Alkitab Mobile SABDA
[VER] : [ABUN]     [PL]  [PB] 
 <<  Yakobus 1 >> 

1Ji gato gum do Yakobus, ji ben suk wa Yefun Allah si men bi Yekwesu Yesus Kristus. Ji anato krom surat ré wa nin yé gato sok mo Yefun Allah bi rus-i mo bur ré or sino. Ndo mo nin sino.

2Ji bi nji, ji bi nyanggon, kapre men ku sukye ket kwayo-kwayo, men nut mo men mit do, suk ne ndo wa men sor,

3we men jam do, yé ben sukye nai men mo gato men onyar kem mo Yefun Yesus sa, men yo misyar Yefun mone nde, wo men nggiwa men jom An bi sukdu ne krat petok sor, men ó mó it.

4Men mewa men nggwa mo sukye mwa gato men ku ne, subere men nggiwa men jom Yefun bi sukdu ne krat mo sukye mwa ne sino sor, kwa gato gwet yo mo nde, bere men yo ye mo suk yo o nde.

5Nin yé gato jam suk yo ri nde tó, nin ndek mo Yefun Allah subere An kak nin bi sukjimnut et. Sane bere Yefun kak nin bi sukjimnut re. Yefun Allah yo nutbot sukibit gato men ben ne nde, wo An iwa An dakai ben sukndo su men sor, subere men jam suk.

6Wo ye to ndekwa Yefun kak an bi sukjimnut it yo, an ndek sisu an mit dik si an onyar dik et. An ndek su sukjimnut mwa nde, we ye to ndek su sukjimnut mwa ne tepsu sem nap gato nobu ti mó, ete kas muya-muma, an yo kom mo pe yo nde, wo an waiyu mone sor.

7Ye gato bi sukjimnut mwa mo suk gato an ndek mo Yefun ne, an bi sukjimnut mo suk dik yo pe mo nde. An ben an bi suk-i kas muya-muma daret sor. Sane an nut do, Yefun iwa syo suk yo nai an yo, bere siri re. Bere an yo ku suk kadit Yefun Allah nde.

8(1:7)

9Ye gato onyar kem mo Kristus, gato gum wok mo bur re, Yefun Allah bes an gum kok mo Yefun Allah bi de-i, sane an mit at wa et. Kapre an yewa suk, an mit at wa sor.

10Sane dom ye gato onyar kem mo Kristus, dogato ku suk mwa yo, Yefun Allah yo bes an gum kok teker sato yetu bes nde yo, an mit at wa sor, we kom mo rut sa, ye gato ku suk mwa ne, bere kwop wé kadit bur ré tepsu es ú gu ete mbok ges or wé kadit es ne.

11Kam it, ete kam gat yó, kam gat es u ne mbrai ete i-u ne ges re. Sane dom, ye gato ku suk mwa, an werwa sum suk mwa wa an dakai mo bur ré saresa, an dakai kwop su mit wé kadit bur ré re.

12Ye to ku sukye, ete an yo misyar Yefun Allah nde, wo an jom Yefun Allah bi sukdu-i ne krat sor, bere an mit at wa, we án jam do, sukye ne or kadit an yo, bere Yefun Allah syo suk gato ndo nai an mone, bere Yefun ós an kem ndo tepsu Yefun Allah tom su ye gato bi sukjimnut sye kas subot Yefun Allah ne.

13Suk yo do ma tik men mit wa ben men ges mo os ibit it yo, men ki do, "Yefun Allah anato ben suk ne ma tik men mit," sane bere siri re, we Yefun Allah yo meret os wa tik yetu mit wa men ges mo os ibit yo mo nde. Sane dom, suk yo ku os wa ma tik Yefun Allah ges mo os ibit dom nde.

14Wo men yetu dakai bi sukjimnut ibit anato tik men mit wa men ges mo os ibit. Sukjimnut ibit ne gwat men mu ges mo os siri re.

15Sukjimnut ibit ne ben men mit iwa ben sukibit, orete men simo. Men simo, orete men ges mo os ibit it anane. Sukibit ne ben kidar men sane sor, men ben sukibit ne gat anato kom mo rut sa, men ges mo bot gesyos re.

16Ji bi nji, ji bi nyanggon gato ji jimnotku, men mewa men nggwa subere ye ben kidar men nde.

17Suk mwa gato men ku kadit Yefun Allah ne ndo sino, suk gato ibit yo mo nde. Yefun Allah syo suk mwa ne nai men. Yefun Allah ne ut suk gato rer mo gu nim ne sato aina e, kam e bí e ne, sarewo Yefun Allah dakai yo win nggwa nde, suk mwa gato An ben kamdik-kamdik An ben tepsu yu sor, An yo gwat ndendu bi os-i nde.

18Yefun Allah dakai iwa ki bi sukdu gato sangge ne ma kak os wa men subere men tepsu An bi pá-i. An kak os wa men subere men kem mo nat gato ndo kok wai kadit suk mwa gato An ut ne sino re.

19Ji bi nji, ji bi nyanggon gato ji jimnotku, nin jammo sukdu gato ji krom ré sisu ndo et. Sukdu gato ye yi ki ne yo, men nutbot kekro et. Wo men ki men bi sukdu-i nde tó, men nutbot pare sisu ndo, orete men ki. Men maskwa kekro nde,

20we, sukmaskwa yo ós men ben sukndo tepsu Yefun Allah mit nde.

21Sane it yo, men bare sukibit mwa gato men ben ne wé. Sukdu gato Yefun Allah grem mo men mit si men onyar ne, men kak men mit wa, ete men jammo sukdu ne et, we sukdu ne kak os wa men subere men kem ndo to kapyo mato kapyo.

22Men syaretwa Yefun Allah bi sukdu sor nde, wo men benbot dom. Men jam Yefun Allah bi sukdu, ete men yo benbot nde, orete men nut do bere Yefun Allah nai men kadit bot gesyos it yo, men kidar men dakai it anane.

23Ye gato jam Yefun Allah bi sukdu, sarewo yo benbot nde anato tepsu ye gato me an gen mo cermin.

24An sokme an gen mo cermin, orete an mu re. An mbrinket an gen gado an me ne. Ye ne me an gen, wo an yo ben suk yo subot suk gato an me ne nde.

25Sarewo ye gato watbot Yefun Allah bi sukdu ne petok sor, ete an yo mbrinket nde, wo an benbot it yo, bere Yefun ben sukndo su an mo suk gato an ben ne sor. Yefun bi sukdu ne ndo wai o re, kwa gato gwet mo nde. Sukdu ne nggiwa sombok men wé kadit sukibit mwa gato jom men ne. Sane men werwa men benbot sukdu ne yo, bere Yefun ben sukndo su men mone re.

26Ye to nut do, an sa, benbot Yefun Allah bi sukdu mwa ne sino, sarewo an yo mewa an syokwet nde, wo an ki an bi sukdu-i ibit it yo, tepsu an kidar an dakai it anane. Suk gato an ben wa Yefun Allah ne, yo ós an nde.

27Suk gato an ben wa Yefun, gato men bi Ai, Yefun Allah nut do, ndo wai o re anato suk sato ré, an mewa pa ti si nggonna gato ku sukye. An mewa nggwa kadit sukibit mwa mo bur ré dom. An do ben suk sane it yo, an ben an bi suk-i ndo wai anane, kwa yo gato ibit mo nde.


  Share Facebook  |  Share Twitter

 <<  Yakobus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran