Uhum ni Naibata bani Israel pakon Juda
1Hata ni Jahowa, na roh bani si Mika, par Moreset ai, bani panorang ni si Jotam, si Ahas pakon si Hiskia, raja ni Juda, ai ma na niidahni pasal Samaria ampa Jerusalem.
2Tangar ma, nasiam ganup bangsa! Paruhurhon nasiam ma tanoh ampa pangisini, paboa Tuhan Jahowa do manaksihon mangimbang nasiam, Tuhan in, hun rumah hapansingon-Ni ai.
3Tonggor ma, luar do Jahowa humbani ianan-Ni, tuad do Ia, mardalan i atas buntu-buntu ni tanoh on.
4Malala do dolog i toruhni, anjaha mabolah habungan songon pantis i lambung apuy, songon bah madurus bani raboyon.
5Halani panlanggaron ni Jakob do ganupan ai anjaha halani dousa ni Israel. Hunja do hasalahan ni Jakob? Ai lang hun Samaria do ai? Anjaha hunja do dousa ni ginompar ni Juda? Ai lang hun Jerusalem do ai?
6Jadi bahenon-Ku ma Samaria gabe gugunan batu i tongah ladang, gabe pohon panuanan ni anggur mando; gulangkonon-Ku ma batuni hu habungan, anjaha patidakon-Ku onjolanni.
7Ganup gana-ganani ropukonkon do, anjaha ganup upah parriah-riahonni mosogkonon do, anjaha ganup sisombahonni sedahonon-Ku do; ai humbani upah ni boru jalang do ai ipatumpu sidea, anjaha maningon mulak do ai gabe upah ni boru jalang.
Tangis-tangis ni Nabi ai
8Halani ai do ase tangis anjaha doruh-doruh ahu, mardalan seng marsipatu anjaha talanjang do ahu; dokik-dokik do ahu songon baliang harangan anjaha doruh-doruh songon manuk-manuk unta,
9ai seng hatambaran ugah ni panlonsingan ni Jahowa, anjaha torus do ai hu Juda, das hu horbangan ni bangsangku, das hu Jerusalem.
10Ulang patugah nasiam ai i Gat, ulang tangis nasiam i Akko; i Betleapra ma nasiam margulu i abuan.
11Bingkat ma nasiam pangisi ni Sapir, talanjang marhahirion; borani luar ia pangisi ni Saanan. Tangis-tangis ni Bet-Ezel manlanglangi nasiam marianan ijai.
12Hitir do pangisi ni Marot paima-imahon na madear, halani domma turun hamagouan humbani Jahowa age bani horbangan ni Jerusalem.
13Pasang nasiam ma huda bani gareta, nasiam pangisi ni Lakis; in do parmulaan ni dousa bani boru Sion, ai bamu do jumpah panlanggaron ni Israel.
14Halani ai bere ma surat sirang bani Moreset-Gat. Rumah-rumah ni Aksib do gabe sipangoto-otoi bani raja ni Israel.
15Ambahni ai parohon-Ku ope sipartaban bam, ale pangisi ni Maresa, das ronsi Adullam roh na sangap-sangap ni Israel.
16Palpali dirimu, marsuhur ma ho halani anak haudungan ni uhurmu; pabolag palpalmu songon haluhuy, ai boanon ma sidea humbam hu habuangan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel