Alkitab Mobile SABDA
[VER] : [SIMALUNGUN]     [PL]  [PB] 
 <<  Bilangan 10 >> 

Pamakeion bani Tarompit

1Dob ai nini Jahowa ma hubani si Musa,

2“Bahen ma bam dua tarompit humbani pirak, topa ma ai humbani sangkimpal pirak, anjaha pakei ma ai laho patumpuhon kuria ai ampa laho pabingkatkon tumpuan ai.

3Anggo haduasi tarompit ai ipahata, maningon martumpu ma ganup tumpuan ai hu lambungmu i lobei ni labah ni lampolampo partumpuan ai.

4Tapi anggo sada do ipahata, martumpu ma hu lobeimu sagala kopala, pambobai ni halak Israel marribu-ribu.

5Anggo marsora mareta-eta tarompit ai, bingkat ma tumpuan na marsaran hampit hapoltakan.

6Anggo marsora mareta-eta tarompit ai paduahalihon, bingkat ma tumpuan na marsaran hampit dangsina; maningon marsora mareta-eta lobei tarompit ai, ase bulih sidea bingkat.

7Tapi anggo sihol patumpuhon tumpuan ai, maningon bulus do marsora tarompit ai, ulang marsora mareta-eta.

8Anjaha anak ni si Aron, malim-malim ai do na manompul tarompit ai; aturan na totap ma on bennima marsundut-sundut.

9Anggo bingkat hanima hu parporangan i tanohnima mangimbang munsuhnima na manosak-nosak hanima, mareta-eta ma pahataonnima tarompit ai, laho mantarsingatkon hanima i lobei ni Jahowa, Naibatanima, anjaha paluahon-Ni ma hanima humbani munsuhnima.

10Anjaha sonai homa bani ari malas ni uhurnima, bani pestanima na dob binuhul pakon bani poltak ni bulan, maningon pahataonnima do tarompit ai laho mangondoskon galangan situtungonnima pakon galangan pardameiannima, ase idingat Jahowa hanima, Ahu do Jahowa, Naibatanima.”

Parbingkat ni Halak Israel hun Sinai

11Jadi padua-tahunkon, bani bulan dua ari dua puluh, manaik ma hombun ai hun datas ni lampolampo hasaksian ai.

12Dob ai bingkat ma halak Israel mangihutkon barisan ni sidea mardalan hun halimisan dohorhon Sinai, anjaha marsaran ma use hombun ai i halimisan Paran.

13Ai ma na parlobei sahali sidea bingkat domu hubani hata ni Jahowa marhitei si Musa.

14Bingkat ma parlobei mandera ni tumpuan ni halak Juda rap pakon bala ni sidea, anjaha si Nahason, anak ni si Aminadab do pambobai ni bala ni sidea.

15Pambobai ni bala ni marga ni halak Isasar, ai ma si Natanael, anak ni si Zuar;

16pambobai ni bala ni marga ni halak Zebulon, ai ma si Eliab, anak ni si Helon.

17Dob irangrang lampolampo ai, bingkat ma anak ni si Gerson pakon anak ni si Merari, ai ma siusung lampolampo ai.

18Dob ai bingkat ma mandera ni tumpuan ni halak Ruben rap pakon bala ni sidea, anjaha si Elisur, anak ni si Sedeur do pambobai ni bala ni sidea.

19Anjaha pambobai ni bala ni marga ni halak Simeon, ai ma si Selumiel, anak ni si Zurisadai.

20Anjaha pambobai ni bala ni marga ni halak Gad, ai ma si Eliasap, anak ni si Deguel.

21Dob ai bingkat ma halak Kahat mangusung ugas-ugas na mapansing ai, anjaha ipajongjong ma lampolampo ai paima roh sidea.

22Dob ai bingkat ma mandera ni tumpuan ni halak Efraim, rap pakon bala ni sidea, anjaha si Elisama, anak ni si Amihud do pambobai ni sidea.

23Anjaha pambobai ni bala ni marga ni halak Manase, ai ma si Gamaliel, anak ni si Pedasur;

24pambobai ni bala ni marga ni halak Benjamin, ai ma si Abidan, anak ni si Gideoni.

25Dob ai bingkat ma mandera ni tumpuan ni halak Dan, rap pakon bala ni sidea, ai ma na parpudi humbani ganup tumpuan ai, anjaha si Ahieser, anak ni si Amisadai do pambobai ni bala ni sidea;

26pambobai ni bala ni marga ni halak Asser, ai ma si Pagiel, anak ni si Okran;

27pambobai ni bala ni halak Naftali, ai ma si Ahira si anak ni, Enan.

28Ai ma parhorja bani parbingkat ni halak Israel rap pakon bala ni sidea, anggo bingkat sidea.

Ipataruh si Hobab Sidea i Halimisan

29Dob ai nini si Musa ma hubani si Hobab, anak ni si Reguel, halak Midian ai, simatua ni si Musa, “Laho bingkat ma hanami hu ianan na dob binagahkon ni Jahowa hinan, ?Ahu mamberehon ai bennima.? Rap ma hita laho, marrupei na dear pe ho ibahen hanami, ai domma iparbagah Jahowa na madear hubani halak Israel.”

30Tapi nini ma mambalosisi, “Seng dihut ahu laho, mulak hu tanohku pakon hubani saninangku do ahu.”

31Dob ai nini ma, “Ulang tadingkon hanami, ai tangkas do ibotoh ho barang ija parsarankononnami i halimisan, maningon ho ma namin na songon gabe matanami.

32Anggo bingkat ho rap pakon hanami, atap aha pe na madear na sihol bahenon ni Jahowa bennami, ai do homa sihol bahenonnami hubam.”

33Jadi bingkat ma sidea hun dolog ni Jahowa tolu ari mardalan daohni, anjaha poti parpadanan ni Jahowa do mardalan i lobei ni sidea sanggah sitolu ari pardalanan ai, laho mangindahi ianan parsaranan bani sidea.

34Anjaha hombun ni Jahowa do i babou arian, anggo bingkat sidea hun parsaranan ai.

Tonggo ni si Musa Laho Bingkat pakon Laho Marsaran

35Anggo sihol bingkat ma poti ai, nini si Musa ma, “Jongjong ma Ham ale Jahowa, ase mambur merap munsuh-Mu anjaha maporus na mangkagigihon Ham i lobei-Mu.

36Anjaha anggo marsaran ma poti ai, nini ma, ?Sai mulak ma Ham Jahowa hubani halak Israel na marribu-ribu laksa on.?”



 <<  Bilangan 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran