Pasal Kuasa ni Tuhan Jesus Manasap Dousa
1Mulakkonsi Ia hu huta Kapernaum, ai ma piga-piga ari i pudi ni ai, jadi tarbogei ma na dob i rumah Ia.
2Jadi martumpu ma buei halak, pala seng siat be i lobeini labah ai, gabe iambilankon ma bani sidea Hata ai.
3Dob ai roh ma halak mamboan na oyangon hu Bani, ompat halak do na marusungsi.
4Tapi halani seng boi idohori sidea Ia halani na mabuei ai, ibuha sidea ma tayub i babou ni ianan ai, jadi itantan ma hujai podoman hatibalan ni na oyangon ai.
5Mangidah haporsayaon ni sidea ai Jesus, nini ma dompak na oyangon ai, “Ambia, domma sasap dousamu!”
6Tapi dong do deba hundul ijai sibotoh surat, na mangkatahon ibagas uhurni,
7Mase sonai parsahap ni halak on? Manrisai do Ia! Ise boi manasap dousa sobali Naibata tumang?
8Jadi mintor ibotoh Jesus ma ibagas uhurni, na sonai pingkiran ni sidea ibagas, gabe nini ma dompak sidea, “Mase sonai pingkiran ni uhur nasiam?
9Na ija do urahan hatahonon bani na oyangon on, ʻDomma sasap dousamuʼ, atap na hatahon, ʻJongjong ma ho, boan ma podomanmu, mardalan ma?ʼ
10Tapi ase ibotoh nasiam na markuasa do Anak ni Manisia in i tanoh on manasap dousa,” nini ma dompak na oyangon ai,
11“Huhatahon ma bam, ʻJongjong ma ho, boan ma podomanmu anjaha mulak ma hu rumahmu.ʼ”
12Jadi mintor jongjong ma ia, ibuat ma podomanni lanjar laho hu darat, inonoi haganup sidea, pala longang sidea haganup. Ipuji sidea ma Naibata, nini ma, “Lape ongga ididah hanami na sonin!”
Panjalo ni Tuhan Jesus Bani Pardousa
13Jadi laho ma Ia use hu darat, hu topi tao, jadi roh ma haganup na mabuei ai hu bani, gabe iajari ma sidea.
14Jadi sanggah na mardalan ai, ididah ma si Lepi, anak ni si Alpeus, hundul i kantor sohei, jadi ihatahon ma bani, “Irikkon ma Ahu!” Jadi jongjong ma ia laho mangirikkon-Si.
15Jadi masa ma, sanggah na hundul Ia mangan i rumahni ai, buei do sijalo sohei pakon pardousa mangkasomani Jesus ampa susian-Ni ai mangan, ai buei do sidea na mangirikkon-Si.
16Dob ididah sibotoh surat na humbani Parisei, mangan Ia rapkon pardousa pakon sijalo sohei, nini sidea ma dompak susian-Ni, “Rapkon sijalo sohei ampa pardousa do Ia mangan tene!”
17Tapi dob ibogei Jesus ai, nini ma dompak sidea, “Seng porlu doktor bani na jorgit, bani na boritan do! Seng roh Ahu laho mandilo parpintor, tapi pardousa do.”
Hatorangan ni Tuhan Jesus Pasal Parpuasaon
18Anggo susian ni si Johannes pakon halak Parisei siparpuasa do. Jadi roh ma sidea, nini ma hu bani, “Mase susian ni si Johannes pakon susian ni Parisei marpuasa do, hape susian-Mu lang?”
19Nini Jesus ma dompak sidea, “Mintor tarbahen halak na marpesta parunjukon ma marpuasa, sadokah rap ope pakon sidea siparunjuk ai? Sadokah rap ope pakon sidea siparunjuk ai, seng tarbahen sidea marpuasa.
20Tapi na roh ma arini, buaton ma siparunjuk ai humbani sidea; jadi bani ari ai ma sidea marpuasa.
21Seng dong halak, na mandungkapkon hiou na baru bani hiou na dob madotei, ai rigat do use na nidungkapkon na bayu ai hubani na buruk ai, gabe roh bang-bangni ma rigatni ai.
22Anjaha seng dong halak, na pauseihon anggur na baru hubani gusi hulingkuling na buruk, ai rigatkonon ni anggur ai do gusi hulingkuling na buruk ai, gabe mambur ma anggur ai, anjaha maseda gusi ai. Tapi anggur na bayu bani gusi hulingkuling na bayu ma.”
Ipasintong Tuhan Jesus Arti ni Titah Pasal Ari Sabat
23Jadi santorap sanggah ari Sabat, mamontas ma Ia hun tongah-tongah ni juma, jadi ipungkah susian-Ni ma mamutiki buyur ni omei sanggah na mardalan ai.
24Jadi nini Parisei ma dompak-Si, “Tonggor ma, na binahen ni sidea in, na so bulih horjahonon bani ari Sabat!”
25Jadi nini ma dompak sidea, “Ai seng ongga ibasa nasiam nani na binahen ni si Daud, sanggah tarsosak ia anjaha na loheian ai ia rap pakon hasomanni?
26Imasuki do Rumah ni Naibata sanggah panorang ni si Abyatar, sintua ni malim ai, anjaha ipangan do ruti galangan ai, na so malo panganon ni age ise sobali malim-malim, anjaha ibere do homa hunjai bani hasomanni.”
27Anjaha nini ope bani sidea, “Halani jolma do, ase iadongkon ari Sabat, sedo halani ari Sabat ase itompa jolma.
28Halani ai Anak ni Jolma in do Tuhan ni ari Sabat homa.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel