1Iatonna taun ma’pengkasera kadatuanna, bulan ma’pessangpulo sia allo ma’pessangpulo bulan iato, saemi Nebukadnezar, datu to Babel, sola mintu’ surodadunna ullaoi Yerusalem sia napabendan tu tendana tiku lao, sia nagaragai tau iato tu benteng la nanii ullaoi.
2Susimo kadipatama-limbuanna tu kota iato sae lako taun ma’pessangpulo misa kadatuanna Zedekia.
3Iatonna allo ma’pengkasera bulan (ma’penna’pa), tonna lendu’ ia ma’irrikna karorian lan kota, naurungan tae’mo rotinna tu mai to buda lan tondok,
4ditossomi tu tambakuku kota, anna mallai tu mintu’ surodadu tonna bongi unnola babangan naparitangnga da’dua benteng tembo’ sirondong pa’lakna datu – na iatu to Kasdim umpatama limbu kota iato –, apa moi susito unnola bang lalan lu lako Araba-Yordan.
5Apa iatu datu naula’ surodadu to Kasdim, anna lambi’i dio padang marantena Yerikho, naurungan dipasisarak-sarak tu mintu’ surodadunna tu nasolan.
6Natingkanmi tau iato mai tu datu, nasolammi lako datu Babel dio Ribla, nara’ta’mi tau iato mai tu ukunganna.
7Napateimi tau iato mai tu mintu’ anakna muane Zedekia dio tingayona; sia napesuan datu Babel umpopebutai patomalii tu matanna Zedekia sia umpungoi da’dua rante tambaga, anna solanni tau lako Babel.
8Iatonna bulan ma’pellima, allo ma’pempitu bulan iato, – iamotu taun ma’pessangpulo kaseranna kadatuanna Nebukadnezar, datu Babel –, saemi lako Yerusalem tu Nebuzaradan, pangulu to ma’kampa, to mase’ponna datu Babel.
9Nasumpunmi tu banuanNa PUANG sia tongkonan layukna datu, sia iatu mai banua dio Yerusalem, iamotu mintu’ banuanna to kapua, pura nasumpun.
10Iatu rinding tembo’ Yerusalem tiku lao natuan mintu’ surodadu to Kasdim tu nasolan pangulu to ma’kampa.
11Iatu to tinampenapa lan kota sia iatu mai to menta’pa tu malemo lako datu Babel, sia iatu mai to buda tu tinampepa napali’mo Nebuzaradan, pangulu to ma’kampa.
12Apa iatu ba’tu pira-pira to makario-rio dio tondok iato natampepa Nebuzaradan, pangulu to ma’kampa, la ma’pa’lak anggoro’ sia ma’pa’lak.
13Sia natesse to Kasdim tu lentong tambaga tu lan banuanNa PUANG, sia ia duka tu tangdan pembasean sia tasik tambaga, tu lan banuanNa PUANG, anna baai tu mintu’ tambaga iato lako Babel.
14Sia ia duka tu kurin sia pesodok sia piso sia dolong-dolong sia mintu’ pareanan, tu dipake menomba, nabaa nasang.
15Sia iatu pa’peruayan sia pindan pa’pi’pikan, sia iatu mintu’ pareanan bulaan sia salaka nabaa nasang pangulu to ma’kampa iato.
16Iatu lentong da’dua sia iatu tasik tambaga misa’ sia iatu tangdan pembasean, tu nagaragan, datu Salomo banuanNa PUANG – tang dibela ditimbang tu tambagana mintu’ pareanan iato.
17Iatu lentong misa’ sangpulo karua siku langka’na; daona lu lentong iato nanii misa’ parande tambaga, sia iatu beke’ iato tallung siku langka’na, sia daona lu tu beke’ tikunna male den dalla’ tambaga massang, dibeloi bua dalima. Susi dukato tu dalla’ dio lentong misa’na.
18Natingkanmi pangulu to ma’kampa tu Seraya, tominaa kapua, sia Zefanya, tominaa ma’penduanna, sia iatu tallu to ma’kampa ba’ba.
19Sia natingkan lan mai kota iato tu misa’ to mase’ponna datu, tu ungkampai surodadu, sia limai dio mai tau iato, tu la tontong mennolo lako datu, tu diapparan lan kota iato, sia pangulu to massura’na kamandang lompo, tu urrampun mintu’ tau lan tondok la lao parari, sia annanpulona tau dio mai kampung, tu diapparan lan kota.
20Natingkanmi Nebuzaradan, pangulu to ma’kampa tu mintu’ tau iato mai, nabaai mennolo lako datu Babel dio Ribla.
21Napesuammi datu Babel umpatei tu tau iato mai dio Ribla lan lili’na Hamat. Susimoto tu kadipaliranna to Yehuda lan mai tondokna.
22Iatu mintu’ to buda tu torropa lan tondok Yehuda, tu napatorro Nebukadnezar, datu Babel, naangka’ tu Gedalya, anakna Ahikam, anakna Safan, la umpangului tu tau iato mai.
23Iatonna rangimi mintu’ kamandang surodadu sisola surodadunna, kumua naangka’mo datu Babel tu Gedalya dadi pangulu, saemi tu tau iato mai lako Gedalya dio Mizpa, iamotu Ismael, anakna Netanya sia Yohanan, anakna Kareah, sia Seraya, anakna Tanhumet, to Netofa, sia Yaazanya, anakna to Maakha, sisola surodadunna.
24Umpalaomi sumpa tu Gedalya lako tau iato mai sia mintu’ surodadunna, nakua: Da mimataku’ lako to diala pareana to Kasdim; torro bangmokomi lan tondok iate sia mengkaolakomi lako datu Babel, ammi makarimman.
25Apa iatonna bulan ma’pempitu saemi tu Ismael, anakna Netanya, anakna Elisama, misa’ bati’ datu sola surodadunna sangpulo; anna patei tu Gedalya sola mintu’ to Yehuda sola to Kasdim, tu nasolan dio Mizpa.
26Sangtiangkarammi tu mintu’ bangsa, la to baitti’ la to kapua sisola mintu’ kamandang surodadu anna male lako Mesir, belanna mataku’ tu tau iato mai lako to Kasdim.
Yoyakhin dikaturu-turui
27Iatonna taun ma’pentallungpulo mpitu kadipaliranna Yoyakhin, datu Yehuda, bulan ma’pessangpulo dua, allo ma’penduangpulo mpitu bulan iato, iatu Yoyakhin, datu Yehuda, nakaturu-turui Ewil-Merodakh, datu Babel, sia natassu’i lan mai pa’tarungkuan lan taun dinii unnangka’i datu.
28Ma’kada malamma’mi tu datu lako kalena sia napamadao tu kao’koranna na iatu kao’koranna mintu’ datu, tu nasolan dio Babel.
29Naelorammi datu Babel ussondai tu pakean pa’tarungkuanna, sia kumande dio medana datu lan mintu’ katuoanna.
30Sia tontong nabalantai datu pada tu silasanna napake kiallo-kiallo lan mintu’ katuoanna.
<< 2 Raja-raja 25 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel