Diona kamaruttakanna muane sia baine
1Ma’kadami tu PUANG lako Musa sola Harun Nakua:
2Ma’kadakomi lako mintu’ to Israel, sia kuanni kumua: Iatu muane nakasunni nana, kasunan iato maruttak.
3Iamote tu ruttakna, diona kanakasunninna nana: ke lolongi lan mai kalena, ba’tu torroi lan, naurungan tae’mo nalolong, iamoto tu ruttakna.
4Mintu’ inan mamma’, tu nanii mamma’ to nakasunni nana iato, maruttak, sia mintu’ pareanan nao’ko’i maruttak.
5Minda-minda ungkakai’ tu inan mamma’na, la umbusukki pakeanna sia la mendio’, anna maruttak sae lako makaroen.
6Sia minda-minda unno’ko’i tu pareanan nao’ko’imo to nakasunni nana, la umbusukki pakeanna sia la mendio’, anna maruttak sae lako makaroen.
7Minda-minda ungkaka’i tu kalena to nakasunni nana iato, la umbusukki pakeanna sia mendio’, anna maruttak sae lako makaroen.
8Iake nakattudui to nakasunni nana iato tu to masero, la umbusukki pakeanna sia la mendio’, anna maruttak sae lako makaroen.
9Sia mintu’ lapik darang mangka nasakei to nakasunni nana iato la maruttak.
10Minda-minda ungkaka’i tu naninna diong, la maruttak sae lako makaroen, sia minda-minda unnangka’i tu iannato, la umbusukki pakeanna sia la mendio’, anna maruttak sae lako makaroen.
11Sia minda-minda tu nakaka’ to nakasunni nana iato, anna tae’ naoton limanna tama uai dolo la umbusukki pakeanna sia la mendio’, anna maruttak sae lako makaroen.
12Iatu pareanan litak, ke nakaka’i to nakasunni nana iato, la ditesse sia mintu’ tu pareanan kayu la dibasei.
13Iake mondomi tu to nakasunni nana iato dio mai kanakasunninna nana, la nareken pitung allo tu diona kadipamaseroanna, anna busukki tu pakeanna sia la mendio’ diong to’ uai lolong, anna masero.
14Ianna allo ma’pengkaruamo la naala tu da’dua bu’ku ba’tu da’dua anak dangan-dangan, anna sae lako oloNa PUANG dio to’ ba’ba Tenda Kasitammuan sia la naben to minaa.
15Anna pemalaranni to minaa misa’ diposuru’ pengkalossoran namisa’ dipopemala’ ditunu pu’pu’. Anna padenanni kadiseroian kasalan to minaa dio oloNa PUANG diona kanakasunninna nana.
16Iake denni tau kasunan rangke, la nadio’ tu mintu’ kalena, anna maruttak sae lako makaroen.
17Mintu’ pakean sia balulang tu nato’doi uai kasunan rangke, la dibusukki, anna maruttak sae lako makaroen.
18Iake misa’ muane sikoko’ misa’ baine, anna kasunan, la mendio’ sola duai, anna maruttak sae lako makaroen.
19Iake misa’ baine nalambi’ bulanna – iamotu bulan kakeraranna – manassa la torro lan kanalambiranna bulanna pitung allo; naminda-minda urrumbui la maruttak sae lako makaroen.
20Mintu’ tu apa nanii mamma’ lan kanalambiranna bulanna, la maruttak sia mintu’ tu apa nanii unno’ko’, la maruttak.
21Minda-minda ungkaka’i tu inan mamma’na, la umbusukki pakeanna sia la mendio’, anna maruttak sae lako makaroen.
22Sia minda-minda ungkaka’i tu apa nanii unno’ko’, la umbusukki pakeanna sia la mendio’, anna maruttak sae lako makaroen.
23Iake nakaka’i tu misa’ apa dao inan mamma’ iato, ba’tu pareanan tu mangka nao’ko’i, manassa la maruttak sae lako makaroen.
24Iake misa’ muane sikoko’ baine iato, anna ruai kamaruttakan kanalambiranna bulanna, sia la maruttak lan pitung allo, na iatu mintu’ inan mamma’ tu mangka nanii mamma’ la maruttak.
25Iake misa’ baine nakasunni bang rara, natae’ nalambi’i bulanna, ba’tu mandu masai na kanalambiranna bulanna, temponna nakasunni bang rara, maruttak ia, susi lan attu kanalambiranna bulanna; manassa maruttak to.
26Mintu’ inan mamma’ tu nanii mamma’ lan to attu nanii ungkasunni rara, la pada maruttak lako kalena susitu inan mamma’na lan attu kanalambiranna bulanna, sia mintu’ pareanan tu nao’ko’i, la maruttak susi lan attu kanalambiranna bulanna.
27Sia minda-minda ungkaka’i tu mai apa iato, la maruttak, anna busukki tu pakeanna sia la mendio’, anna maruttak sae lako makaroen.
28Iake radanmi nakasunni rara, la nabilangpa pitung allo, namane masero.
29Ianna allo ma’pengkaseramo la naala tu da’dua bu’ku’ ba’tu da’dua anak dangan-dangan, anna baai lako to minaa dio to’ ba’ba Tenda Kasitammuan.
30Anna pemalaranni to minaa misa’ diposuru’ pengkalossoran namisa’ dipopemala’ ditunu pu’pu’; susimoto nanii umpadenanni kadiseroian kasalan to minaa dio oloNa PUANG belanna kamaruttakan nakasunni rara.
31Susimoto la minii usseroi tu to Israel dio mai kamaruttakanna, kumua da namate natumang kamaruttakanna, ke la naruttakki tu kemaKu, tu dio lu tangngana tau iato mai.
32Iamoto tu atoran diona muane, tu nakasunni nana ba’tu kasunan rangke, tu napobannang maruttak,
33sia diona baine, nakasunni rara, ke nalambi’i bulanna, sia diona la muane la baine tu kasunan, sia diona muane, tu sikoko’ baine maruttak.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel