Alkitab Mobile SABDA
[VER] : [NIAS]     [PL]  [PB] 
 <<  Markus 9 >> 

1"Mitõngõni da'e!", Imanõ Yesu. "So õsa niha si so ba da'e zi lõ mate, fatua lõ i'ila wamatõrõ Lowalangi andrõ si fao fa'abõlõ!"

2Õnõ bongi aefa da'õ Ikaoni Wetero awõ Yakobo ba Yohane si fatalifusõ andrõ Yesu, I'ohe ira awõ-Nia ba hili salaw̃a. Ba da'õ la'ila wa fabõ'õ nga'eu Yesu tobali mohaga.

3Nukha-Nia afusi ba takile. Lõ hadõi ba gulidanõ andre zanasai nukha si manõ fa'atakile.

4Aefa da'õ la'ila ira nifahaõ Yesu datõlu, fahuhuo Yesu khõ Gelia ba Moze.

5Imane Fetero khõ Yesu, "He Guru, wa'asõkhi nahia andre. Akha mafazõkhi tõlu ngawua nose: sambua khõ-U, sambua khõ Gelia ba sambua khõ Moze."

6Sindruhunia lõ i'ila hadia niw̃a'õnia andrõ Fetero bõrõ me ya'ia ba awõnia si darua andrõ no sata'u ira.

7Aefa da'õ ilumõ'õ ira lawuo, ba moroi ba lawuo andrõ so li si hede sanguma'õ, "Ono-Gu ni'omasi'õ-Gu da'e. Mifondrondrongo li-Nia!"

8Ba la'alio'õ lafaigi zi fasui ya'ira, ba lõ hadõi sa'ae niha bõ'õ ni'ilara ba da'õ, baero Yesu.

9Aefa da'õ mõi ira mitou moroi ba hili. Me mowaõwaõ ira na, Imane Yesu khõra, "Fatua lõ auri mangawuli Nono Niha moroi ba wa'amate, bõi mi'ombakha'õ gofu ha'õkhõ hadia zi no mi'ila andrõ mege."

10La'o'õ goroisa andrõ, hew̃a'ae ba gotaluara samõsa alua wahuohuosa hadia gohitõ dõdõ Yesu wanguma'õ, "auri mangawuli moroi ba wa'amate".

11Andrõ lasofu khõ Yesu, "Hana wa law̃a'õ ira sangila amakhoita wa lõ tola lõ'õ ofõna tohare Gelia?"

12Itema li Yesu, "Tohare sa Gelia ba wama'anõ fefu hadia ia. Ba hewisa gõi Nono Niha? Hadia mbõrõ wa lasura ba Mbuku Ni'amoni'õ wa lõ tola lõ oya dania Itaha wamakao awõ wa la'o'aya Ia niha?

13Mihaogõ wanõngõni: No tohare Gelia ba lalau khõnia zomasi dõdõra niha. Faudu da'õ ba zi no tesura ba Mbuku Ni'amoni'õ sanandrõsa khõnia."

14Me no owulo ira mangawuli faoma nifahaõ tanõ bõ'õ, la'ila niha sato ba da'õ. So õsa ndra sangila amakhoita si fada'aw̃a khõ ndra nifahaõ Yesu.

15Me la'ila Yesu, omuso dõdõra, fagohi ira ba wanema'õ Ya'ia.

16Isofu Yesu khõ ndra nifahaõ-Nia, "Hadia nifadõnidõnimi ira sangila amakhoita andrõ?"

17Samõsa ba gotaluara zanema li, "He Amagu Guru, u'ohe nonogu khõ-U. No ira'u fa'abõlõ zi lõ sõkhi ia ba tebai humede.

18Na ira'u ia fa'abõlõ zi lõ sõkhi si ra'iõ andrõ, i'olobigõ ia tou ba danõ, fawukhõ gilo, ba ifatangitangi mbohania ba oi agakandro nõsinia. U'andrõ khõ ndra nifahaõ-Mõ ena'õ lafofanõ wa'abõlõ zi lõ sõkhi andrõ, ba tebai lafofanõ."

19Imane khõra Yesu, "Fondrege ami andre! Duhuduhu wa niha si lõ famati ami! Hawa'ara tõ nasa so Ndra'odo khõmi? Hawa'ara tola Ubologõ dõdõ-Gu khõmi? Mi'ohe nono andrõ ba da'e!"

20La'ohe nono andrõ khõ Yesu. Me I'ila Yesu wa'abõlõ zi lõ sõkhi si ra'iõ andrõ, ba ifadõgõ mboto nono andrõ irege tegaõlõgaõlõ tou ba danõ. Fawukhõwukhõ gilonia.

21Isofu Yesu khõ nama nono andrõ, "No hawa'ara zi mane?" Itema linia ama nono andrõ, "I'otarai wa'a'iraononia!"

22"No asese edõna ibunu ia fa'abõlõ zi lõ sõkhi andrõ, ilaugõ bakha ba galitõ ba ba nidanõ. Na omasi'õ ama, hakhõsi tõdõ ba tolo ndra'aga!"

23Itema li Yesu, "Hadia niw̃a'õu? Na tola Ndra'odo? Fefu hadia ia oi tola, asala so wamati!"

24I'anema'õ mu'ao nama nono andrõ, "He So'aya, faduhu dõdõgu, ba hiza no ambõ famatigu. Tolodo ena'õ abõlõ wamatigu!"

25Me I'ila Yesu ibõrõgõ lahurufai zui Ia niha sato andrõ, ba Ifofanõ wa'abõlõ zi lõ sõkhi si ra'iõ andrõ. Imane, "He Eheha wa'afiso ba si lõ hede, Ufaretakõ ndra'ugõ, heta'õgõ khõ nono andre, ba bõi fuli'õ sa'ae khõnia!"

26Mu'ao wa'abõlõ zi lõ sõkhi si ra'iõ andrõ, ifadõgõ mboto nono, aefa da'õ irõi. Hulõ zi no mate nono andrõ irege fefu niha lamane, "No mate ia!"

27Igogohe dangania Yesu ba Itolo ia wemaoso. Maoso nono andrõ.

28Me no Irugi nomo Yesu, lasofu khõ-Nia ira nifahaõ-Nia lamane, "Hana wa tebai mafofanõ wa'abõlõ zi lõ sõkhi andrõ?"

29Itema lira Yesu, Imane, "Fa'abõlõ zi lõ sõkhi si mane da'õ lõ mofanõ gofu hewisa, na tenga fangandrõ."

30Larõi nahia andrõ Yesu awõ ndra nifahaõ-Nia, latohugõ wofanõ sanõrõ Galilea. Lõ omasi Yesu la'ila heza so Ia,

31bõrõ me mamahaõ ira nifahaõ-Nia Ia. Imane Yesu, "Ono Niha andrõ labe'e Ia ba danga niha, labunu Ia, ba ba ngaluo si tõlu ifuli auri Ia!"

32Ba lõ aboto ba dõdõ ndra nifahaõ andrõ wamahaõ Yesu, ba hiza ata'u ira wanofu khõ-Nia.

33Larugi Gafana'uma. Ba me larugi nomo, Isofu Yesu khõ ndra nifahaõ-Nia, "Hadia nifadõnimi ba dalu lala mege?"

34Lõ latema li, bõrõ me ba dalu lala mege fa'udu ira ba wamadõni haniha zabõlõ ebua ba gotaluara.

35Mudadao Yesu Ikaoni ndra nifahaõ-Nia si felendrua, Imane khõra, "Niha somasi tobali si fõfõna lõ tola lõ'õ tobali safuria ia ba tobali sawuyu niha sato."

36Ihalõ samõsa ndraono side'ide Yesu, Ifezizio fõnara fefu. Italagui nono andrõ Yesu ba Imane khõ ndra nifahaõ-Nia,

37"Haniha zanema iraono andre bõrõ Ndra'o, no itema Ndra'o. Ba haniha zanema Ya'o, tenga ha Ya'o nitemania, noa gõi itema Lowalangi samatenge Ya'o."

38Imane Yohane khõ Yesu, "He Amagu Guru, no ma'ila niha samofanõ fa'abõlõ zi lõ sõkhi ba dõi-Mõ. Ba no matenaw̃a ia wolau si manõ me tenga awõda ia."

39Imane Yesu, "Bõi mitenaw̃a ia, bõrõ me samõsa lõ niha samazõkhi tandra sahõlihõli dõdõ ba dõi-Gu, ba i'anemai'õ gõi i'o'aya Ndra'o.

40Niha si lõ fa'udu khõda, ba no si fao awõda.

41Mitõngõni! Haniha zame'e nibadu khõmi idanõ bõrõ me solo'õ Razo Sangorifi ami, lõ tola lõ itema luonia."

42"Na niha zamobõrõ wa lõ mamati sa'ae khõ-Gu fa samõsa moroi ba niha side'ide andre, abõlõ sõkhi na lataw̃igõ gara wogili ba mbaginia ba latibo'õ ia ba nasi.

43Na tangau mbõrõ wa õlau horõ, tema taba ia! Abõlõ sõkhi auri ndra'ugõ khõ Lowalangi ha tambai danga moroi na dua dangau ba mõi'õ ba narako, ya'ia galitõ si lõ matemate.

44[Ba da'õ galitõ si lõ matemate, ba lõ gõi i'ila mate gukuõ.]

45Ba na aheu mbõrõ wa õlau horõ, ba tema taba ia. Abõlõ sõkhi auri ndra'ugõ khõ Lowalangi ha tambai gaheu moroi na dua gaheu ba latibo'õ ndra'ugõ bakha ba narako.

46[Ba da'õ galitõ si lõ matemate, ba lõ gõi i'ila mate gukuõ.]

47Na hõrõu mbõrõ wa õlau horõ, ba tema ko'e ia! Abõlõ sõkhi mõi ndra'ugõ ba Mbanua si Bohou khõ Lowalangi ha tambai hõrõu, moroi na dombua hõrõu ba latibo'õ ndra'ugõ bakha ba narako.

48Ba da'õ galitõ si lõ matemate, ba lõ i'ila mate gukuõ.

49Dozi niha ba tehaogõ dania ba galitõ, hulõ zumange ni'amoni'õ faoma asio.

50Si sõkhi nasio andrõ. Ba hiza na taya wa'asi'asinia, ba hewisa tola mubali'õ asi'asi mangawuli? Bõrõ da'õ, ya tobali ami si mane asio -- ya'auri ami lõ fa'udu'udu."



Download Audio MP3 (Markus 9):
Mobile (Low Quality) - CD (High Quality)

 <<  Markus 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran