Alkitab Mobile SABDA
[VER] : [SIMALUNGUN]     [PL]  [PB] 
 <<  Markus 3 >> 

Tuhan Jesus Pamalumkon Age bani Ari Sabat

1Dob ai masuk ma Ia use hubagas sada rumah parguruan. Dong ma ijai sahalak na matei lopah tanganni.

2Igompangi sidea ma Ia atap ra do Ia pamalumkonsi bani ari Sabat, ase dong dalan bani sidea mangaduhon-Si.

3Jadi nini ma dompak halak partangan na matei lopah ai, “Jongjong ma ho hu tongah-tongah on!”

4Lanjar ihatahon ma bani sidea, “Aha do na patut bahenon bani ari Sabat, na madear do atap na jahat, pagoluhkon do atap mamunuh?” Tapi sip ma sidea.

5Jadi ikawahkon ma sidea ibagas marah pakon pusok ni uhur halani tendel ni uhur ni sidea. Anjaha ihatahon ma bani halak ai, “Pagostong ma tanganmu!” Jadi ipagostong ma tongon, jadi malum ma tanganni ai.

6Jadi luarhonsi Parisei ai, mintor ibahen sidea ma partahian pakon halak Herodiani, barang sonaha bahenon ni sidea laho mamunuh-Si.

Ipamalum Tuhan Jesus Buei na Boritan pakon na Setanon

7Jadi surut ma Jesus rapkon susian-Ni dompak tao ai. Buei tumang do halak hun Galilea pakon hun Judea mangirikkon-Si,

8sonai homa hun Jerusalem pakon nagori Idumea pakon na hun dipar ni Bah Jordan pakon na hun Tirus ampa Sidon, buei do halak na roh hu bani, dob ibogei sidea buei ni na binahen-Ni ai.

9Jadi isuruh ma susian-Ni pasirsirhon sada parau Bani halani na mabuei ai, ase ulang isosak sidea Ia.

10Ai buei tumang do sidea ipamalum, gabe marurup ma sagala na boritan roh manjamah-Si.

11Anjaha sagala partonduy na mabutak, dob ididah sidea Ia, marsombah ma hubani lanjar dilo-dilo, “Ham do Anak ni Naibata!”

12Tapi gomos do sidea ipalumba, ase ulang ipatugah-tugah sidea pasal Ia.

Ipilih Tuhan Jesus Susian-Ni Sapuluh Dua Halak gabe Apostel-Ni

13Dob ai tangkog ma Ia hu sada dolog, jadi idilo ma hu lobei-Ni halak harosuh ni uhur-Ni, gabe roh ma sidea hu bani.

14Ipabangkit ma sapuluh dua halak bahen hasoman-Ni, sisuruhon-Ni marambilan,

15anjaha na markuasa mangusir setan-setan.

16Ase ipabangkit ma na sapuluh dua on, Si Simon na igoran homa si Petrus,

17si Jakobus, anak ni si Sebedeus, pakon si Johannes, sanina ni si Jakobus ai. Igoran do sidea Boanerges, artini, anak ni longgur.

18Ambah ni ai si Andreas, si Pilippus, si Bartolomeus, si Mateus, si Tomas, si Jakobus anak ni si Alpeus, si Tadeus, si Simon halak Kana,

19pakon si Judas Iskariot, partahi-tahi ai.

20Jadi masuk ma Ia hubagas sada rumah. Marurup ma use roh jolma, pala seng sompat sidea mangan.

21Dob ibogei sindohor-Ni ai, roh ma sidea laho mangalop-Si, halani nini halak, “Na podouan do Ia.”

Pasal Dousa dompak Tonduy Na Pansing

22Ia sibotoh surat na roh hun Jerusalem, nini sidea do, “Na siniaran ni Belsebul do Ia, anjaha mangunsagahkon kopala ni setan do iusir setan-setan ai.”

23Jadi idilo ma sidea hu lobei-Ni, anjaha marlimbaga ma Ia marsahap pakon sidea, “Sonaha ma ra setan mangusir hasomanni setan?

24Anggo marsalisih sada harajaon samahsi, seng anjai totap harajaon ai.

25Anjaha anggo adong sada rumah tangga marsalisih samahsi, seng anjai totap be rumah tangga ai.

26Ase anggo marsilawanan setan ai samahsi anjaha marsalisih, seng totap be ia, tapi na laho bois ma ia.

27Seng boi imasuki halak rumah ni halak na gogoh, laho manrampas ugasni, anggo lang lobei isangkut na gogoh ai, dob ai pe ase tarbuatsi ugas-ugasni.

28Na sintong do hatang-Kon bani nasiam, tarsasap do sagala dousa ni jolma, ronsi panrisaion ni sidea,

29tapi halak na mangapasi Tonduy Na Pansing, seng dapotan hasasapan ni dousa ia ronsi sadokah ni dokahni, mangonai do bani utangni ai ronsi sadokah ni dokahni.”

30Sonai ma ihatahon, halani nini sidea, “Partonduy na mabutak do Ia.”

Sindohor ni Tuhan Jesus

31Jadi roh ma inang-Ni pakon sanina-Ni, i darat do sidea jongjong, anjaha isuruh sidea ma na mandilo-Si.

32Hundul do na mabuei ai manlioti-Si, nini sidea ma dompak-Si, “Tonggor ma, i darat an do inang-Mu, sanina-Mu pakon botou-Mu, laho mangindahi Ham!”

33Ibalosi ma sidea, nini ma, “Ise do goranon inang-Ku anjaha ise do saninang-Ku?”

34Jadi ikawahkon ma na hundul manlioti-Si ai, nini ma, “On do inang-Ku, on do saninang-Ku!

35Ai na mangkorjahon harosuh ni Naibata, ai do saninang-Ku, ai do botou-Hu, ai do inang-Ku!”



 <<  Markus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran