíidku tontanií. Soaáḷ mita inta ko'ibogku aidan, diaíbií inaidanku, ta'e soaáḷ mita inta korongoíku tuabií in aidanku.

16Daí aka aku'oi bo mogaid kon onu inta kinodoiíku tua, yo tua mangalenya, akuíonkubií kon hukum agama Yahudi im mopiabií.

17Aka natua, yo de'eman bidon aku'oi in nogaid kon tua, ta'e dosa bidon inta nongawasa ko'inakoí.

18Kinota'auanku bidon, kom bonu in awakku na'a, diaíbií tobatuímai im mopia, tuabií in tabiat saḷaku intau ilo-ilow. Sin oyuíonbií in ibog ko'inakoí mogaid kon inta mopia ta'e diaí mokosanggup in aku'oi mogaid kon natua.

19Aku'oi in diaíbií momia kon inta mopia inta ko'ibogku aidan; ta'e soaáḷbií mita inta mora'at inta sabanarnya kodoiíkubií tuabií in aidanku.

20Daí aka aku'oi bo mogaid kon soaáḷ mita inta kinodoiíku aidan, yo mangalenya kon tua, de'eman bidon aku'oi in nogaid kon tua, ta'e dosa bidon inta nongawasa ko'inakoí.

21Daí nana'a in simpod in singogku kon hukum tana'a; aka aku'oi bo mo'ibog mogaid kon onu inta mopia, daí tongaíbií inta mora'at im momukaí kon raianku.

22Batinku im mo'ibogbií kon hukum i Allah,

23ta'e kinota'auankubií, kom bonu in awakku oyuíon doman hukum ibanea inta nokadai kon tua, tuata in hukum inta noyoposi in hukum inta kino'ibogku. Tuamai aku'oi no'itogot kon hukum in dosa inta nongawasa kon awakku.

24Yo nana'adon ing ka'ada'anku: Aku'oi dinumudui kon hukum i Allah takin ginaku motulid, ta'e tabiat in intau ilo-ilow na'a, daí aku'oi kinawasaan in dosa. Mobodito totok aku'oi na'a! Ki ine im mo'ibog moposaḷamat ko'inakoí. Sukurdon totok ko'i Allah, sin Sia no'ibog noposaḷamat ko'inakoí pongin i Yesus Kristus.

25(7:24)



 <<  Roma 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran