Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 9 >> 

1Kutẹu i Saulus měngkate sěntiniạ wẹ̌bal᷊ẹ̌bidangu mapulu měmate manga murit'u Mawu Yesus. I sie nakoạ sol᷊ong anung imang mawantugẹ̌,

2kụ mẹ̌dorong surat'u kawasa makoạ sol᷊ong anung měngangahạ u jamạat'u tau Yahudi su Damsyik, tadeạu kereu piạ u kaẹ̌bakeng e apan mạngimang Mawu Yesus paị sene, i sie makapěnamẹ si sire bọu e makapẹ̌bawa si sire sol᷊ong Yerusalem.

3Ene kạdal᷊enge sol᷊ong Damsyik, kụ sarạeng masandigu soa ene, sěngkianu piạ e tualagẹ̌ bọu l᷊angị simarang něliwung si Saulus.

4I sie naěnsạ e su ěntana nakaringihẹ̌ tingihẹ̌ mẹ̌bẹ̌bera si sie, "Saulus, Saulus! Unụe i kau mẹ̌tingkaị Siạ?"

5"Kai i sai i Kau, Tuang?" angkuěng i Saulus. Tingihẹ̌ ene simimbangu, "Seng Iạ e i Yesus, tẹ̌tingkaitangu.

6Kai ini e pẹ̌bangungke ringangu suẹ̌ e su soa. Kụ sene sarung ipaul᷊ị si kau apa hinong koatengu."

7Taumata apan timol᷊e ringangi Saulus himěkosẹ̌ hakịu něngkarěmmasẹ̌; ual᷊ingu i sire nakaringihẹ̌be piạ tingihẹ̌ ene, kai tawe nakasilo taumata sarang sěngkatau.

8Mase i Saulus dimarisị kụ namekesẹ̌ matane, kaiso matane seng tawe makasasilo apa. Kụ i sire měngkatewe něngumbelẹ limane kụ něnata si sie sumuẹ̌ su Damsyik.

9Těllu ěllo karěngụ e i sie tawe makasasilo, dingangu karěngụ u ene i sie tawe kumakaěng dingangu tawe měnganginung.

10Su Damsyik kai piạ sěngkatau murit'u Mawu Yesus arenge i Ananias. Su ral᷊ungu papasilo sěnsul᷊e, Mawu e něhengetang si sie. Angkuěng e, "Ananias!" I Ananias simimbang, "Iạ, Mawu."

11Ene Mawu e něhengetang, "Pẹ̌buạ e pakal᷊ighạ. Dakọe kakoạ sol᷊ong bal᷊eng Yudas su Ral᷊eng Matul᷊idẹ̌. Pakiwal᷊oko sene tau arenge i Saulus bọu soan Tarsus. Tau ene kapẹ̌kẹ̌kal᷊iomanenge,

12kụ su ral᷊ungu papasilo sěmbaụ tangu i sie nakasilo tau esẹ sěngkatau arenge i Ananias, diměnta su anune, kụ naněllidu l᷊imane su wowong pusige tadeạu i sie saụbe makasilo kapia."

13I Ananias simimbang, "Mawu, iạ seng nakaringihẹ̌, mal᷊awọ taumata mạhumbisaran tau ini, něngalembọ e su hal᷊ẹ̌ u pẹ̌tatatingkaị kụ seng nịkakoạ e su kawanuan'U su Yerusalem.

14Kụ orasẹ̌ ini e i sie seng diměnta sini niapakawalan manga imang těmbonange ipěnẹ̌namẹ kěbị apang měmpẹ̌kẹ̌kal᷊iomaneng si Kau e."

15Arawe Mawu e něhengetang si Ananias, "Měngkate tamai! Batụ u Iạ e seng němile si sie mẹ̌deạu mẹ̌tangkiang si Siạ, tadeạu i sie měhabar'u Iạ su manga kawanua wal᷊ine kụ ta nasowa su agamang Yahudi ringangu su manga mararatu ringangkewen su manga kawanuan Israel.

16Dingangu Iạ sẹ̌saku sarung mapakasilo si sie kal᷊awọu sunsara kụ hinong ipẹ̌tatahange suwụ u areng-Ku e."

17Tangu i Ananias e měngkatewe natamai sol᷊ong bal᷊e ene kụ naněllidu l᷊imane su pusig'i Saulus. "Saulus," angkuěng i Ananias, "Mawu Yesus kụ nikasilonu su wěntan dal᷊eng kụ piạ i kau kạdamahine, kụ kai i Sie něngoro si siạ apạděnta tadeạu i kau saụbe lai makasilo ringangu kal᷊ohoěngu Rohkẹ̌ u Ruata e."

18Su tempo ene lai piạko apa kere onạ u kinạ natontong bọu matan Saulus kụ i sie nakasilo kapia. Tangu i sie nẹ̌bangungke, kụ bọu ene nakisahani.

19Kụ bọuten kimaěnge, i sie natoghasẹ̌ kapia. I Saulus nẹ̌tanạ su Damsyik dingangu manga murit'u Mawu Yesus diọ manga pira ěllo.

20I sie seng dingangu tamai nakoạ sol᷊ong manga wal᷊eng pẹ̌kakal᷊iomanengang kụ nanětạe mělẹ̌habar'i Yesus e kai Ahus'u Ruata.

21Kěbị taumata e němpẹ̌dal᷊inaụ nakaringihẹ̌ si Saulus. I sire němpẹ̌bera, "Bal᷊inewe i sie nạung su Yerusalem seng němate kěbị taumata mạngimang su Mawu Yesus? I sie riměnta sini mahunẹu kawe nạung měnamẹ dingangu mẹ̌bawa si sire sol᷊ong anun manga imang těmbonange!"

22Kai i Saulus e kakạděngụ e sauneng kakạtoghase těntirone e. Manga apạ e nakoạ sasahidi ilẹ̌habare mạanun Yesus mambeng mạnoghasẹ̌ u i Yesus kai Ratu Měnanal᷊amatẹ̌, hakịeweng tau Yahudi su Damsyikẹ̌ e seng tawẹ u rumarendehẹ̌.

23Nal᷊iụ e manga pira ěllo karěngụ e, tau Yahudi e sěngkanaung měmate si Saulus.

24Kaiso karaking sire kai kinasingkatenge. Ěllo hěbi i sire měngẹ̌ngampal᷊ẹ̌ su pasěllangeng u soa mětẹ̌tinggạ měmate si sie.

25Arawe su sěhěbi e manga murit'i Saulus němpangal᷊ạ si sie, kụ něngul᷊uh'i sie su ral᷊ungu hiang niapal᷊iu wọu wowom bakudu soa.

26I Saulus nakoạ sol᷊ong Yerusalem, kụ paị sene i sie nẹ̌těngkatakidẹ̌ dingangu manga murit'i Yesus. Kaiso i sire kai mạtakụ i sie, batụu i sire tawe mangimang si sie, i sie měnsangbe kahěnga-hěngang nakoạ murit'u Mawu Yesus.

27Bọu ene i Barnabas diměnta su anune, kụ nagěntud'i sie sol᷊ong anun manga rarolohang. I Barnabas nẹ̌běke si sire kakakoạ i Saulus nakasilo Mawu e su raral᷊engang dingangu kereapa kakakoạ u Mawu e nẹ̌bisaran sie. I Barnabas mal᷊aing měbẹ̌běkeng kawahaning naung'i Saulus mạněntiro su Damsyik su ral᷊ungu areng'i Yesus.

28Ual᷊ingu ene tangu i Saulus nẹ̌tanạ dingangi sire, kụ měnẹ̌nasẹ̌ dingangu tawẹ takụ e su kaguwạu Yerusalem dingangu arengu Mawu.

29I sie měbẹ̌bisara ringangu mědẹ̌darendehẹ̌ lai ringangu tau Yahudi měbẹ̌beran Yunani, kaiso i sire mělẹ̌hingidu měmate si sie.

30Piạ e taumata mangimang bal᷊ine e masingkạ u hal᷊ẹ̌ ene, i sire nanondang Saulus sol᷊ong Kaisarea, buhuẹ něndoloh'i sie sol᷊ong Tarsus.

31Tangu jamaatẹ̌ su kaguwạu Yudea, Galilea ringangu Samaria něngkal᷊enehẹ̌. Ual᷊ingken tul᷊umangu Rohkẹ̌ u Ruata, dingangu katatakụ su Mawu e, manga jamaatẹ̌ e nahuntinambang katoghase ringangu kal᷊awọe.

32I Petrus e lụluhu mětẹ̌tiwo apan jamạatẹ̌. Piạ sahěllo i sie nẹ̌tiwo ral᷊ohon jamạatẹ̌ apang měmpẹ̌tẹ̌tanạ su Lida.

33Sene i sie nẹ̌sombangken sěngkatau esẹ arenge i Eneas, badange nipatene kụ seng tamakawangung bọu tatikilange su ral᷊ungu ual᷊u taung karěngụ e.

34I Petrus nẹ̌bera si Eneas, "Eneas, i Yesus Kristus mapakapiang kau. Pẹ̌bangungke kụ komol᷊e raral᷊okaěngu." Su tempo ene lai i Eneas nẹ̌bangung.

35Patikụ tumanạ u Lida ringangu Saron nakasilo si Eneas, kụ bọu ene i sire kěbị e nangimang su Mawu.

36Su Yope nạung kai piạ sěngkatau wawine arenge i Tabita. I sie mạngimang si Yesus. (Arenge su weran Yunani e kai i Dorkas, mangal᷊ene rusa.) I sie makěhagẹ̌ mẹ̌koạ mapia ringangu mẹ̌tul᷊ungu taumata masusa.

37Su tempo ene i sie kai masakị kụ bọu ene nate. Sarạeng maiete nịdarenọ e, masene nipěllọ su huange su wowone.

38Yope tawe tumanịu marau wọu Lida. Kụ su tempon manga murit'i Yesus su Yope e nakaringihẹ̌ u i Petrus e kai ene su Lida, ute i sire něndolohu ruang katau u nakoạ sol᷊ong anun Petrus pělẹ̌habaru tatanata kere ini, "Lighạko ramahi kụ aị dararěna."

39I Petrus měngkatewe nẹ̌bawal᷊ikẹ̌kasẹ̌ nẹ̌bangung kụ timol᷊e si sire. Nasongọ e sene, i sire niwawa sol᷊ong kamarẹ̌ su wowone. Kěbị apang bal᷊u sene němpěliwungke si Petrus kạpahungkiạ e apidu napasilon manga pakeang dingangu lahaweng nighepẹ i Dorkasẹ̌ baug'i sire su tempon i sie reng biahẹ̌.

40I Petrus něngoro si sire nipasěbang kěbị, kụ i sie němul᷊angeng bọu e nẹ̌kal᷊iomaneng. Bọu ene i sie timatěngọe maieti Dorkas kụ nẹ̌bera, "Tabita, pẹ̌bangungke!" Tangu i Dorkas němekese matane, kutẹu nakasilọ e si Petrus i sie kimaiangke.

41Bọu e i Petrus něngumpaede limane kụ nẹ̌tul᷊ung i sie niapararisị. Mase i Petrus nẹ̌kuị e taumata mạngimang sene e sěngkakui ringangu manga wawine wal᷊u e, kụ nanarakang i Dorkas kụ seng nẹ̌biahẹ̌ e si sire e.

42Habarẹ̌ ini e kinasingkateng napěpidẹ̌ su kaguwạu soan Yope, hakịu mal᷊awọ taumata mạngimang su Mawu Yesus Datu Mananal᷊amat'i sire.

43I Petrus nẹ̌tanạ l᷊ai sene manga pira ěllo su Yope su anun Simon, i anu tahasamẹ pising binatang.



 <<  Kisah Para Rasul 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran