Alkitab Mobile SABDA
[VER] : [ABUN]     [PL]  [PB] 
 <<  1 Korintus 1 >> 

1Ji gato gum do Paulus, gato Yefun Allah iwa bes gum yerasul wa ben Yesus Kristus bi suk-i, si Sostenes, men ka we anato krom surat ré wa nin.

2Men ka we krom sukdu ré wa nin yé gato onyar kem mo Yefun Allah mo kota Korintus. Men ka we krom surat ré wa nin yé gato sok mo Yefun Allah bi rus-i mo gato nin onyar kem mo os ndo gato Yesus Kristus kak ne. Men ka we krom surat ré wa nin yé gato Yefun Allah fro dor wa ben An bi suk-i sor. Men ka we krom surat ré wa nin sor nde, wo men krom wa yé mwa ne sino mo bur ré iwedewe gato mit kem mo men bi Yekwesu Yesus Kristus ne. Yesus Kristus ne anato men si yé mwa ne sino bi Yekwesu.

3Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor.

4Ji ki ndo mo Yefun Allah wa nin petok sor, we Yefun Allah bi Yesus Kristus ma mo bur ré wa kak os ndo wa nin dakai yi.

5Nin bi nin nggwa mo Yesus Kristus it, sane anato Yefun Allah kak nin bi sukjimnut mo suk mwa neya. Nin jam suk mwa kom mo mit, nin ki nin bi sukdu-i rer wa nje jam.

6Sukdu gato men ki subot Yesus Kristus ne, nin but kom mo mit anato men me bor mo nin re.

7Sane Yefun Allah syo suktinggi ne mwa nai nin, nin yo yewa suktinggi yo mo nde. Nin eswa men bi Yekwesu Yesus Kristus, satu ma mo bur ré. Nin eswa Kristus ma saresa, nin yo yewa suktinggi yo mo nde.

8Yefun Allah mewa nin sane sor kom mo pe gato or mó, subere tepsu kam gato men bi Yekwesu Yesus Kristus, satu ma mo bur ré yo, sukibit yo ut mo nin mo nde, wokgan yo dom nde.

9Yefun Allah ben An bi suk-i tepsu An tom su men ne. Yefun Allah kendo nin subere nin si An bi Gan gato men bi Yekwesu Yesus Kristus ne tepsu dik.

10Ji bi nji, ji bi nyanggon, men bi Yekwesu Yesus Kristus bes ji wa ben An bi suk-i, saneyo ji syaugat nin do, nin tepsu dik et. Nin wat yu nde. Nin ben suk tepsu dik. Nin ben suk sino. Nin duwer yu daret o nde. Nin ben suk su nin bi sukjimnut dik, kwa yo gato siri kadit yu mo nde.

11Ji bi nji, ji bi nyanggon, Kloe bi rus-i ge bok yo ma ki nai ji do, nin duwer yu, nin maskwa yu mone.

12Yé bok ne ma, án ki sare do, nin deyo ki do, "Men simo Paulus," nin deyo o ki do, "Men simo Apolos," nin deyo o ki do, "Men simo Petrus," nin deyo o ki do, "Men simo Kristus."

13Mban! Kristus yo mwa sare nde! Ji anato kwop mo kwesukwin wa nin, bado? Ye ras nin mo syur sisu ji gum, bado? Yo mo nde.

14Ji ki ndo mo Yefun, we kadit nin yé mwa ne sino ji ras yetu ge we gato gum do Krispus si Gayus mo syur sor re.

15Ji yo ras yé mwa mo syur yo mo nde, sane bere je u anato ki do, ji ras an mo syur sisu ji gum ne? Yo mo nde.

16(Ji napakom o do, ji ras Stefanus si bi rus-i dom, wo ye yi yo o, ji yo napawa nde.)

17Ji yo ras yé mwa mo syur nde, we Kristus yo syogat ji mu wa ji ras nje mo syur nde, wo An syogat ji mu wa ji ki sukdu subot os ndo gato Yesus Kristus kak wa men yetu ne. Ji mu ji ki sukdu subot An tepsu ye gato farkor kok nde. Ji ki sukdu su kwa gato kru nde, sawe yé bes sukdu ne kok wai, ete yé yo nutbot suktinggi gato bor mo Kristus mo kwesukwin ne nde.

18Ye gato bere ges mo bot gesyos ne nut do, sukdu subot Yefun Yesus mo kwesukwin ne, yé ki daret kaii. Wo men yé gato Yefun nai kadit sukye mo bot ne, subere men kem ndo to kapyo mato kapyo, men jam do, sukdu subot Yefun Yesus mo kwesukwin anato kadum Yefun Allah bi suktinggi ne bor wa men jam re.

19Tepsu ye krom mo Yefun Allah bi sukdu, Yefun Allah ki do, "Ye gato nut do an sa, bi sukjimnut ne ko, bere Ji ben an bi sukjimnut ibit or re, ye gato nut do, an sa, jam suk mwa, bere Ji ben ye ne nalar or re."

20Sane ye gato nut do, an bi sukjimnut ne ko mo bur ré ne te, an bi sukjimnut-i, bere ós an sa u ne? Ye gato farkor kok mo nu farkor sye ne te, an bi sukjimnut-i, bere ós an sa u ne? Ye gato jam suk mwa ne te, an bi sukjimnut-i, bere ós an sa u ne? Yefun Allah kadum do, yé bok ne yo jam suk kom mo pe yo nde, we yetu mo bur ré bi sukjimnut mwa gato ko ne yo ós men yetu kem ndo to kapyo mato kapyo mo nde.

21Yefun Allah gato bi sukjimnut ne ko wai o re anato fro os subere men jam An sisu ndo. Men jam An kadit men yetu bi sukjimnut mwa gato kru nde, wo men jam An kadit sukdu gato men kibot Yesus Kristus. Sukdu ne, ye yi ki do, men dakai ki daret kaii, sarewo kadit sukdu gato ndaf ne, Yefun Allah fro os wa nai men yé gato onyar kem mo sukdu ne kadit sukye mo bot gesyos, subere men kem ndo to kapyo mato kapyo.

22Sarewo yé mwa bariwa sukdu ne. Ye Yahudi kiwa Yefun Allah kadum An bi suktinggi ben suk gato ben nje yeket wa án me su án gro, subere án jam do, sukdu ne sangge. Yewis yi ne nut do, yé ki sukdu ne su sukjimnut gato kru sa, bere án jambot.

23Sarewo men ki sukdu subot Yesus Kristus gato yé gu kwop mo kwesukwin ne. Ye Yahudi bariwa jambot sukdu ne, we án nut do, Yefun Allah bi suktinggi yo bor mone nde. Wo yewis yi ne nut do sukdu ne men dakai ki daret kaii.

24Sarewo ye Yahudi si yewis yi gato Yefun Allah nai sok mo An bi rus-i jam sukdu subot Kristus gato Yefun Allah bi ma kwop mo kwesukwin anato án sino jam mone do, Yefun Allah sa, bi sukjimnut ne ko, Yefun Allah sa, bi suktinggi ne nggi wai o re.

25Os gato Yefun Allah fro su Kristus wa men ne, yetu nut subot Yefun Allah mone do, Yefun Allah bi sukjimnut-i yo ko mo nde. Sarewo Yefun Allah bi sukjimnut-i ne kru wai kadit yetu bi sukjimnut-i ne o re. Sane dom yetu nut subot Yefun Allah mo os gato An fro ne o do, Yefun Allah yo nggi nde. Sarewo Yefun Allah bi suktinggi-i gato yetu nut do yo nggi nde, nggi wai kadit yetu bi suktinggi-i ne o re.

26Ji bi nji, ji bi nyanggon, nin napawa tomgatu Yefun Allah nai nin sok mo An bi rus-i, sugane yé nut do, nin yo jam suk mwa nde. Nin yo nggi nde. Nin gum yepasye mo bur ré dom nde.

27Sarewo yé gato ye yi nut do, yé ne jam suk nde yo, Yefun Allah nai yé ne gum sok mo An bi rus-i, subere ye gato nut do, an sa, jam suk mwa mo bur ré, Yefun Allah ben an damen. Sane dom, Yefun Allah nai ye gato yo nggi nde gum sok mo An bi rus-i, subere ben ye gato nggi mo bur ré damen dom.

28Yé gato ye yi nut do, yé ne tepsu pa wokgan, Yefun Allah nai yé ne gum sok mo An bi rus-i. Yefun Allah nai yé gato ye yi kabor bu dom. Yefun Allah nai yé gato ye yi ki do, jam suk nde. Yefun Allah nai yé ga sane gum sok mo An bi rus-i, subere yé gato yetu mo bur ré bes gum kok ne, Yefun Allah misyar ku sukye sor.

29Sane Yefun Allah yo nai men yetu gum sok mo An bi rus-i kadit men yé gato gum kok mo bur ré nde, subere men yetu yo ku os wa bes men nggwa kok mo Yefun Allah gwem nde, ete ki do, "Kadit suk gato ji ben anato Yefun Allah nai ji gum sok mo An bi rus-i ne." Sane nde.

30Yefun Allah dakai fro os wa men si Yesus Kristus tepsu dik. Yesus Kristus ne kak men bi sukjimnut. Yesus Kristus ne kak os wa men sok mo Yefun Allah bi rus-i. Yesus Kristus kak os wa men ben Yefun Allah bi suk-i sor. Yesus Kristus tot suktot wa men mo sukibit gato men ben ne wé. Men dakai yo ben suk gato ben to Yefun Allah nai men gum sok mo An bi rus-i nde.

31Sane mo Yefun Allah bi sukdu yé krom do, "Ye to iwa bes an gum mo suk gato an ben ne, sa ndo sa, an bes an dakai gum sane nde, wo an bes Yefun Allah gum kok mo suk gato Yefun ben ne sor."


  Share Facebook  |  Share Twitter

 <<  1 Korintus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran