Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 8 >> 

Pasal Goluh Partonduyon ni Halak na Porsaya

1Ase, seng mangonai be nuan uhum bani halak na ibagas Kristus Jesus, \it (na so marparlahou marguru hubani saging, tapi marguru bani Tonduy do)\it*.

2Ai titah ni tonduy hagoluhan na ibagas Kristus Jesus do na mamardekahon ahu humbani titah ni dousa ampa hamatean.

3Ai dob seng margogoh be titah in, pinagalek ni daging, isuruh Naibata ma Anak-Ni sandiri marrupa daging pardousaon, marhalanihon ni dousa. Gabe sonai ma ihonahon uhum bani dousa in, ibagas daging ai,

4ase jumpah ma hapintoron na pinangindo ni titah in banta, hita na marparlahou mangihutkon Tonduy, seng mangihutkon daging.

5Ai pardagingon do iparuhurhon na mangihutkon daging, tapi partonduyon do iparuhurhon na mangihutkon Tonduy in.

6Ai hamatean do hauhuron ni daging, tapi hauhuron ni Tonduy ai ma hagoluhan ampa hadameion.

7Ia hauhuron ni daging ai ma hamunsuhon dompak Naibata; seng ra tunduk in bani titah ni Naibata, ai seng tarbahensi.

8Halak na ibagas daging seng tarbahensi pamalas uhur ni Naibata.

9Ia nasiam, seng ibagas daging, tapi ibagas Tonduy do, anggo tongon Tonduy ni Naibata marianan ibagas nasiam. Tapi anggo seng Tonduy ni Kristus bani jolma, seng Kristus simadasi.

10Tapi anggo Kristus ibagas nasiam, matei do tongon badan halani dousa, tapi manggoluh do tonduy halani hapintoron.

11Tapi anggo marianan ibagas nasiam Tonduy ni na mamuhoi Jesus humbani na matei, pagoluhon ni Sipuhoi Jesus humbani na matei in do age badan nasiam na ra matei in, marhitei Tonduy-Ni na marianan ibagas nasiam.

Pasal Haanakon ni Halak na Porsaya

12Ai pe ale hasoman, parutang do hita, tapi sedo bani daging, ase marparlahou marguru hubani saging.

13Ai anggo marguru hu daging nasiam marparlahou, maningon matei do nasiam; tapi anggo ipamatei nasiam horja ni daging marhitei Tonduy in, manggoluh ma nasiam.

14Ai sagala na binobahon ni Tonduy ni Naibata, ai ma anak ni Naibata.

15Ai seng ijalo nasiam tonduy jabolon ase mangulaki biar, tapi tonduy anak do ijalo nasiam; marhitei in do hita mardilo: “Abba, Ham Bapa!”

16Tonduy in do manaksihon rap pakon tonduyta, paboa anak ni Naibata do hita.

17Ai anggo anak hita, dihut ma panean, panean bani Naibata, hasoman panean ni Kristus. Anggo hasoman-Ni hita manaron, gabe hasoman-Ni ma homa hita ibagas hasangapon.

18Ai huhira, sitaronon bani panorang sisonari seng satimbang in marimbang hasangapon, na sihol sipatalaron ope banta.

Pangarapan Ampa Hatotapon ni Uhur ni Halak na Porsaya

19Ai masihol do sagala na tinompa in paima-imahon panorangni, ase ipatalar anak ni Naibata.

20Ai bani na lang do ipatunduk na tinompa in, seng humbani rosuhni, tapi halani na patundukkonsi do, ase dong pangarapan,

21ai simardekahononkon do age na tinompa in, humbani parjabolonan ni hamagouan hu hamardekaon hasangapon ni anak ni Naibata.

22Ai ibotoh hita do, rap marhoih anjaha mangarou do sagala na tinompa in ronsi sonari.

23Ambah ni ai, age hita, na dob manjalo limbuah ni Tonduy in, marhoih do ibagas uhurta, paima-imahon haanakon, ase maluah pamatangta.

24Ai ase marpangarapan do, ase ipaluah hita. Ai anggo naidah na niarapkon in, seng pangarapan be ai; ai anggo domma naidah, mase arapkonon be ai.

25Tapi, anggo mangarap do hita bani na so nididah ope, sabar ma hita paima-imahonsi.

26Tapi age Tonduy in, iurupi do hita bani hagalekonta. Ai seng ibotoh hita, barang aha do na patut sipindoonta, gabe iapiti Tonduy in do hita marhitei hoih na so tarhatahon.

27Tapi ibotoh Sitanda uhur in do paruhuron ni Tonduy in, ai marguru bani rosuh ni Naibata do pangapiti-Ni bani halak na mapansing in.

28Ai ibotoh hita do, haganup do manumpak hubani na madear bani sagala na marholong ni uhur bani Naibata, na nidilo-Ni hun bani sura-sura-Ni hinan.

29Ai na tinanda-Ni hinan, ai do itodoh, ase usih sidea hu bani rupa ni Anak-Ni in, ase Ia ma na parlobei tubuh humbani sanina na buei in.

30Ai na tinanda-Ni hinan, ai do idilo, anjaha na nidilo-Ni, ai do ipintori, anjaha na pinintoran-Ni, ai do ipasangap.

31Ai pe, aha ma hatahononta pasal ai? Anggo Naibata hasomanta, ise ma imbangta?

32Seng ilioi Anak-Ni sandiri, tapi iondoskon do mangkopkop hita haganup; mintor lang ma layak-layakkonon-Ni rap pakon-Si haganupan ai banta?

33Ise ma na mangaduhon na pinilih ni Naibata? Naibata do na mamintori.

34Ise ma na mandabuh uhum? Domma matei Kristus Jesus, lobih ni ai ope tene, domma mulak manggoluh, i siamun ni Naibata do Ia mangapiti hita.

35Ise manirang hita humbani holong ni uhur ni Kristus? Hamarsikon do atap hasosakan, parburuon do atap lohei, hatalanjangon do atap mara atap podang do?

36Songon na tarsurat in, “Halani Ham do hanami ibunuhi layur ari, songon biribiri sisayaton do hanami ihira.”

37Tapi ibagas haganupan ai monang do hita halani na mangkaholongi hita ai.

38Tenger do uhurhu, seng tarbahen sirang hita humbani holong ni uhur ni Naibata, na ibagas Kristus Jesus Tuhanta in, barang bahenon ni hamatean, barang hagoluhan, barang malekat, barang siparkuasa, barang na masa sonari, barang na sihol masa, barang hagogohon pe,

39barang bahenon ni na i atas age na i toruh, ronsi sagala na tinompa na legan pe.



 <<  Roma 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran