1E iko ma’rupa tau, ma’nubua’ko lako Gog, ammu ma’kada kumua: Inde sia tu kadanNa Puangta PUANG, Nakua: Manassa la Kulaoiko, e Gog, arung tarompo’na Mesekh na Tubal.
2La saeNa’ unnalako sia Kuula’iko male sia la Kupake’de’ko dio mai inan mambela rampe daanna lu sia la Kusolangko langngan mintu’ buntunna Israel.
3La Kusa’pa tu pana anna tobang dio mai lima kairimmu sia Kuronnosan tu anak pana dio mai lima kananmu.
4La tibambangko mate dao buntunna Israel, iko sola mintu’ bangsa tu musolan: la Kupakandeiko langkan, iamotu manuk-manuk ma’rupa-rupa pani’na, sia olo’-olo’ dio lu padang.
5La tibambangko mate dio lu padang kalua’, belanna mangkamo Kupokada tu iannato, kadanNa Puangta PUANG.
6La Kuleba’ api tama tu Magog sia iatu mai to torro manaman dio lu tondok ma’biring tasik, anna tandai, kumua Akumo tu PUANG.
7La Kupa’petandan tu sanga madatungKu dio lu to Israel, taungKu, tae’mo angKu la unneloranni tu sanga madatungKu, la dipamatuna; anna tandai mintu’ bangsa, kumua Akumo tu PUANG, tu masero dio lu to Israel.
8Manassa iatu iannato la rampo sia la dadi, kadanNa Puangta PUANG; iamora te tu allo mangka Kupokada.
9Iatu pa’tondokan kota Israel la sun la umpadukku api la umballai tu mintu’ pa’buno, iamotu balulang sia pakolong, pana sia anak pana, pelonga’ sia doke, pitung taun la nanii tau iato mai umpadukkui api te mintu’nate.
10Naurunganni tae’mo anna lao unnala kayu tutungan lako padang, ba’tu unte’tek ranga’-ranga’ lan mai pangala’, belanna iatu pa’buno iato iamo la natutung. Susimoto tu tau iato mai la urrampa apanna tu tau mangka umpangrampai sia ullo’do’ apanna tu tau mangka umpanglo’do’i, kadanNa Puangta PUANG.
11Attu iato la Kuben misa’ inan tu Gog, tu la nanii panglamunanna dio Israel: iamotu Lombok to lendu’, dio rampe matallona tasik; anna ampangi tu lalanna to lendu’. Inde to dio la nanii tau ullamunni tu Gog sola mintu’ to budanna, anna sangai tau: Lombok to budanna Gog.
12Nalamunni to Israel tu tau iato mai, la usseroi tondok pitung bulan.
13Mintu’ tau lan tondok la ullamunni, na iatu iannato la umpakalelean sanganna tu tau iato mai, ke attunnamo umpakala’bi’ Kaleku, kadanNa Puangta PUANG.
14Iatu tau iato mai la unnangka’ tau, tu dipatage’i male ullelei mintu’ tondok la ullamunni tu mintu’ to lendu’, tu torrona dao lu padang, sia la usseroi tu mai padang. Iake lendu’mi pitung bulan naparessami tu iannato.
15Ianna lao tu tau iato mai ussalongi tondok, anna misa’i tu tau iato mai untiroi tu buku tolino, la naosokki misa’ tanda inde to dio sae lako nalamun to manglamun diong lombok to budanna Gog.
16Den duka sanganna misa’ kota disanga: To buda; la naseroi tau iato mai tu tondok.
17E ma’rupa tau, inde sia tu kadanNa Puangta PUANG, Nakua: Pokadai lako mintu’ manuk-manuk, tu ma’rupa-rupa pani’na sia lako mintu’ olo’-olo’ dio lu padang, kumua: sipulungkomi ammi pada sae, sia sirampunkomi dio mai mintu’ inan lako pemala’ pangrere’ iato tu Kutunuangkomi, iamotu misa’ pangrere’ kapua dao lu buntunna Israel: kandekomi duku’ sia iru’komi rara.
18Iatu duku’na mintu’ to lalong la mikande sia rarana mintu’ arungna lino la miiru’, iamotu domba laki, anak domba, bembe’ laki, sapi laki, patuoan malompo nasang dio mai Basan.
19La ungkandekomi lompo sadia’mi sia la unniru’komi rara samalangomi dio mai pemala’ pangrere’, tu Kutunuangkomi.
20Ondongpi dao medaKu la minii dipedia’i darang, pakkanarang, to lalong sia ma’rupa-rupa surodadu, kadanNa Puangta PUANG.
21Susimoto tu kamala’birangKu la Kupakalelean dio lu mintu’ bangsa, sia la natiro mintu’ bangsa tu ukungan mangka Kupalalo sia iatu lima, mangka Kupata’pan tau iato mai.
22Anna tandai to Israel, kumua Akumo tu PUANG, Kapenombanna tau iato mai, randuk dio mai allo iato sia undinna.
23Anna issanni mintu’ bangsa, kumua iatu to Israel dipali’mo natumang kakadakeanna; belanna tang maruru’ lako kaleKu, iamoto Kubunianni lindoKu sia Kusorong tama limanna to unneai, naurunganni tibambang nasang nakande pa’dang.
24Sitinayanna kamaruttakanna sia kapatodotintinganna, angKu gau’i tu tau iato mai sia Kubunian lindoKu.
25Iamoto, inde sia tu kadanNa Puangta PUANG, totemo la Kupasule tama dandanna tu Yakub sia la Kukamasei tu mintu’ to Israel sia la natukka’Na’ ara’Ku belanna sanga madatungKu.
26Attu iato la nakalupai tu kaditattanna sia mintu’ penggauran tang maruru’ tu nanii tang maruru’ lako Kaleku, ke torromi sule tu tau iato mai lan tondokna sia marampa’mo, na moi misa’ tau tae’ umpatirambanni.
27Iake Kupasulemi dio mai lili’na mintu’ bangsa sia Kupasipulung dio mai mintu’ tondokna ualinna, attu iato la kupamanassa lako tau iato mai dio pentirona buda bangsa, kumua Akumo tu To masero.
28Anna tandai tau iato mai, kumua Akumo tu Puang Kapenombanna, la iake Kupali’i dio lu mintu’ bangsa, la iake Kupasirampunni sule tama tondokna, na moi misa’ tau tae’ Kupatorro dio.
29Sia tae’mo angKu la umbunianni lindoKu, ke mangkami Kubarrakan tu PenaangKu lako to Israel, kadanNa Puangta PUANG.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel