Alkitab Mobile SABDA
[VER] : [ARALLE]     [PL]  [PB] 
 <<  2 Timotius 2 >> 

1O Timotius änä'ku, pamatohoi inahammu umpake kamatohoang ang tatahimbo yaling di Kristus Yesus aka' mana' pa'kalemunna Puang Alataala.

2Pepakuhu ang puha unghingngi di kodi' naonge nasa'bii mai'di tau pahallu umbea toe' pano di tau ang umpetahpa' ang manähäng mampakuhu.

3Pengkatähängngii ungngolai kamasuhsaang sihapang mesa tantarana Kristus Yesus ang sa'bara'.

4Mesa tantara ang lella' mengkähäng daete' aha umpihki' kapahalluang kalaena aka' pemala umpamasannang inahanna pongkahana.

5Noa toi ke ahai tau ang ma'silumba ampo' dai untuhu'i atohang pa'silumbaang, ya' daete' la ullambi' piala.

6Noa tuntone' mesa to pobela', bahtu' to pangnguma ang mengkähäng kahha', inang dia tubunte' ang handang dolu sihatang umpeuhaii pengkähänna.

7Pihki' manahpai inde samai ang kuoaingko. Dehatarang ang la mambeao kapainsangang anna malai ungnginsang asang ingkänna siamo.

8Kalehai loloi Puang Yesus Kristus, peänä'anna Tomaraya Daud, ang tuho di hoi' mai di alla'na to mate situhu' Kaheba Mapia ang kupopepainsangnging.

9Pengkatähängngii ungngolai kamasuhsaang aka' moinnakato anna nahoamä' aka' kupopepainsangnging inde Kaheba Mapia lambi' dipungoä' sinnoa mesa to karake, ampo' Bahtakara Dehata daine' tipungo.

10Dianto anna kusa'bara'ammi kutahimbo asang. Kupanoa anna malai ingkänna hupatau ang napillei Puang Alataala mala salama' yaling di Kristus Yesus anna tuho di kamatandeang lambi' sapano-panona.

11Tula' indee tahpa' si'da-si'da dianto: Monna ke tapetahpa'ia' Puang Yesus mate aka' kita', aka' puha talahpa' katuhoantaa' ang dolu sibaha pembabe ang tahuhu, sinnoa mate toingkea' kita' sibaha. Monna noa, la tuho toingkea' kita' sibaha.

12Monna ke ungngolaikingkea' kamasuhsaang sitonda kasa'bara'ang, ya' la ma'pahenta toingkea' kita' sibaha. Monna ke tapengkasiliing, ya' la napengkasilii toingkea' kita'.

13Monna ke daingkea' mala dipetahpa', tontonne' mala dipetahpa' aka' daine' mala umbahoi pengkerona toboe'.

14Pahallu la umpakaleha asangnging indee pano di jumaa'. Di olona Puang Alataala pakalehai anna malai dai sika unsiba'di-ba'dii kara, ang dai ma'bahtuang. Aka' katämpä'anna la untallangngi tau ang mampehingngii.

15Pengkalambi'-lambi'i liui anna malai naangka' mapiao Puang Alataala anna dao pahallu masili didiona pengkähängammu. Pahalluo sitonda katahpa'ang umpopepakuhuing Bahtakara Dehata.

16Kahaoii kasitula'-tula'ang ang dai ma'bahtuang anna ang dai mebahanang dai' di Puang Alataala. Aka' tau ang situla'-tula' noa, tuhtuang ungkebo'i pa'elo'na Puang Alataala.

17Pepakuhunnaii sinnoa korong kanker ang madihhi' mokalao-lao yaling di kalaena tau. Di alla'naii dianto ta Himeneus anna ta Filetus.

18Sika ungkebo'inne' pepakuhu ang tahpa' anna umpasähsä' lalang kapampetahpa'anna sambaheang tau. Sika naoatee, "Katuhoanna hupatau di hoi' mai di kamateang puhang dahi." Ampo' setonganna la dahi di allo di hundinna.

19Ampo' katahpa'anna Puang Alataala dai maloyo, sinnoa batu ang untumpung busung tontong matoho. Di hao yato di batu aha tiuki' naoatee, "Puang Alataala ungnginsang petauanna." anna, "Ingkänna tau ang ungnginsang kalaena petauanna Puang Alataala pahallu ungkahaoi pembabe ang tahuhu."

20Yaling di dasang ang handang käyyäng aha ma'kahupa-hupa poreha hapu: aha ang kebulahang anna kepera'; aha toi ang dibabe kayu bahtu' tampo. Aha ang dipake ma'tosule; aha toi ang dipake allo-allo.

21Ponna aha tau ang umbahahsii kalaena di hao mai di kakarakeang, la napopengkähänne' Puang Alataala di kähängang ang keangka'. Mendahi tau ang napatani Puang sinnoa poreha ang kekuna liu. Dipatoka la umbabe ingkänna pengkähängang ang mapia.

22Kahaoii pampemala karakena to mahäti' anna malai maroho inahao. Petahpa'i pepakuhu ang setonganna sibaha ma'kalemu anna mesa inahao sibaha para-parammu ang mampetahpa' dai' di Puang Alataala sitonda inaha bahahsi.

23Daumpenghaui to unsiala-alai tula' ang dai ma'bahtuang, aka' ungnginsammi yatoo umpakende' supu kasiba'di-ba'diang.

24Ampo' sabua'na Puang Alataala daete' mala ma'siba'di; pahalluete' malunä' pano di ingkänna tau, mala mampakuhu anna sa'bara'.

25Pahallu toi napaitai manahpa lalang sitonda kamahempo'ang inaha pano di ingkänna ang mampa'bali. Aka' monna napanoa, yato tau umbai la mala mengkatoba' lambi' ungnginsang katahpa'ang.

26Pihsananna malang pole' pa'kaleha sumule aka' malaing di hao mai di kakuasaanna Pongkahana setang, ang puha mandahha nababeing pa'elo'na, sinnoa olo'-olo' ang mengkalahsu' di hao mai di sea'.


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran