Alkitab Mobile SABDA
[VER] : [ABUN]     [PL]  [PB] 
 <<  Yohanes 19 >> 

1Orete Pilatus syogat yesukmise gwat Yefun Yesus mu mo nden, ete yesukmise kwam Yefun Yesus su bus.

2Yesukmise ne nai kweran gato jak mó, ete án far kweran ne bot yu. Orete án bom mo Yefun Yesus su. Orete yesukmise nai yekwesu bi san gato te kur, ete gwom mo Yefun Yesus.

3Yesukmise ma ti mo Yefun Yesus gwem, án sa Yefun Yesus, án kabor Yefun Yesus do, "Nan sa, Nan ye Yahudi bi yeraja fe!" Án ma án kabor Yefun Yesus sane sor. Or o án gwa Yefun Yesus kwanke su án syim.

4Wam dik yo o Pilatus syesyar mo nden, ete Pilatus ki nai ye Yahudi do, "Nin me more et. Ji gwat Ye gare syesyar ma mo nin it anare, subere nin jam do, Ji ndobot Ye ré ware, ji ki do, Ye ré ben suk gato ibit yo mo nde."

5Sane Yefun Yesus syesyar mo nden, An bom kweran jak gato yé far bot yu ne tó, An it san te kur ne tó. Pilatus ki nai yé mwa mone do, "Ye gare anane it!"

6Yekwesú mo Yefun Allah bi nu ge bok yo si ye gato mewa Yefun Allah bi nu ge bok yo me Yefun Yesus syesyar mo nden sa, án sino saiye do, "Nan gu An kwop wé tom! Nan mban An mo kwesukwin tom!" Sarewo Pilatus ki nai án do, "Nin dakai nai An, nin dakai gu An kwop mo kwesukwin sor, we ji ndobot An ware, ji ki do, An ben suk gato ibit yo mo nde."

7Ye Yahudi ki nai Pilatus do, "Men bi sukduno-i duno men do, ye gato ki do, an anato Yefun Allah bi Gan yo, men gu an kwop wé. Sane men syokom ye gu An kwop sor."

8Pilatus jam ye Yahudi mwa ne ki sukdu ne sa, an nyu wai o re.

9Pilatus sok satu o mo an bi nu sye, ete an ndo mo Yefun Yesus do, "Nan ontu mo u ne?" Sarewo Yefun Yesus yo du nde.

10Pilatus ki nai Yefun Yesus o do, "Nan bariwa Nan ki suk su ji e? Nan jam nde ji anato sye wai kadit Nan e? Ji anato nggiwa ji sombok Nan wé. Ji anato nggiwa ji syokom ye gu Nan kwop mo kwesukwin dom."

11Yefun Yesus ki nai Pilatus do, "Yefun Allah bes nan wa nan jom nat si suk mwa ré ondesa, nan yo sye wai kadit Ji nde re. Sane anato ye gato syo Ji mo nan syim ne, ye ne ben sukibit wai kadit nan re."

12Pilatus jam sukdu ne sa, an meret os wa an sombok Yefun Yesus wé. Sarewo ye Yahudi saiye gat do, "Nan sombok Ye ne wé yo, nan tepsu Kaisar bi yesyim nde. Ye gato ki mo yé mwa gwem do, an yeraja, ye ne yo jammo Kaisar o nde, ye ne tepsu yeko wa Kaisar go!"

13Pilatus jam sukdu ne or sa, an gwat Yefun Yesus syesyar mu mo nden, ete Pilatus kem mo kursi gato yepasye gato kibot suk kem mone. Pe ne gum do, 'Kwat gato yé nggo su jok.' (Su a Ibrani yé kendo pe ne do Gabata.)

14Kam gane, yé fro suk wa bi ik ye konwa Kam Sye Waiket, sugane kam ti ri. Pilatus ki nai ye Yahudi do, "Nin bi yeraja anare!"

15Wo án saiye do, "Nan gu An kwop wé se! Nan gu An kwop wé se! Nan mban An mo kwesukwin tom!" Pilatus ndo mo án do, "Nin iwa ji mban nin bi yeraja mo kwesukwin sor re bado?" Yekwesú mo Yefun Allah bi nu ge bok yo ki nai an do, "Kaisar sor anato tepsu men bi yeraja."

16Or sa, Pilatus syo Yefun Yesus mo an bi yesukmise syim wa án mban Yefun Yesus mo kwesukwin. Sane yesukmise ne gwat Yefun Yesus mu.

17Yefun Yesus mu mo nden saresa, An sam An bi kwesukwin mu mo pe gato gum do, "Yekri subris." (Su a Ibrani yé kendo do Golgota.)

18Mone, yé mban Yefun Yesus mo kwesukwin. Sugane yé mban yetu ge we sisu An mone dom. Yetu ge we ne, dik yo mo Yefun Yesus de syim jam, dik yo mo Yefun Yesus de syim ge, Yefun Yesus dakai mo ye we ne miten.

19Pilatus syogat yé krom sukdu mo kwedet, ete yé mban mo Yefun Yesus bi kwesukwin napnim. Yé krom sukdu gato yé ndak Yefun Yesus su ne sare do, "Yesus ye Nazaret. Ye Yahudi bi yeraja anare."

20Yé krom sukdu ne su a gri, yé krom su a Ibrani, su a Latin ye Roma bi a, si ye krom su a Yunani dom. Nat gato yé mban Yefun Yesus mo kwesukwin ne karowa kota. Sane ye Yahudi mwa mu mone, ete án baca sukdu gato yé krom mone.

21Ye Yahudi bi yekwesú mo Yefun Allah bi nu ge bok yo ki nai Pilatus do, "Nan krom ye Yahudi bi yeraja anare nde. Sarewo nan krom do, 'Ye ré dakai ki do, An ye Yahudi bi yeraja.' "

22Sarewo Pilatus ki nai án do, "Suk gato ji syogat yé krom ne kem mone it."

23Yesukmise mban Yefun Yesus mo kwesukwin or sa, án nai Yefun Yesus bi san wa án dakai syo yu su. Án ge at wat san ne su yu, yesukmise ge dik ku dik. Án nai san gato Yefun Yesus it mo nden ne dom. San ne wak no, ye yo bit i-su yo mo nde.

24Yesukmise ne, án ki nai yu do, "Men syik san ré wa men syo yu su nde. Men syat bit et. Ye gato tik bit gato syu wai kadit doyi ne yo, an nai san ne sor." Ye tik bit subere sukdu gato yé krom nyim mo Yefun Allah bi sukdu ne bor re. Yé krom do, "Yé syo yu su Ji bi san. Yé tik bit subere ye wat yu su Ji bi sansun syu ne." Sangge, yesukmise ne wat yu su Yefun Yesus bi san tepsu sukdu ne it.

25Yefun Yesus bi im e, Yefun Yesus bi im dowok e, Maria gato Klopas bi nggon ne si Maria gato bi nat mo Magdala, án ge at ti karowa kwesukwin gato yé mban Yefun Yesus mone.

26Yefun Yesus sokme An bi im si An bi pakon gato An jimnotku ne ti mone. Yefun Yesus sokme an we sa, Yefun Yesus ki nai an bi im do, "Im o, nan bi pa anane it."

27Orete An ki nai pakon ne do, "Nan bi im anane it." Kadit kam gane it, pakon ne mewa Yefun Yesus bi im. Yefun Yesus bi im si pakon ne kem mo pakon ne bi nu-i.

28Yefun Yesus jam do, suk mwa gato An ben ne, An ben or it, ete An ki do, "Ji sosa," subere sukdu gato yé krom mo Yefun Allah bi sukdu subot An bor mone re.

29Mone yé grem sukbo dik yo mó. Yé rin nau anggur rom gato muk mo sukbo ne ses. Yé nai suk gato yé tik syur su tepsu san det. Sane yé ras suk ne mo nau anggur gato muk ete suk ne dakai tik nau ne sok. Ete yé nai kwe koi gato syu, ete yé dú suk ne mó, ete yé jom su mu nim mo Yefun Yesus mip.

30Yefun Yesus da nau rom or sa, An ki do, "Tut more it." Orete An su e mo bur, An mas bok it.

31Kam gato Yefun Yesus kwop su ne, kam Jumat, kam gato ye Yahudi fro suk wa án bi kam sye kam Sabat ne. Bi ik ete kam Sabat sor nde, wo Kam Sye Waiket dom. Sane anato ye Yahudi bariwa yetu mukri gato yé mban mo kwesukwin kem kok mone. Sane ye Yahudi bi yepasye ge bok yo mu mo Pilatus. Án ndek mo Pilatus do, "Nan syogat yé syat yé bok ne gwes subere án kwop kekro, ete yé sombok án mukri wé kadit kwesukwin, ete yé gwat mu."

32Sane yesukmise mu, án syat ye we gato yé mban mo Yefun Yesus de ne gwes nyim, ye we ne gwes fot.

33Sarewo yesukmise mu kom mo Yefun Yesus, án me sa, Yefun Yesus kwop re, sane án yo syat Yefun Yesus gwes nde.

34Sarewo yesukmise ge dik yo syer Yefun Yesus syak su yor. Sugane syur si An dé sino syé kadit An syak wip ne.

35Suk gato yesukmise ben ne, ye gato dakai me su an gro anato ki rer nai nin jam. An ki an bi sukdu-i ne sangge, subere nin dom nai sukjimnut do, sukdu ne sangge.

36Yesukmise ben suk ne nai Yefun Yesus subere sukdu gato yé krom suga nyim subot An mo Yefun Allah bi sukdu ne bor re. Yé krom do, "Bere ye yo syat An dini dik yo fot dom nde."

37Yé krom mo Yefun bi sukdu o do, "Bere yé sokme Ye gato yé syer re."

38Orete Yusuf gato bi nat mo Arimatea, an ndek mo Pilatus do, Pilatus syo Yefun Yesus mukri wa an gwat mu bi mo makwe et. Yusuf ré, an onyar kem mo Yefun Yesus, sarewo an yo ki bor wa ye jam nde, we an nyuwa ye Yahudi. Pilatus imo suk gato an ndek ne, ete Pilatus misyar Yusuf mu nai Yefun Yesus mukri.

39Nikodemus sisu Yusuf dom. Nikodemus ré, wam ga nyim an anato ma ku Yefun Yesus su noru. Nikodemus gwat kwe mur da gato grik si kwe nggonnak jos gato grik ne, ete an fros su yu. Kwe mur da si kwe nggonnak jos ne de karowa kilo musyu gri.

40Yusuf si Nikodemus nai Yefun Yesus mukri, ete an ka we far Yefun Yesus mukri su san det. An ka we bok kwe mur da fros su kwe nggonnak jos mo san mit ete an ka we far kit Yefun Yesus mukri su. An ka we fro Yefun Yesus mukri tepsu sagana Ye Yahudi fro ye mukri ne.

41Mo pe gato yé mban Yefun Yesus mo kwesukwin ne, nggwe dik yo mó. Mo nggwe ne, yé fro jokwak wa yé grem yekwop mo mit ne. Jokwak ne, yé yo grem ye mukri mo nde tó.

42Yusuf si Nikodemus grem Yefun Yesus mukri mo jokwak mit ne, we jokwak ne karowa nat gato yé mban Yefun Yesus mó. Kam ne dom, kam gato ye Yahudi fro suk wa bi ik, kam sye kam Sabat.


  Share Facebook  |  Share Twitter

 <<  Yohanes 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2017
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran