Alkitab Mobile SABDA
[VER] : [ARALLE]     [PL]  [PB] 
 <<  1 Yohanes 3 >> 

1Pihki'mitoo, tandana käyyäng pa'kalemunna pano di kita', lambi' disangaiingkea' änä'-änä'na. Anna inang änä'na si'damingkea' Puang Alataala. Dianto anna damingkea' nainsang to tamampetahpa' yaling inde di lino, aka' dai ungnginsang Dehata.

2Oa' solasohongku ang kukalemui, dinoa änä'namingkea' Puang Alataala, ampo' dake' nalambi' pihki'ta la umbaingkea' noa ke dako'mi. Moinnakato noa, tainsang taoatee la sinnoaingkea' Puang Yesus ke umpepaitaming Kalaena, aka' la taitang pole' umba noa Kalaena ang setonganna.

3Anna menna-menna ang hannu pano, la umpamasero pembabena yaling inde di lino, umba noa Puang Yesus masero.

4Menna-menna umbabe dosa untehkai pahentana Puang Alataala, aka' pembabe yatoo umpa'bali pahentana Puang Alataala.

5Ungnginsammi ungngoatee sule Puang Yesus tama inde di lino anna malai umpa'dai dosanta. Anna ungnginsang toia' ungngoatee daine' madosa Puang Yesus.

6Dahi menna-menna tohho lolo yaling di Puang Yesus dang la si umbabe dosa. Ampo' menna-menna si umbabe dosa, tau yatoo daine' ungnginsang Puang Yesus anna dake'ne' la nakaleso pa'elo'na.

7O ingkämmua' änä'ku, daa umpabeia' tau napasähsä' lalangngo. Menna-menna umbabe pa'elo'na Puang Alataala, tau yatoo mesa to tahpa' umba noa Puang Yesus tahpa'.

8Ampo' menna-menna si umbabe lolo dosa, tau yatoo änä'-änä'na Pongkahana setang, aka' mengkalaoke' anna dake' aha lino anna inang madosanne' Pongkahana setang. Diantoo anna mentamang di lino Änä'na Puang Alataala aka' la umpa'dai pengkähänganna Pongkahana setang.

9Menna-menna mendahing änä'-änä'na Puang Alataala, tau yatoo dang la si umbabe dosa aka' sipa'na Puang Alataala yalimmi di kalaena, dia tuke' aka' Puang Alataala mendahing Ambena.

10Dahi maleso anna sisenga'angngi diita änä'-änä'na Puang Alataala anna änä'-änä'na Pongkahana setang. Aka' menna-menna dai umbabe katahpa'ang bahtu'raka dai ungkalemui to mampetahpa', tau yatoo tadia änä'-änä'na Puang Alataala.

11Dianto inde kaheba ang puha unghingngia' mengkalao pampahandu'anna mampetahpa'koa': la sikalemuiingkea' mesa anna mesa.

12Daingkea' la membabe sinnoa ta Kain, aka' yato ta Kain mendahing änä'na To handang karake babe lambi' umpatei arinna. Akana umpatei arinna? Aka' si membabe karakene' ta Kain anna si membabe mapiane' arinna.

13O solasohongku, daa ungkapusa'i ke nakahiri'koa' to tamampetahpa' yaling inde di lino.

14Tainsammia' taoatee lahpa'mingkea' di hao mai di kamateang lutama di katuhoang. Tandana umpelleimingkea' kamateang, ya' si ungkalemuimingkea' solata to mampetahpa'. Ampo' menna-menna dai ma'kalemu, tontong loloke'ne' yaling di kamateang.

15Anna menna-menna ungkahiri' solana to mampetahpa', tau yatoo sihapang papateang anna maleso dioatee yato to papateang daine' aha katuhoang sapano-panona yaling di kalaena.

16Puang Yesus Kristus puha umpapepatei Kalaena aka' nakalemuiingkea'. Diantoo tapohapangangnga' ma'kalemu. Dahi la tapalla'ang toua' kita' umbeho kalaeta la unsa'ding ma'kahupa-hupa kamasuhsaang aka' ungkalemuiingkea' solata to mampetahpa'.

17Ampo' mesa tau ang sundummi katuhoanna, ke dai ma'kalemu ungngita solana ang dai sundung kapahalluanna, ya' dai ma'kalemu sinnoa Puang Alataala.

18Oa' ingkämmu änä'ku, yato ang dioaintee pa'kalemu si'da-si'da dai di hao supu di sua, ampo' la pahallu mengkalao yaling di unnä' inaha lemba' di pembabe.

19Ponna si ungkalemui si'da-si'daingkea' solata to mampetahpa', tainsammia'too taoatee änä'-änä'na si'damingkea' Puang Alataala. Anna la masannammi inahanta aka' daingkea' la bata-bata di hao di olona.

20Aka' moinnakato ma'tula'-tula' inahanta naoatee, "Umbai damä' aha la salama' aka' karake pembabeku," ampo' dai la dipehingngii aka' käyyäng puhane' kakuasaanna Puang Alataala andana inahanta, aka' Dianto ang ullosa ihsi inahanta.

21Oa' solasohongku ang kukalemui, ponnato dang bata-bata inahanta, damingkea'to la mahea' di hao di olona Puang Alataala.

22Anna la nahingnging ingkänna palaunta, aka' si tapembabeming pahentana anna si tapembabeming pampemalanna.

23Inderanne' pahentana Puang Alataala pano di kita': La umpetahpa'ingkea' sanganna Puang Yesus Kristus, Änä'na, anna la sikalemuiingkea' mesa anna mesa umba noa ang puha napahentaingkea'.

24Menna-menna si umpembabeing yato pahentana, tau yatoo tohho yaling di Puang Alataala anna Puang Alataala tohho yaling di kalaena. Anna tainsammi taoatee tohhong yaling di kalaeta aka' puhamingkea' napatamai Inaha Maserona.


  Share Facebook  |  Share Twitter

 <<  1 Yohanes 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran