Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 11 >> 

1Larongo ira sinenge awõ zamati ba zi sagõrõ Yudea wa no latema Daroma Li Lowalangi niha si tenga agama niha Yahudi.

2Ba me mõi Wetero ba Yeruzalema, latahigõ ia ira niha Yahudi samati andrõ.

3Lamane, "Hana wa mõi ndra'ugõ ba nomo niha si lõ muboto? Ba manga nasa ndra'ugõ awõra!"

4Bõrõ da'õ itutunõ khõra Fetero hadia zalua andrõ fefu, i'otarai wamõbõrõ. Imane Fetero,

5"Me mangandrõ ndra'o ba mbanua Yofe, i'anema'õ hulõ zi lõ noso ndra'odo. Oroma khõgu gangilata. U'ila zi hulõ nukha sebolo nidada moroi si yaw̃a ba lawuo, no mufotaw̃itaw̃i ba watalinga, tebato ba zingagu.

6Me uhaogõ wamaigi bakha, u'ila gurifõ si õfa ahe, utu ndru'u, urifõ sanana ba fofo.

7Urongo li si hede khõgu sanguma'õ, 'Faoso, Fetero! Taba, ba a!'

8Umane wanema li, 'Tebai So'aya! Lõ irai u'a gõ si lõ sõkhi ba si ra'iõ.'

9Ifuli imane si hede andrõ moroi ba mbanua, 'Bõi w̃a'õ si lõ sõkhi zi no Ihaogõ Lowalangi.'

10Medõlu kali u'ila da'õ ba gafuriata tefazaw̃a fefu numalõ ba zorugo.

11Faudu ba ginõtõ andrõ, tohare ba nomo nahiagu wemõrõ datõlu mbanua Kaizarea, nifatenge khõgu.

12I'o'ou ndra'o Eheha Lowalangi ena'õ bõi manufa dõdõgu we'amõi awõra. Ba fao awõgu ndra talifusõda si daõnõ andre we'amõi ba Kaizarea, ba mõi ndra'aga ba nomo Goronelio.

13Itutunõ khõma Koronelio hewisa me i'ila samõsa mala'ika ba nomonia sanguma'õ, 'Fatenge niha ba Yofe ba wogaoni niha sotõi Simoni Fetero.

14Ifa'ema khõu duria sangorifi ya'ugõ awõ nõsi nomou.'"

15Itohugõ huhuonia Fetero, "Ba me ubõrõtaigõ wahuhuosa, ba mõi khõra Geheha Lowalangi hulõ zalua khõda mbõrõta.

16Itõrõ tõdõgu, no Imane So'aya, 'Ibayagõ idanõ niha Yohane, ba tebayagõ ami dania faoma Eheha Lowalangi.'

17Tobali oroma wa Ibe'e Lowalangi ba niha si tenga agama niha Yahudi mbuala si mane nibe'e-Nia khõda me faduhu dõdõda khõ Yesu Keriso, So'aya ya'ita. Bõrõ da'õ heza wa tola utenaw̃a Lowalangi!"

18Me larongo da'õ, lõ lafadaõ sa'ae. Lasuno Lowalangi, lamane, "Na si manõ, Ibe'e gõi Lowalangi ginõtõ ba niha si tenga niha Yahudi wamalalini era'era moroi ba horõra fa tola lasõndra wa'auri sindruhundruhu."

19Me no aefa labunu Zitefano, ibõrõtaigõ lagohi zamati khõ Yesu irege muzawili ira gofu heza misa. So zoloi numalõ ba Wenisia, ba so gõi zi numalõ ba Zifirusi awõ ba Gandriokhia. Ha ba niha Yahudi laturiaigõ Duria soroi Lowalangi andrõ.

20Ba hiza samati soroi Zifirusi awõ Girene, ba so zi mõi ba Gandriokhia ba wanuriaigõ Turia Somuso Dõdõ sanandrõsa khõ Yesu andrõ ba niha si tenga agama niha Yahudi gõi.

21So khõra wa'abõlõ soroi Zo'aya irege ato zi faduhu tõdõ ba latou'õ ira khõ Zo'aya.

22Irugi mbanua Yesu awõ Yeruzalema duria awõ ngawalõ zalua andrõ. Andrõ lafatenge Mbaranaba we'amõi ba Gandriokhia.

23Me irugi da'õ Baranaba, ba i'ila hewisa wamahowu'õ Lowalangi niha andrõ, omuso sibai dõdõnia. I'andrõ ena'õ sindruhundruhu lõ farõi ira, la'osambua'õ dõdõra khõ Zo'aya.

24Niha si sõkhi tõdõ Mbaranaba andre, nifatõrõ Geheha Lowalangi ba faduhu sibai dõdõnia khõ Zo'aya irege ato zolo'õ So'aya.

25Aefa da'õ numalõ ba Daresu Mbaranaba ba wangalui Saulo.

26Me no falukha ira Zaulo, i'ohe ia ba Gandriokhia, ba dõfi wa'ara torõi ira ba da'õ si fao banua Yesu, ba ato lafahaõ niha. Ba Gandriokhia andrõ zi fõfõna sibai labe'e tõi zamati khõ Yesu: Niha Keriso.

27Me inõtõ da'õ ato zi tohare ira sama'ele'õ moroi ba Yeruzalema numalõ ba Gandriokhia.

28So ba gotaluara zotõi Agabo. I'o'ou ia Eheha Ni'amoni'õ wama'ele'õ wa alua dania lofo sabõlõbõlõ ba zi sagõrõ ulidanõ. (Ba no alua da'õ ba ginõtõ wamatõrõ Kaizaro Kalaudio.)

29Ha sara dõdõ ndra solo'õ khõ Yesu wama'ohe'õ tolotolo khõ ndra talifusõ si so ba Yudea; lafa'ohe'õ molo'õ si tola ira.

30Lafalua zui sa'atõ wa ha sara dõdõ andrõ. Lafatenge Mbaranaba ba Saulo wolohe tolotolo andrõ khõ ndra satua ba mbanua Niha Keriso.



Download Audio MP3 (Kisah Para Rasul 11):
Mobile (Low Quality) - CD (High Quality)

 <<  Kisah Para Rasul 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran