Diona pemala’ ditunu pu’pu’
1Natambaimi PUANG tu Musa, anna ma’kada lako lan mai Tenda Kasitammuan, Nakua:
2Ma’kadako lako to Israel sia kuanni kumua: Iake denkomi misa’ la memala’ lako PUANG, sipatu la miala dio mai patuoammi, tu la mipemalaranna, la dio mai sapimmi la dio mai domba sia bembe’mi.
3Iatu pemala’na, ke misa’i pemala’ sapi ditunu pu’pu’, manassa ia la napemalaran tu lakinna, tu tae’ tattanna. La nabaa lako ba’ba Tenda Kasitammuan kumua anna padenanni kapaimanan dio oloNa PUANG.
4La naremme’ tu ulu pemala’ ditunu pu’pu’ iato; ianna susito, la napabu’tuan kapaimanan, kumua anna padenanni kadiseroian kasalan.
5Mangkato natunumi tu sapi iato dio oloNa PUANGna iatu anakna Harun, tu mai to minaa, unnalai tu rara nabaai la napa’pi’pikan tiku lao dao inan pemalaran, tu dio to’ ba’ba Tenda Kasitammuan.
6Anna liu’i tu pemala’ ditunu pu’pu’ iato sia naira’ sia nata’tak.
7Napalangnganni api anakna Harun, to minaa, tu inan pemalaran, namane untamben kayu dao api iato.
8Sia mintu’ tu ira’na sia ulunna sia lompona naato’ anakna Harun, to minaa, dao kayu, tu ditamben dao api dao inan pemalaran iato.
9Anna dibasei tu tambuk barinni’na sia lentekna sia la natunu pu’pu’ to minaa tu mintu’nato dao inan pemalaran, iamotu pemala’ ditunu la dipobau busarungngu’ dio oloNa PUANG.
10Iatu pemala’na, ke patuoan bitti’ susi domba sia bembe’ la dipopemala’ ditunu pu’pu’, la napopennolo tu lakinna tu tae’ tattanna.
11La natunu dio rampe daanna lu inan pemalaran dio oloNa PUANG; anna anakna Harun, tu to minaa la umpi’pikki rara tiku lao dao inan pemalaran iato.
12La naira’-ira’ sia nata’tak-ta’tak, anna ato’i to minaa tu mintu’ ira’na sola ulunna sia lompona dao kayu, tu ditamben dao api dao inan pemalaran iato.
13Anna dibasei tu tambuk barinni’na sia lentekna sia la napopennolo to minaa tu mintu’na sia la natunu pu’pu’ dao inan pemalaran; la dipopemala’ ditunu pu’pu’, iamotu pemala’ pantunu la dipobau busarungngu’ dio oloNa PUANG.
14Iake manuk-manukki tu pemala’na lako PUANG, iamotu pemala’ ditunu pu’pu’, la napennoloan tu bu’ku’ ba’tu anak dangan-dangan.
15La napalangngan inan pemalaran to minaa sia la napula’ tu ulunna, anna tunui dao inan pemalaran; sia la naparra tu duku’na anna to’do tu rarana lako rinding inan pemalaran.
16Iatu bianna, tu nanii kande lan, la dialai, anna tibei dio rampe matallona inan pemalaran dio to’ au.
17Sia la naserek dio to’ pani’na tu manuk-manuk iato, apa tae’ napasisarakki, anna tunui to minaa dao inan pemalaran, dao kayu, tu ditamben dao api; iamo pemala’ ditunu pu’pu’, iamotu pemala’ pantunu la dipobau busarungngu’ dio oloNa PUANG.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel